Appell ippreżentat fis-27 ta’ April 2015 minn Tarif Akhras mis-sentenza mogħtija mill-Qorti Ġenerali (Is-Seba’ Awla) fit-12 ta’ Frar 2015 fil-Kawża T-579/11, Tarif Akhras vs Il-Kunsill tal-Unjoni Ewropea

(Kawża C-193/15 P)

(2015/C 205/32)

Lingwa tal-kawża: l-Ingliż

Partijiet

Appellant: Tarif Akhras (rappreżentanti: S. Millar, S. Ashley, Solicitors, D. Wyatt QC, R. Blakeley, Barrister)

Partijiet oħra fil-proċedura: Il-Kunsill tal-Unjoni Ewropea, Il-Kummissjoni Ewropea

Talbiet

Aggravji u argumenti prinċipali

Insostenn tal-appell tiegħu, l-appellant jinvoka żewġ motivi.

Fl-ewwel lok, il-Qorti Ġenerali wettqet żball ta’ liġi meta ddeċidiet li l-Kunsill seta’ japplika l-preżunzjoni li tgħid li l-appellant kien ibbenefika mill-iskema u/jew kien appoġġja l-iskema, u naqqset milli tapplika l-kriterju xieraq, intiż li jistabbilixxi jekk il-fatti stabbiliti kinux jikkostitwixxu sett ta’ indizji suffiċjentement speċifiċi, preċiżi u koerenti li jippermettu li jistabbilixxu li l-appellant ibbenefika mill-iskema u/jew kien appoġġja l-iskema.

Fit-tieni lok, il-Qorti Ġenerali wettqet żball ta’ liġi u żnaturat il-provi rilevanti rigward jekk l-appellant ibbenefikax mill-iskema u/jew kienx appoġġja l-iskema, provi li, fl-assenza ta’ tali żnaturament, setgħu juru li l-appellant ma kienx ibbenefika mill-iskema u ma kienx appoġġja l-iskema.

Li kieku l-Qorti Ġenerali ma kinitx applikat din il-preżunzjoni u/jew kienet applikat il-kriterju xieraq u/jew ma kinitx żnaturat il-provi msemmija iktar 'il fuq, hija kienet tannulla l-miżuri kkontestati meħuda fil-Kawża T-579/11 fit-23 ta’ Marzu 2012 u iktar tard.