Ir-Regolament tal-Kunsill (KE) Nru 1905/2003

tas-27 t'Ottubru 2003

li jimponi dazju definittiv kontra d-dumping u l-ġbir definittiv tad-dazju proviżorju impost fuq importazzjoni t'alkoħol furfuriliku li joriġina fir-Repubblika tal-Poplu taċ-Ċina

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea,

Wara li kkunsidra r-Regolament tal-Kunsill (KE) Nru 384/96 tat-22 ta' Diċembru 1995 dwar il-protezzjoni kontra importazzjoni li hi l-oġġett ta' dumping minn pajjiżi li mhux membri tal-Komunità Ewropea [1] (ir-Regolament bażiku), u b'mod partikolari l-Artikolu 9 tiegħu,

Wara li kkunsidra l-proposta mressqa mill-Kummissjoni wara li kkonsulta mal-Kumitat Konsultattiv,

Billi:

A. PROĊEDURA

1. Miżuri proviżorji

(1) Il-Kummissjoni, skond ir-Regolament (KE) Nru 781/2003 [2] (ir-Regolament proviżorju) impona dazji proviżorji kontra d-dumping fuq importazzjoni t'alkoħol furfuriliku (AF) li joriġina fir-Repubblika tal-Poplu taċ-Ċina (Iċ-Ċina), esprimati bħala ammont ta' dazju speċifiku li jvarja bejn EUR 21 u 181 għal kull tunnellata metrika, korrispondenti mal-marġini ta' inġurja.

2. Proċedura ta' wara

(2) Wara l-imposizzjoni tad-dazji proviżorji kontra d-dumping, il-partijiet irċevew "svelar" tal-fatti u konsiderazzjonijiet li fuqhom kien ibbażat ir-Regolament. Xi partijiet ressqu kummenti bil-miktub. Il-partijiet interessati kollha li talbu ngħataw l-opportunità li jinstemgħu mill-Kummissjoni. Il-partijiet kollha ġew infurmati bil-fatti essenzali u l-konsiderazzjonijiet li fuq il-bażi tagħhom kien maħsub li tiġi rrikmandata l-imposizzjoni tad-dazji definittivi kontra d-dumping u l-ġbir definittiv ta' l-ammonti żgurati permezz tad-dazji proviżorji. Ingħataw ukoll perjodu li fih setgħu jagħmlu rappreżentazzjonijiet wara dan l-"isvelar".

(3) Il-kummenti kemm verbali kif ukoll bil-miktub imressqa mill-partijiet interessati ġew ikkunsidrati u, fejn xieraq, ittieħed kont tagħhom għas-sejbiet definittivi.

(4) Il-Kummissjoni kompliet tfittex kull informazzjoni li ħasset li hemm bżonnha għall-iskop tas-sejbiet definittivi tagħha. Minbarra ż-żjarat ta' verifikazzjoni li saru fl-istabbilimenti tal-kumpanniji msemmija fil-premessi 10 u 11 tar-Regolament proviżorju, għandu jkun innotat li wara l-imposizzjoni tal-miżuri proviżorji, saret żjara fuq il-post fl-istabbiliment ta' l-utent Komunitarju msemmi hawn taħt:

- Bakelite AG, Iserlohn-Lethmate, il-Ġermanja.

B. PRODOTT TAĦT KONSIDERAZZJONI U PRODOTT SIMILI

(5) Peress li ma kienux riċevuti l-ebda kummenti rigward il-prodott taħt konsiderazzjoni u prodott simili, il-kontenut u l-konklużjonijiet proviżorji tal-premessi 12 sa 17 tar-Regolament proviżorju huma hawnhekk ikkonfermati.

C. DUMPING

1. Trattament ta' l-ekonomija tas-suq (TES)

(6) L-ebda prova oħra ma kienet provduta rigward id-deċiżjoni li ma tingħatax it-TES lill-erba' esportaturi Ċiniżi li kkooperaw. Is-sejbiet mniżżla fil-premessi 20 tar-Regolament proviżorju huma, għalhekk, ikkonfermati.

2. Trattament individwali (TI)

(7) Fir-Regolament proviżorju, it-TI kien mogħti lil tliet produtturi li kkooperaw u miċħuda lil wieħed. Ir-raġunijiet għaliex it-TI kien jew ma kienx mogħti rriflettew il-kondizzjonijiet imniżżla fl-Artikolu 9(5) tar-Regolament bażiku. L-industrija Komunitarja (IK) ikkontestat kemm il-Kummissjoni setgħet toqgħod fuq dan l-Artikolu peress li dan ġie fis-seħħ biss wara l-bidu tal-proċedura kurrenti.

(8) Id-determinazzjoni tal-kwistjoni dwar it-TI kienet ibbażata fuq il-kriterji li kienu japplikaw meta il-proċedura kurrenti nbdiet. Dawn il-kriterji huma identiċi bħal dawk imniżżla fl-Artikolu 9(5) tar-Regolament bażiku, u ilhom jintużaw għal numru ta' snin. Għalhekk, ir-Regolament proviżorju rrefera għall-Artikolu 9(5) tar-Regolament bażiku li ssostanzja prattika li ilha eżistenti.

(9) Fid-determinazzjoni proviżorja tagħha, il-Kummissjoni ċaħdet it-TI lill-produttur esportatur Ċiniż wieħed li kkoopera, Henan Huilong Chemical Industry Co. Ltd (Huilong), li kien kemm produttur kif ukoll negozjant ta' l-AF, fuq il-bażi li ma kienx possibbli li jiġi stabbilit il-livell ta' ndħil mill-Istat fl-attivitajiet kummerċjali mwettqa minn Huilong. Madankollu, il-premessi 29 tar-Regolament proviżorju jipprovdi li din il-kwistjoni tkun ikkunsidrata aktar fil-fond fl-istadju definittiv.

(10) L-esportatur kkonċernat isostni li d-determinazzjoni proviżorja ma kinitx korretta u li tassew għandha tingħata t-TI. Biex issostni l-argument tagħha, il-kumpanija tindika li ma nstabet prova ta' l-ebda ndħil dirett mill-Istat fil-kumpannija nnifisha, u li l-volumi ta' l-AF li sar kummerċ fihom kienu inqas minn 5 % tal-produzzjoni tagħha fil-perjodu ta' l-investigazzjoni (PI). Minbarra dan, parti minn dan il-prodott li sar kummerċ fih kien mixtri minn esportatur ieħor li kkoopera li kienet ġa ngħatatlu t-TI.

(11) Wara l-imposizzjoni tal-miżuri proviżorji, ma nstabet l-ebda informazzjoni oħra li tindika ndħil mill-Istat fl-attivitajiet kummerċjali mwettqa minn Huilong. Huilong qablet li twaqqaf l-attività kummerċjali tagħha fl-AF jekk tingħata t-TI.

(12) Għalhekk, issa ġie konkluż li l-livell ta' ndħil mill-Istat fl-attivitajiet kummerċjali ta' Huilong, jekk xejn, ma jistgħux ikunu sinjifikanti u f'kull każ ma jkunux tali li jippermettu li jiġu evitati l-miżuri. Fuq dan il-bażi, ġie deċiż li ssir reviżjoni tad-determinazzjoni proviżorja, u li tingħata t-TI lil Huilong.

3. Pajjiż analogu

(13) Il-produtturi esportaturi oġġezjonaw għall-għażla ta' l-Istati Uniti ta' l-Amerika bħala l-pajjiż analogu u rrepetew id-dikjarazzjoni tagħhom li t-Tajlandja kienet tirrapreżenta alternattiva aħjar. Din il-pretensjoni hija bbażata fuq l-argumenti li (i) l-ispejjeż tal-produzzjoni huma aktar baxxi fit-Tajlandja; (ii) it-Tajlandja hija l-għajn prinċipali ta' l-AF li jiġi mportat għal ġo l-UE; u (iii) min għamel l-ilment jaċċetta li m'hemmx prova li l-importazzjoni mit-Tajlandja qed tkun mixtrija taħt il-prezz.

(14) Kif miġbura fil-qosor fil-premessi 33 tar-Regolament proviżorju, produttur wieħed biss, fl-Istati Uniti ta' l-Amerika, kien lest li jikkoopera fl-investigazzjoni. Barra minn hekk, kien stabbilit proviżorjament li l-Istati Uniti ta' l-Amerika aderixxew il-kriterji neċessarji biex jikkostitwixxu pajjiż analogu xieraq.

(15) M'hemm l-ebda indikazzjoni li t-Tajlandja, jew tabilħaqq l-Affrika t'Isfel, kienu jikkostitwixxu alternattiva aħjar bħala pajjiż analogu. L-ebda prova ma ġiet mogħtija mill-produtturi esportaturi dwar l-ispejjeż tal-produzzjoni tal-produtturi ta' l-AF fit-Tajlandja jew fl-Affrika t'Isfel, ħlief billi għamlu estrapolazzjoni mill-prezzijiet ta' l-esportazzjoni li ġew irraportati fl-ilment u fuq l-Eurostat. Minbarra dan, il-produttur tat-Tajlandja rrifjuta li jikkoopera fil-proċeduri. Għalhekk, kien ikkunsidrat li dawn il-pajjiżi ma setgħux jintużaw b'mod raġonevoli biex jinbena valur normali dovut għan-nuqqas ta' prova ta' min joqgħod fuqha u verifikabbli li setgħu jiġu bbażati xi sejbiet fuqha.

(16) Għalhekk, u fin-nuqqas ta' xi prova ġdida għall-kuntrarju, il-konklużjoni proviżorja li ntlaħqet fil-premessi 33 tar-Regolament proviżorju hija kkonfermata.

4. Dumping

4.1. Valur normali

(17) Il-produtturi esportaturi sostnew li l-valur normali li kien mibni huwa għoli wisq biex jiġi kkunsidrat raġonevoli. Biex isostnu din il-pretensjoni huma jindikaw il-prezzijiet aktar baxxi ta' l-AF mit-Tajlandja, li mhux allegat li hu mixtri taħt il-prezz, kif ukoll lejn il-valur normali aktar baxx ppreżentat minn dawk li ressqu l-ilment qabel ma bdiet il-proċedura.

(18) F'dan ir-rigward għandu jkun innotat li il-valur normali kien stabbilit skond l-Artikolu 2(7)(a) tar-Regolament bażiku, jiġifieri fuq il-bażi ta' l-informazzjoni miksuba fil-pajjiż analogu, i.e. l-Istati Uniti ta' l-Amerika. Barra minn hekk huwa kkonfermat li l-valur normali li kien mibni kien ikkalkolat fuq il-bażi tal-prezzjijiet attwali u ta' l-ispejjeż li ġew iverifikati kif għandu jkun matul investigazzjoni fuq il-post li saret fl-istabbiliment tal-produttur ta' l-AF li kkoopera fl-Istati Uniti ta' l-Amerika.

(19) Għalhekk, huwa kkunsidrat li, fin-nuqqas ta' informazzjoni verifikata fir-rigward ta' jew l-Affrika t'Isfel jew it-Tajlandja, id-data disponibbli mill-produttur ta' l-AF fl-Istati Uniti ta' l-Amerika tirrapreżenta l-aħjar informazzjoni disponibbli għall-bini tal-valur normali. Is-sejbiet tal-premessi 34 tar-Regolament proviżorju huma għalhekk ikkonfermati.

4.2. Prezz ta' l-esportazzjoni

(20) Il-prezzijiet ta' l-esportazzjoni kienu kemmxejn aġġustati, wara kummenti, sostnuti kif għandu jkun minn prova, dwar il-piżijiet tan-noll użati.

(21) Il-produtturi esportaturi oġġezjonaw ukoll għall-metodoloġija li ntużat biex ġie kkalkolat il-prezz ta' l-esportazzjoni għall-kumpanniji li ma kkooperawx kif miġbura fil-qosor fil-premessi 36 tar-Regolament proviżorju.

(22) F'dan ir-rigward, għandu jkun imfakkar li l-livell ta' kooperazzjoni f'dan il-każ kien baxx, u li l-prezzijiet ta' l-esportazzjoni għalhekk kellhom ikunu bbażati fuq il-fatti disponibbli skond l-Artikolu 18(1) tar-Regolament bażiku. Għar-Regolament proviżorju, il-prezzijiet u l-volumi tal-produttur li kkoopera u li ma ngħatax it-TI, i.e. Huilong, kienu wżati.

(23) Dan il-produttur issa ngħata t-TI u kellu l-marġini tad-dumping tiegħu proprju kkalkolat fuq il-bażi tal-bejgħ tiegħu proprju lill-UE matul il-PI. Imħabba dan, il-valur ta' l-esportazzjoni għall-kumpanniji li ma kkooperawx kellu jerġa' jiġi kkalkolat. Dan il-kalkolu l-ġdid huwa bbażat fuq volum rappresentattiv tal-bejgħ fl-UE ta' l-erba' esportaturi li kkooperaw. Sabiex jiġi żgurat li l-operazzjonijiet użati jkun kkunsidrati ta' min joqgħod fuqhom, kampjun ta' 25 % bil-volum kien użat. Dan il-kampjun kien jinkludi fih dawk il-fatturi ta' l-erba' produtturi li kkooperaw li kellhom il-medja tal-prezzijiet ta' l-operazzjoni l-aktar baxxa. Kien ikkunsidrat xieraq li jintużaw il-prezzijiet ta' l-operazzjoni l-aktar baxxi, peress li ma kienx hemm raġuni għax wieħed jemmen li l-bejgħ tal-kumpanniji li ma kkooperawx kien jkun bi prezzijiet ogħla minn dawk tal-produtturi li kkooperaw. Il-prezz medju hekk ikkalkolat kien imbagħad użat biex jiġi stabbilit id-dumping residwu u l-marġini ta' inġurja.

4.3. Paragun

(24) Fin-nuqqas ta' xi kummenti, il-konklużjoni proviżorja tal-premessi 37 tar-Regolament proviżorju huwa kkonfermat.

4.4. Marġini tad-dumping

(25) Il-marġini tad-dumping, li tagħhom saret reviżjoni fid-dawl tal-kwistjonijiet miġbura fil-qosor hawn fuq, huma issa li ġejjin (esprimati bħala persentaġġ tal-prezz ta' l-importazzjoni cif fil-fruntiera tal -Komunità):

Kumpannija | Marġini |

Gaoping | 93 % |

Huilong | 90 % |

Linzi | 78 % |

Zhucheng | 80 % |

L-oħrajn kollha | 112 % |

D. L-INDUSTRIJA KOMMUNITARJA

(26) L-erba' esportaturi li kkooperaw ippretendew li Transfurans Chemicals BVBA (TFC), il-Belġju u International Furan Chemicals BV, l-Olanda (IFC) ma jikkostitwixxux l-"industrija Komunitarja" fis-sens ta' l-Artikoli 5(4) u 4(1) tar-Regolament bażiku, għax dawn il-kumpanniji huma żgħar ħafna meta mqabbla man-numru ta' impjegati u huma l-proprjetà ta' kumpannija privata fir-Repubblika Dominikana, Central Romana Corporation (CRC).

(27) Dawn l-argumenti ma setgħux jkunu aċċettati. L-ewwelnett, kumpanniji żgħar u ta' daqs medju huma b'mod ċar intitolati biex jippreżentaw ilment u jistgħu jikkostitwixxu l-IK fis-sens ta' l-Artikoli 5(4) u 4(1) tar-Regolament bażiku.

(28) It-tieni, l-investigazzjoni wriet, kif imsemmi fil-premessi 43 tar-Regolament proviżorju, li l-AF fabbrikat minn TFC huwa ta' oriġini Komunitarja u li l-operazzjonijiet ta' manifattura, l-investiment teknoloġiku u kapitali għall-operazzjonijiet ta' manifattura u l-operazzjonijiet ta' bejgħ isiru fil-Komunità. Barra minn hekk, il-fatt li TFC, IFC u CRC huma assoċjati minħabba pussess komuni, kif stabbilit taħt il-premessi 42 tar-Regolament proviżorju, ma jeskludix l-applikazzjoni ta' l-Artikoli 5(4) u 4(1) tar-Regolament bażiku.

(29) Għalhekk, l-argumenti mressqa mill-produtturi esportaturi Ċiniżi ma ntlaqgħux u s-sejbiet imniżżla fil-premessi 44 tar-Regolament proviżorju huma kkonfermati.

E. INĠURJA

1. Konsum ta' AF fil-Komunità

(30) Fin-nuqqas ta' xi informazzjoni ġdida dwar il-konsum, is-sejbiet proviżorji kif deskritti fil-premessi 46 sa 48 tar-Regolament proviżorju huma kkonfermati.

2. Importazzjoni ta' AF ġol-Komunità

(31) Fin-nuqqas ta' xi informazzjoni ġdida dwar l-importazzjoni ta' AF ġol-Komunità, is-sejbiet proviżorji kif deskritti fil-premessi 49 sa 63 tar-Regolament proviżorju huma kkonfermati.

3. Sitwazzjoni ekonomika ta' l-industrija Komunitarja

(32) L-erba' produtturi esportaturi Ċiniżi ppretendew li l-IK ma soffrietx inġurja, peress li bosta mill-indikaturi ta' inġurja (b'mod partikolari l-volum tal-bejgħ, il-prezzijiet tal-bejgħ, il-ħażniet, il-profitt, il-likwidità u l-investiment) stabbiliti mill-Kummissjoni ma setgħux ikunu rrikonċiljati mal-verifika tal-kontijiet ippublikati ta' IFC u/jew TFC. Huma argumentaw li xi indikaturi, bħal profitt, ħażniet u likwidità, li jkunu jinsabu fil-verifika tal-kontijiet ta' IFC u/jew TFC urew tendenzi ta' żieda jew kienu stabbli.

(33) Għandu jkun innotat li l-verifika tal-kontijiet ippublikati ta' IFC u TFC jinkludu wkoll attivitajiet oħra għajr il-produzzjoni tal-prodott ikkonċernat. Minbarra dan, il-verifika tal-kontijiet ipubblikati ta' IFC u TFC ikopru l-perjodu minn Ottubru 2001 sa Settembru 2002 waqt li l-PI msemmi fil-premessi 4 tar-Regolament proviżorju kopra l-perjodu mill-1 ta' Lulju 2001 sat-30 ta' Ġunju 2002. Barra minn hekk, kif imsemmi fil-premessi 41 u 44 tar-Regolament proviżorju, instab li TFC hija parti minn entitià ekonomika waħda magħmula minn TFC, IFC u CRC. Għalhekk, sabiex issir stima bi skop ta' ċerti indikaturi ta' l-inġurja, kien neċessarju li jittieħed ukoll kont ta' xi data minn CRC. Barra dan, huwa mfakkar li l-attività kummerċjali proprja ta' IFC fil-Komunità msemmija fil-premessi 105 u 106 tar-Regolament proviżorju taqa' barra mill-iskop ta' l-investigazzjoni, imma tifforma parti mill-verifika tal-kontijiet ta' IFC. Barra minn hekk, il-bejgħ ta' l-esportazzjoni ta' IFC imsemmija fil-premessi 101 sa 104 tar-Regolament proviżorju huwa inkluż fil-verifika tal-kontijiet, waqt li l-investigazzjoni kopriet biss is-sitwazzjoni ekonomika ta' l-IK bir-rigward tas-suq Komunitarju.

(34) Dawn il-fatti ma jħallux l-indikaturi ta' l-inġurja li jkunu ppreżentati mill-kontijiet ippubblikati ta' IFC u TFC kif iproponew l-erba' produtturi esportaturi Ċiniżi. Huwa wkoll imfakkar li s-sejbiet tal-Kummissjoni huma skond l-informazzjoni li tinsab fil-fajls għall-ispezzjoni mill-partijiet interessati.

(35) Għalhekk, l-argumenti mressqa mill-produtturi esportaturi Ċiniżi ma ntlaqgħux u s-sejbiet u l-konklużjoni mniżżla fil-premessi 86 sa 91 tar-Regolament proviżorju huma kkonfermati.

F. KAWŻAR

(36) L-erba' produtturi esportaturi Ċiniżi argumentaw li la ma kienx hemm inġurja ma kienx hemm kawżar. Jekk hemm inġurja, mhijiex l-importazzjoni Ċiniża iżda l-importazzjoni mit-Tajlandja li kkontribwixxiet għas-sitwazzjoni ekonomika ta' l-IK.

(37) Il-produtturi esportaturi Ċiniżi ma pprovdew l-ebda prova ġdida biex isostnu din il-pretensjoni. Huwa mfakkar li fil-premessi 107 sa 111 tar-Regolament proviżorju, u skond l-Artikolu 3(7) tar-Regolament bażiku, il-Kummissjoni analizzat l-importazzjoni totali ta' AF ġol-Komunità minn pajjiżi terzi oħra bħala fattur magħruf ieħor għajr l-importazzjoni li hi l-oġġett ta' dumping. Din l-analiżi kopriet ukoll l-importazzjoni mit-Tajlandja bir-rigward ta' volumi u prezzijiet.

(38) L-importazzjoni mit-Tajlandja tirrappreżenta madwar 96 % ta' l-importazzjoni ta' AF minn pajjiżi terzi. Il-volumi ta' l-importazzjoni ta' AF ġol-Komunità mit-Tajlandja żdiedu skond l-iżviluppi deskritti fil-premessi 109 tar-Regolament proviżorju. Barra minn hekk, instab li l-prezzijiet ta' l-importazzjoni mit-Tajlandja kienu ħafna ogħla mill-livell ta' dawk tal-produtturi esportaturi Ċiniżi (aktar minn 24 % matul il-PI) u ogħla wkoll minn dawk ta' l-IK (aktar minn 6 % matul il-PI).

(39) Għalhekk, l-argumenti mressqa mill-produtturi esportaturi Ċiniżi ma ntlaqgħux u s-sejbiet u l-konklużjonijiet imniżżla fil-premessi 92 sa 113 tar-Regolament proviżorju huma kkonfermati.

G. INTERESS TAL-KOMUNITÀ

(40) Il-produtturi esportaturi Ċiniżi u assoċjazzjoni waħda ppretendew li l-miżuri proviżorji għandhom impatt akbar fuq l-utenti u fuq l-industrija tal-funderija milli indikaw is-sejbiet tal-Kummissjoni. B'mod partikolari tressaq l-argument li l-interessi ta' l-utenti għandhom jirbħu minħabba l-impjieg baxx fl-IK imqabbel ma' l-impjieg għoli fl-industrija tal-funderija.

(41) B'rigward tal-pretensjoni mressqa mill-produtturi esportaturi Ċiniżi, għandu jkun innotat li dawn il-produtturi ma pprovdew l-ebda prova ġdida li setgħet kienet relevanti għall-istħarriġ ta' l-interess tal-Komunità. Madankollu, il-produtturi esportaturi Ċiniżi ma jistgħux jikkwalifikaw bħala parti interessata għall-iskop tad-determinazzjoni ta' l-interess tal-Komunità.

(42) Rigward il-pretensjoni ta' l-assoċjazzjoni, għandu jkun innotat li din kienet mistħarrġa, għalkemm l-assoċjazzjoni ma kkooperatx matul l-investigazzjoni u ma pprovdietx prova ġdida biex issostni l-argumenti tagħha. Għal dan il-għan, il-Kummissjoni wettqet żjara ta' verifikazzjoni fuq il-post oħra fl-istabbiliment ta' utent Ġermaniż. Din l-investigazzjoni li saret b'aktar reqqa kkonfermat ir-riżultat ta' l-analiżi magħmula fl-istadju proviżorju, kif imniżżel fil-premessi 126 tar-Regolament proviżorju, u li l-impatt komplessiv tal-miżuri definittivi proposti ser ikunu negliġibli.

(43) Għalhekk, l-argumenti mressqa mill-produtturi esportaturi Ċiniżi u mill-assoċjazzjoni ma ntlaqgħux u s-sejbiet u l-konklużjonijiet imniżżla fil-premessi 114 sa 133 tar-Regolament proviżorju huma kkonfermati.

H. MIŻURI DEFINITTIVI

(44) Minħabba l-konklużjonijiet li ntlaħqu rigward id-dumping, l-inġurja, il-kawżar u l-interess tal-Komunità, huwa kkunsidrat li miżuri definittivi kontra d-dumping għandhom jkunu imposti biex ma ssirx aktar inġurja lill-IK minn importazzjoni li hi l-oġġett ta' dumping miċ-Ċina.

1. Livell ta' eliminazzjoni ta' inġurja

(45) Huwa mfakkar li instab proviżorjament li marġini ta' profitt ta'10 % fuq il-valur tal-bejgħ totali ta' AF setgħet tkun meqjusa bħala l-minimu xieraq li l-IK setgħet tippretendi li tikseb b'mod raġonevoli fin-nuqqas ta' dumping inġurjuż. Dan il-marġini ta' profitt kien ukoll jippermetti lill-IK li tagħmel l-investimenti fit-tul neċessarji.

(46) L-IK ippretendiet li l-marġini ta' profitt ta' 10 % kif imniżżel fil-premessi 136 tar-Regolament proviżorju ma kienx jirrifletti prospett li setgħet b'mod raġonevoli tippretendi li ser tikseb fin-nuqqas ta' dumping inġurjuż, u talbet marġini ta' profitt ta' mill-inqas 23,15 % fuq il-valur tal-bejgħ, ibbażat fuq l-andament tagħha fis-snin preċedenti.

(47) Sabiex tistħarreġ din il-pretensjoni, saret analiżi oħra fil-fond ta' l-informazzjoni kollha disponibbli dwar il-marġini ta' profitt li seta' jintqies bħala minimu xieraq li l-IK setgħet b'mod raġonevoli tippretendi li tikseb fin-nuqqas ta' dumping inġurjuż. Il-profitt irrealizzat fis-snin ta' qabel il-PI reġa' ġie analizzat. Instab li fis-snin preċedenti r-rati ta' profitt kienu verament ħafna aktar għoljin minn 10 %. Kien għalhekk konkluż li marġini ta' profitt ta' 15,17 % ibbażata fuq il-medja ta' profitt attwali miksub fit-tliet snin ta' qabel il-PI seta' jkun b'mod raġonevoli mistenni minħabba l-iżvilupp tal-profitt ta' l-IK u l-presenza ta' importazzjoni li hi l-oġġett ta' dumping fis-suq Komunitarju. Dan l-approċċ huwa kompletament skond il-ġurisprudenza eżistenti, b'mod partikolari d-deċiżjoni fil-każ ta' EFMA v Kunsill [3].

(48) Għalhekk, il-pretensjoni ta' l-industrija Komunitarja għal marġini ta' profitt ta' 23,15 % ma ntlaqgħitx. Fid-dawl ta' dan, saret reviżjoni tal-kalkoli tal-Kummissjoni fuq il-bażi ta' reviżjoni tal-marġini ta' profitt.

(49) Barra minn din il-bidla fil-marġini ta' profitt, il-livell ta' l-eliminazzjoni ta' l-inġurja kien ikkalkolat bl-użu ta' l-istess metodoloġija kif spjegat fil-premessi 137 tar-Regolament proviżorju. Fuq dan il-bażi, kien iddeterminat livell ta' prezzijiet mingħajr inġurja li kien ikopri l-ispejjeż tal-produzzjoni ta' l-IK u li kien iħalli qligħ raġjonevoli li jkun miksub fin-nuqqas ta' importazzjoni li hi l-oġġett ta' dumping mill-pajjiż ikkonċernat. Bħala riżultat ta' dawn il-kalkoli li saritilhom reviżjoni, instabu marġini ta' inġurja ta' 8,9 % sa 32,1 %.

2. Forma u livell ta' dazju definittiv

(50) Skond l-Artikolu 9(4) tar-Regolament bażiku, peress li l-marġini ta' inġurja kienu aktar baxxi mill-marġini tad-dumping misjuba għall-produtturi esportaturi kollha kkonċernati, d-dazju definittiv għandu jkun iffissat fil-livell tal-marġini ta' inġurja.

(51) L-IK talbet li l-miżuri definittivi jieħdu l-forma t'applikazzjoni kkombinata ta' dazju speċifiku (ammont fiss EUR/tunnellata metrika) u dazju varjabbli (daqs id-differenza bejn il-prezz ta' l-importazzjoni u prezz minimu predeterminat) jew bħala dazju varjabbli fil-forma ta' prezz minimu ta' l-importazzjoni. Barra minn hekk, l-IK argumentat li d-differenza bejn l-ammonti ta' dazju imposti fuq l-esportaturi kien tant għoli li seta' jkun hemm riskji addizjonali li d-dazji jiġu evitati, bħal b'arranġamenti kompensatorji jew b'assorbiment.

(52) Sabiex tiġi mistħarrġa din il-pretensjoni, il-forom differenti possibbli tal-miżuri ġew analizzati fil-fond. Minħabba il-bżonn li tiġi żgurata l-effiċjenza tal-miżuri, kien ikkunsidrat li la applikazzjoni kkombinata ta' dazju speċifiku (ammont fiss EUR/tunnellata metrika) ma' dazju varjabbli lanqas dazju varjabbli waħdu ma kienu jkunu biżżejjed biex ineħħu l-inġurja kkawżata mid-dumping. Ta' l-ewwel hija użata biss f'każi eċċezzjonali meta ċ-ċirkostanzi partikolari tal-każ, eż. indikazzjonijiet ċari ta' manipulazzjoni tal-prezzijiet, jirrikjedu hekk, mentri ta' l-aħħar jirriżulta f'problemi inerenti ta' infurzar. Kif stabbilit fir-Regolament proviżorju, id-dazju li għandu jkun impost għandu jkun fil-forma t'ammont speċifiku ta' EUR/tunnellata metrika sabiex tiġi żgurata l-effiċjenza tal-miżuri u biex jitnaqqas ir-riskju eżistenti li l-prodott kkonċernat jiġi sostitiwit ma' prodotti oħra fl-istess kategorija ġenerali ta' merkanzija (eż. furfuriliku), l-aktar peress li manipulazzjoni tal-prezzijiet kienet osservata f'xi proċeduri preċedenti li jinvolvu l-furfuriliku [4].

(53) Madankollu, sabiex jiġu minimizzati aktar ir-riskji li d-dazji jiġu evitati dovut għal-livell sostanzjali ta' nuqqas ta' kooperazzjoni (40 %) u għad-differenza għolja fl-ammonti ta' dazju, huwa kkunsidrat li f'dan il-każ hemm bżonn dispożizzjonijiet speċjali biex tiġi żgurata l-applikazzjoni xierqa tad-dazji kontra d-dumping. Dawn id-dispożizzjonijiet speċjali jinkludu l-presentazzjoni lill-awtoritajiet tad-dwana ta' l-Istati Membri ta' fattura kummerċjali valida, li għandha tkun konformi mal-ħtiġijiet kif imniżżla fl-Anness. Importazzjoni li tkun akkompanjata minn fattura bħal din biss tista' tiġi ddikjarata taħt il-kodiċi addizjonali applikabbli TARIC tal-produttur imsemmi. Importazzjoni li ma tkunx akkompanjata minn fattura bħal din issir soġġetta għad-dazju residwu kontra d-dumping applikabbli għall-esportaturi l-oħra kollha. Il-kumpanniji kkonċernati ġew ukoll mistiedna biex jagħtu rapporti regolari lill-Kummissjoni sabiex tiġi żgurata tkomplija xierqa ta' l-informazzjoni dwar il-bejgħ tagħhom ta' l-AF lill-Komunità. F'każijiet fejn rapporti ma ġewx mogħtija, jew fejn ir-rapporti jiżvelaw li l-miżuri mhumiex biżejjed biex jeliminaw l-effetti ta' dumping inġurjuż, jista' jkun neċessarju li tinbeda reviżjoni temporanja skond l-Artikolu 11(3) tar-Regolament bażiku.

(54) Il-kalkolu tal-bidu ta' l-inġurja konness mal-prezz ta' l-importazzjoni cif jirriżulta f'dazji li jvarjaw bejn EUR 84 u 250 għal kull tunnellata metrika.

(55) L-emenda li saret fil-marġini tad-dumping u ta' l-inġurja ma kellha l-ebda effett fuq l-applikazzjoni tar-regola ta' dazju inqas. Għalhekk, il-metodoloġija wżata biex jiġu stabbiliti ir-rati tad-dazju kontra d-dumping kif deskritt fil-premessi 138 tar-Regolament proviżorju hija hawnhekk ikkonfermata. Id-dazji definittivi għalhekk ser ikunu:

Kumpannija | Ad valorem | Dazju speċifiku |

Gaoping | 18,3 % | 160 EUR/tunnellata metrika |

Huilong | 17,9 % | 156 EUR/tunnellata metrika |

Linzi | 8,9 % | 84 EUR/tunnellata metrika |

Zhucheng | 10,3 % | 97 EUR/tunnellata metrika |

L-Oħrajn kollha | 32,1 % | 250 EUR/tunnellata metrika |

I. KOLLEZZJONI DEFINITTIVA TAD-DAZJU PROVIŻORJU

(56) Minħabba l-kobor tal-marġini tad-dumping misjuba għall-produtturi esportaturi fiċ-Ċina u minħabba l-livell ta' inġurja kkawżata lill-industrija Komunitarja, huwa kkunsidrat neċessarju li l-ammonti żgurati permezz tad-dazju proviżorju kontra d-dumping impost mir-Regolament proviżorju għandu jkun miġbur definittivament sakemm jintlaħaq l-ammont tad-dazji definittivi imposti. Peress li d-dazji definittivi huma ogħla mid-dazji proviżorji, huma biss l-ammonti żgurati fil-livell ta' dazji proviżorji li għandhom ikunu definittivament miġbura.

(57) Kull pretensjoni li titlob l-applikazzjoni ta' dawn ir-rati tad-dazju kontra d-dumping ta' kumpanniji individwali (eż. wara bidla fl-isem ta' l-entità jew wara t-twaqqif ta' entitajiet ġodda tal-produzzjoni jew tal-bejgħ) għandha tkun indirizzata mill-ewwel lill-Kummissjoni bl-informazzjoni relevanti kollha, b'mod partikolari kull modifikazzjoni fl-attivitajiet tal-kumpannija konnessi mal-produzzjoni, bejgħ domestiku u bejgħ ta' l-esportazzjoni assoċjat ma' eż. dik il-bidla fl-isem jew dik il-bidla fl-entitajiet tal-produzzjoni u tal-bejgħ. Jekk xieraq, ir-Regolament għandu għalhekk jiġi emendat b'aġġornament tal-lista tal-kumpanniji li jibbenefikaw minn dazji individwali,

ADOTTAT DAN IR-REGOLAMENT:

Artikolu 1

1. Dazju definittiv kontra d-dumping huwa hawnhekk impost fuq importazzjoni ta' l-AF li bħalissa jista' jkun ikklassifikat ġewwa l-kodiċi NM ex29321300 (Kodiċi TARIC 2932130090), li joriġina fir-Repubblika tal-Poplu taċ-Ċina.

2. Ir-rata tad-dazju definittiv kontra d-dumping li hija applikabbli għall-prodott li joriġina fir-Repubblika tal-Poplu taċ-Ċina għandha tkun kif ġejja:

Kumpanniji | Rata ta' dazju kontra d-dumping (EUR/tunnellata metrika) | Kodiċi addizjonali TARIC |

Gaoping Chemical Industry Co. Ltd | 160 | A442 |

Linzi Organic Chemical Inc. | 84 | A440 |

Zhucheng Huaxiang Chemical Co. Ltd | 97 | A441 |

Henan Huilong Chemical Industry Co. Ltd | 156 | A484 |

Il-kumpanniji l-oħra kollha | 250 | A999 |

3. L-applikazzjoni tar-rati tad-dazju individwali speċifikati għall-erba' kumpanniji msemmija fil-paragrafu 2 għandha tkun kondizzjonali għall-presentazzjoni lill-awtoritajiet tad-dwana ta' l-Istati Membri ta' fattura kummerċjali valida, li għandha tikkonforma mal-ħtiġijiet imniżżla fl-Anness. Jekk l-ebda fattura bħal din ma tkun ippreżentata, ir-rata tad-dazju applikabbli lill-kumpanniji l-oħra kollha għandha tapplika.

4. F'każijiet fejn il-merkanzija soffriet danni qabel ma daħlet fiċ-ċirkolazzjoni ħielsa u, għalhekk, il-prezz li attwalment tħallas jew li għandu jitħallas huwa mqassam għad-determinazzjoni tal-valur doganali skond l-Artikolu 145tar-Regolament tal-Kummissjoni (KEE) Nru 2454/93 tat-2 ta' Lulju 1993 illi jniżżel id-dispoposizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komuni [5] l-ammont ta' dazju kontra d-dumping, ikkalkolat fuq il-bażi tal-paragrafu 2 t'hawn fuq, għandu jkun imnaqqas b'persentaġġ li jikkorespondi mat-tqassim tal-prezz li attwalment tħallas jew li għandu jitħallas.

5. Sakemm mhux speċifikat mod ieħor, id-dispożizzjonijiet fis-seħħ dwar id-dazji tad-dwana għandhom japplikaw.

Artikolu 2

L-ammonti żgurati permezz tad-dazji proviżorji kontra d-dumping skond id-dispożizzjonijiet tar-Regolament proviżorju fuq importazzjoni ta' l-AF li bħalissa tista' tkun ikklassifikata ġewwa il-kodiċi NM ex29321300 (kodiċi TARIC 2932130090), li joriġinaw fir-Repubblika tal-Poplu taċ-¬ina għandhom jiġu miġbura definittivament kif ġej.

L-ammonti żgurati li huma aktar mir-rata definittiva tad-dazji kontra d-dumping għandhom jiġu rilaxxati. Fejn id-dazji definittivi huma ogħla mid-dazji proviżorji, l-ammonti żgurati fil-livell ta' dazji proviżorji biss għandhom ikunu definittivament miġbura.

Artikolu 3

Dan ir-Regolament għandu jidħol fis-seħħ l-għada ta' meta ssir il-pubblikazzjoni fil-Ġurnal Uffiċjali ta' l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmula fil-Lussemburgu, is-27 t'Ottubru 2003.

F'isem il-Kunsill

Il-President

A. Matteoli

[1] ĠU L 56, 06.03.96, p. 1. Ir-Regolament kif l-aħħar emendat mir-Regolament (KE) Nru 1972/2002 (ĠU L 305, 07.11.02, p. 1).

[2] ĠU L 114, 08.05.03, p. 16.

[3] Sentenza tal-Qorti ta' Prim' Istanza tat-28 t'Ottubru 1999 fil-Każ T-210/95.

[4] ĠU L 328, 22.12.99, p. 1.

[5] ĠU L 253, tal-11.10.1993, p. 1. Ir-Regolament kif l-aħħar emendat mir-Regolament tal-Kummissjoni (KE) Nru 1335/2003 (ĠU L 187, tas-26.7.2003, p. 16).

--------------------------------------------------

L-ANNESS

Il-fattura kummerċjali valida msemmija fl-Artikolu 1(3) ta' dan ir-Regolament għandha tinkludi dikjarazzjoni iffirmata minn uffiċjal tal-kumpannija, fil-format li ġej:

1. L-isem u l-funzjoni ta' l-uffiċjal tal-kumpannija li ħarġet il-fattura kummerċjali.

2. Id-dikjarazzjoni li ġejja:

"Jien, hawn taħt iffirmat, niċċertifika li il-(volum) t'alkoħol furfuriliku li bħalissa jista' jkun ikklassifikat ġewwa l-kodiċi NM ex29321300 (kodiċi TARIC 2932130090) mibjugħ għall-esportazzjoni lill-Komunità Ewropea kopert minn din il-fattura kien fabbrikat minn (isem u indirizz tal-kumpannija) fir-Repubblika tal-Poplu taċ-Ċina; jien niddikjara li l-informazzjoni provduta f'din il-fattura hija kompluta u korretta."

3. Data u firma

--------------------------------------------------