—

tirrikonoxxi l-interess leġittimu tar-rikorrenti fil-preżentata ta’ dan ir-rikors għal annullament skont l-Artikolu 263 TFUE;

—

tiddikjara li dan ir-rikors għal annullament ġie ppreżentat b’mod regolari u li huwa ammissibbli skont l-Artikolu 263 TFUE;

—

tannulla d-Deċiżjoni C(2022) 324 final tal-25 ta’ Jannar 2022 li temenda d-Deċiżjoni C(2013) 306 final tat-23 ta’ Jannar 2013 dwar proċedura ta’ applikazzjoni tal-Artikolu 101 tat-Trattat dwar il-Funzjonament tal-Unjoni Ewropea (AT.39839 – Telefónica u Portugal Telecom) skont l-Artikolu 263 TFUE;

—

sussidjarjament, u wkoll skont l-Artikolu 264 TFUE, għar-raġunijiet invokati, tnaqqas il-multa imposta fuq ir-rikorrenti skont l-Artikolu 1 tad-deċiżjoni kkontestata;

—

tikkundanna lill-Kummissjoni għall-ispejjeż tal-proċedura u għall-ispejjeż sostnuti mir-rikorrenti.

1.

L-ewwel motiv ibbażat fuq ksur ta’ dak li ġie stabbilit fis-sentenza tal-Qorti Ġenerali. Ir-rikorrenti ssostni li d-Deċiżjoni C(2022) 324 final tal-25 ta’ Jannar 2022 li temenda d-Deċiżjoni C(2013) 306 final tat-23 ta’ Jannar-2013 dwar proċedura ta’ applikazzjoni tal-Artikolu 101 tat-Trattat dwar il-Funzjonament tal-Unjoni Ewropea (AT.39839 – Telefónica u Portugal Telecom) tinvolvi interpretazzjoni ġdida tal-klawżola ta’ nonkompetizzjoni, li jikkostitwixxi ksur ta’ dak li ġie stabbilit fis-sentenza tal-Qorti Ġenerali u tar-res judicata tagħha, bil-konsegwenza li d-deċiżjoni kkontestata għandha tiġi annullata.

2.

It-tieni motiv ibbażat fuq ksur tar-rekwiżiti formali essenzjali u tad-drittijiet tad-difiża ta’ Pharol minħabba nuqqas ta’ adozzjoni ta’ dikjarazzjoni tal-oġġezzjonijiet. Ir-rikorrenti ssostni li sa fejn il-Kummissjoni tadotta interpretazzjoni ġdida tal-klawżola ta’ nonkompetizzjoni, li għandha effett fuq il-konstatazzjonijiet rigward il-portata tal-ksur, din tal-aħħar kellha tadotta dikjarazzjoni tal-oġġezzjonijiet ġdida – li jikkostitwixxi ksur tar-rekwiżiti formali essenzjali u tad-drittijiet tad-difiża tar-rikorrenti li jiġġustifika li d-deċiżjoni kkontestata tiġi annullata.

3.

It-tielet motiv ibbażat fuq żball fid-determinazzjoni taċ-ċifri tal-bejgħ marbut mal-ksur. Ir-rikorrenti ssostni, b’mod partikolari, li l-element essenzjali għall-analiżi tal-eżistenza ta’ kompetizzjoni potenzjali, għall-finijiet tad-determinazzjoni preċiża tal-bejgħ direttament jew indirettament marbut mal-ksur, għandu jkun il-possibbiltà effettiva ta’ dħul f’kull suq ikkonċernat, jiġifieri l-assenza ta’ barrieri insormontabbli għad-dħul u, jekk hekk ikun il-każ, l-eżistenza ta’ possibiltajiet reali u konkreti għall-impriża li tidħol f’kull wieħed mis-swieq, ġaladarba l-konstatazzjoni tal-assenza ta’ barrieri insormontabbli, magħmula, minkejja li b’mod żbaljat, mill-Kummissjoni fid-deċiżjoni kkontestata, ma hijiex suffiċjenti.