IL-KUMMISSJONI EWROPEA

Brussell, 2.12.2015

COM(2015) 624 final

KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL

L-Implimentazzjoni tal-Aġenda Ewropea dwar is-Sigurtà:
pjan ta' azzjoni tal-UE kontra t-traffikar u l-użu illeċitu tal-armi tan-nar u l-isplussivi.

1.INTRODUZZJONI

L-Aġenda Ewropea dwar is-Sigurtà, adottata mill-Kummissjoni fit-28 ta’ April 2015 1 identifikat il-ħtieġa li jissaħħaħ il-qafas legali dwar l-armi tan-nar u l-ġlieda kontra t-traffikar illeċitu. Enfasizzat ukoll il-ħtieġa li jiġi ristrett l-aċċess għal u l-użu ta’ sustanzi perikolużi bħal splussivi minn netwerks terroristiċi.

Sabiex jibni fuq l-Aġenda Ewropea dwar is-Sigurtà, fit-8 ta’ Ottubru 2015, il-Kunsill stieden lill-Istati Membri, il-Kummissjoni, l-Europol u l-Interpol biex jissaħħaħ l-użu ta’ mezzi tal-ġlieda kontra t-traffikar tal-armi tan-nar 2 .

It-traffikar illeċitu ta’ armi tan-nar huwa parti min-negozju ewlieni ta’ gruppi ta’ kriminalità organizzata. Flimkien ma’ forom oħra ta’ traffikar, bħad-drogi, huwa sors ewlieni ta’ dħul. L-armi tan-nar jissupplimentaw forom oħra ta’ kriminalità u huma użati għal intimidazzjoni, koerċizzjoni u vjolenza bejn gruppi kriminali. Lil hinn minn kriminalità organizzata, l-attakki terroristiċi orribbli li seħħew is-sena li għaddiet urew li huwa imperattiv li jinqata' l-aċċess għal armi tan-nar u splussivi. L-attakki f’Pariġi u f’Copenhagen, kif ukoll l-attentat ta’ attakk fuq ferrovija Thalys, enfasizzaw il-fatt li n-netwerks terroristiċi għandhom aċċess għal armi u splussivi permezz ta’ netwerks tal-kriminalità organizzata u s-suq iswed.

F’dan il-kuntest, huwa kruċjali li l-UE, u partikolarment l-Istati Membri, jirduppjaw l-isforzi tagħhom biex jindirizzaw it-theddida serja li t-traffikar illeċitu ta’ armi u l-użu ta’ splussivi jippreżentaw għas-sigurtà interna tal-Unjoni.

Fit-18 ta’ Novembru 2015, il-Kummissjoni adottat pakkett ta’ miżuri leġiżlattivi biex issaħħaħ il-kontroll tal-armi tan-nar fl-Unjoni Ewropea 3 . Il-pass li jmiss għandu jkun li tittejjeb il-kooperazzjoni operattiva fil-livell tal-UE fost l-Istati Membri u ma’ pajjiżi terzi.

Din il-Komunikazzjoni tistabbilixxi azzjonijiet speċifiċi meħtieġa biex tiġi implimentata l-Aġenda Ewropea dwar is-Sigurtà fil-qasam tat-traffikar ta’ armi tan-nar u splussivi, filwaqt li tibni wkoll fuq il-Pjan ta’ Azzjoni Operattiva 2016 4 skont iċ-Ċiklu ta’ Politika tal-UE 5 .

2.restrizzjoni tal-aċċess għal armi tan-nar u splussivi illegali

Minkejja l-leġiżlazzjoni eżistenti fil-livell tal-UE, armi tan-nar, splussivi u prekursuri ta' splussivi 6 għadhom disponibbli wisq faċilment. L-aċċess permezz ta’ mezzi illegali ġie kkumplikat bid-disponibbiltà tal-armi fuq l-internet. Approċċ komprensiv biex jappoġġa ripressjoni fuq it-traffikar illeċitu u l-użu ta’ armi tan-nar u splussivi, filwaqt li jkun salvagwardat il-kummerċ legali tal-armi tan-nar u ta’ użu leġittimu ta’ sustanzi kimiċi, huwa meħtieġ.

Il-bini ta’ stampa ta’ intelligence aħjar

Sabiex jittejjeb u jitħaffef ir-rispons effettiv tal-forzi tal-ordni għal dan it-theddid, huwa essenzjali li tinbena stampa ta’ intelligence aħjar dwar it-traffikar ta’ armi u l-użu ta’ splussivi, u dwar id-devjazzjoni mis-swieq legali eżistenti, u biex jittejbu għodod statistiċi u analitiċi fil-livell tal-UE u dak nazzjonali.

Għal dan l-għan, il-partijiet interessati rilevanti kollha għandhom jieħdu l-passi ulterjuri li ġejjin:

1    Il-Kummissjoni tistieden lill-Istati Membri kollha biex jistabbilixxu punti fokali nazzjonali interkonnessi dwar l-armi tan-nar biex jiġi żviluppat għarfien espert u jitjiebu l-analiżi u r-rappurtar strateġiku dwar it-traffikar illeċitu ta’ armi tan-nar b’mod partikolari permezz tal-użu kombinat ta' intelligence kemm ballistiku kif ukoll kriminali 7 .

2.    Hekk kif ċrieki ta’ traffikar jespandu lil hinn mill-Ewropa, il-Kummissjoni se taħdem mal-Uffiċċju tan-Nazzjonijiet Uniti dwar id-Drogi u l-Kriminalità (UNODC), strumentali fl-iżvilupp ta’ ġbir tad-dejta armonizzat internazzjonalment, biex regolarment jiġu identifikati rotot globali tat-traffikar tal-armi tan-nar lejn l-UE u tagħmilha disponibbli għall-awtoritajiet tal-infurzar tal-liġi tal-Istati Membri kollha.

3    B'konformità mal-Pjan ta' Azzjoni Operattiv 2016, il-Europol għandha tirrinforza l-azzjonijiet tagħha dwar traffikar online 8 u d-devjazzjoni tal-kummerċ legali, kif ukoll tagħmel użu mill-Unità tal-Indikazzjoni ta' Kontenut fuq l-Internet 9 (IRU) tagħha biex possibbilment tissorvelja sorsi illeċiti ta' armi tan-nar, splussivi u prekursuri ta' splussivi.

4.    Il-Europol qiegħda tibni fuq valutazzjonijiet mill-partijiet interessati 10 , billi se tkompli ttejjeb il-kollezzjoni ta' informazzjoni u intelligence dwar l-armi tan-nar, inkluż it-traffikar, armi tan-nar maqbud u misruqa u modi operanda biex jiġu prodotti prodotti ta' għarfien/Notifiki ta' Twissija Bikrija u valutazzjoni ta' theddid aġġornata li tkopri fieri kummerċjali inter alia tal-armi tan-nar 11  u kumpaniji ta' kunsinna fil-pront fl-UE. L-Europol se tagħmel dawn id-dokumenti disponibbli lill-awtoritajiet nazzjonali tal-infurzar tal-liġi tal-Istati Membri kollha.

5.    Il-Kummissjoni ser tkompli tipprovdi assistenza finanzjarja, b’enfasi fuq proġetti b’kamp ta’ applikazzjoni komprensiv u b'impatt b’saħħtu tal-ġbir tad-dejta 12 .

It-tħejjija għal theddid u riskji ġodda

In-netwerks tal-kriminalità organizzata u terroristi huma magħrufa li jevolvu b’mod rapidu, u li jagħmlu l-akbar użu minn innovazzjoni teknoloġika 13 . Il-Kummissjoni għalhekk ser tinvolvi lill-industriji kimiċi u tal-armi tan-nar, l-aġenziji tal-infurzar tal-liġi nazzjonali rilevanti u lill-Europol biex tevalwa l-impatt ta’ avvanzi teknoloġiċi fuq id-disponibbiltà potenzjali ta’ armi tan-nar u splussivi, u biex tevalwa lakuni possibbli tas-sigurtà.

Fl-istess ħin, il-kapaċità ta' reazzjoni rapida għal theddid ġdid għandha tiġi msaħħa (eż. stampar 3D). Fil-fruntiera esterna tal-UE, l-awtoritajiet doganali - f’kooperazzjoni ma’ awtoritajiet oħra tal-infurzar tal-liġi u abbażi ta' informazzjoni miġbura mill-Europol u sistemi oħra ta’ analiżi ta' dejta - se jirfinaw il-kriterji ta’ riskju komuni doganali attwali biex jittejjeb l-immirar lejn traffiku illegali ta’ armi u armi tan-nar.

It-tisħiħ tas-sigurtà tal-isplussivi

Il-Pjan ta’ Azzjoni attwali tal-UE dwar it-Tisħiħ tas-Sigurtà tal-Isplussivi 14 ġie adottat mill-UE fl-2008 15 . Il-biċċa l-kbira tal-azzjonijiet ġew implimentati permezz tal-isforzi konġunti tal-Kummissjoni, tal-Istati Membri tal-UE, l-Europol, istituzzjonijiet ta’ riċerka u s-settur privat. Sar progress sostanzjali u l-Istati Membri b’mod partikolari enfasizzaw il-valur miżjud ta’ azzjonijiet biex jitjiebu l-iskambju ta’ informazzjoni u l-kondiviżjoni ta’ prattika tajba, biex jiġu żviluppati standards u proċeduri armonizzati, u biex jappoġġjaw riċerka u taħriġ relatati mal-isplussivi.

Kisba ewlenija tal-Pjan ta’ Azzjoni hija l-adozzjoni tar-Regolament UE 98/2013 dwar it-tqegħid fis-suq u l-użu ta’ prekursuri ta' splussivi 16 . Ir-Regolament, li daħal fis-seħħ fit-2 ta’ Settembru 2014, jista' jipprevjeni atti ta’ terroriżmu billi jnaqqas l-aċċess għall-ingredjenti li jkunu meħtieġa biex isiru l-bombi, u billi jippermetti l-investigazzjonijiet bikrija tal-pulizija dwar tranżazzjonijiet suspettużi u inċidenti oħra. Għalhekk hija prijorità urġenti li tiġi żgurata l-implimentazzjoni sħiħa tiegħu mill-Istati Membri u li ssaħħaħ il-kontrolli fuq il-prekursuri hekk kif jevolvu t-theddidiet. Dan se jsir permezz tal-azzjonijiet ewlenin li ġejjin:

1.Il-Kummissjoni se tippromwovi miżuri armonizzati madwar l-UE, u prattiki bħal: a) l-iskambju transfruntieri ta’ informazzjoni bejn punti ta’ kuntatt nazzjonali biex jiġi żgurat li l-infurzar tal-liġi tal-Istati Membri kollha ikkonċernati jkunu konxji ta’ inċidenti suspettużi, bl-użu ta’ pjattaforma eżistenti tal-Europol, bħalma huma s-Sistema Ewropea tad-Dejta dwar il-Bombi (EBDS) u b) monitoraġġ wiesa' u sistematiku mill-awtoritajiet tal-infurzar tal-liġi tal-bejgħ ta’ prekursuri fuq l-Internet, kif ukoll passi biex jirrestrinġu aktar l-aċċess għalihom.

2.Il-Kummissjoni se tiżviluppa aktar ukoll l-involviment tagħha fil-katina tal-provvista ta’ prekursuri 17 billi tipproduċi u tippromwovi materjal ta’ gwida li joffri pariri dwar prattiki tajbin għall-industrija kimika, fis-settur tal-bejgħ bl-imnut, u setturi rilevanti oħrajn.

3.Il-Kummissjoni se taċċellera l-ħidma sabiex tippreżenta r-reviżjoni tar-Regolament fl-2016 u tikkunsidra l-ħtieġa għal aktar miżuri aktar stretti, fosthom l-inklużjoni ta’ sustanzi ta’ theddid ġodda; estenzjoni tal-ambitu biex ikopri l-utenti professjonali; ħtieġa ta' dikjarazzjoni tal-utent aħħari għal tranżazzjonijiet u reġistrazzjoni ta’ manifatturi, bejjiegħa bl-imnut u importaturi; restrizzjoni u kontroll ta' esportazzjonijiet; żieda ta' restrizzjonijiet fuq il-bejgħ online u cash registers self-checkout; u stabbiliment ta' rwol għall-awtoritajiet doganali 18 .

Skrutinju xieraq tal-persunal huwa essenzjali biex jiġu evitati d-devjazzjoni, l-użu ħażin, jew l-aċċess illeċitu għal sustanzi kimiċi perikolużi 19 . Madwar l-Istati Membri tal-UE, ma hemm l-ebda sett komuni ta' standards ta’ kontroll minimu u ta' proċeduri għar-reklutaġġ u ta' taħriġ ta’ persunal involut fil-katina tal-provvista ta’ splussivi u f’setturi sensittivi oħra 20 u l-Kummissjoni se tikkunsidra jekk azzjoni tal-UE hix meħtieġa.

Azzjonijiet speċifiċi: Titjib tal-għodod ta’ statistika u analiżi eżistenti u l-iżvilupp tal-valutazzjoni fil-livell nazzjonali dwar il-movimenti ta’ armi tan-nar u d-disponibbiltà tagħhom, u tingħata prijorità tal-iskambju fil-livell tal-UE; Produzzjoni mill-Europol ta' prodotti analitiċi madwar l-UE u minħabba r-rabtiet qawwija mat-terroriżmu, it-tisħiħ tal-irwol ta’ monitoraġġ tal-IRU tal-UE; Immappjar mill-UNODC ta' rotot globali tat-traffikar tal-armi tan-nar lejn l-UE; Involviment ma' sħab biex jittejjeb l-għarfien dwar it-traffikar illeċitu ta’ armi tan-nar li tkopri inter alia t-traffikar online u d-devjazzjoni tal-kummerċ legali; Titjib tal-aċċess għall-prodotti analitiċi kollha nazzjonali u madwar l-UE kollha mill-awtoritajiet ta’ infurzar tal-liġi tal-Istati Membri kollha; Kontinwazzjoni ta' assistenza finanzjarja, b’enfasi fuq proġetti b’ kamp ta’ applikazzjoni komprensiv u b'impatt b’ saħħtu tal-ġbir tad-dejta Valutazzjoni ta' riskji li jirriżultaw mill-innovazzjoni teknoloġika, bħall-istampar 3D; Tisħiħ tas-sigurtà tal-isplussivi, billi jiġi implimentat b’mod sħiħ ir-Regolament dwar il-Prekursuri ta' Splussivi u tinġieb ‘il quddiem għall-2016 ir-reviżjoni tar-Regolament tal-Pekursuri; Valutazzjoni tal-ħtieġa għal standards u proċeduri ta’ evalwazzjoni armonizzati fil-livell tal-UE.

3.TITJIB TAL-KOOPERAZZJONI OPERATTIVA

L-Aġenda Ewropea dwar is-Sigurtà enfasizzat il-ħtieġa urġenti li ssaħħaħ il-kooperazzjoni operattiva fost l-awtoritajiet rilevanti tal-Istati Membri. Huwa essenzjali li tintuża l-esperjenza disponibbli u li jiġi pprovdut taħriġ xieraq għall-forzi tal-ordni u aġenziji rilevanti oħrajn u esperti fl-Istati Membri tal-UE. Forzi tal-ordni u netwerks ta’ esperti għandhom jintużaw sal-potenzjal sħiħ tagħhom f’dan il-kuntest 21 .

Iż-żieda ta' kooperazzjoni operattiva transfruntieri

Il-Pjan ta’ Azzjoni Operattiva (OAP) dwar l-armi tan-nar 22 diġà jinkludi l-parti l-kbira ta’ dawn l-azzjonijiet. Dawn jikkonċernaw, inter alia, jiem għal azzjoni konġunta, u operazzjonijiet abbażi ta' intelligence kontra t-traffikanti u faċilitaturi ewlenin (pereżempju setturi tan-negozju legali jew kumpaniji ta’ konsenja espressa). Kooperazzjoni ġudizzjarja bejn l-awtoritajiet nazzjonali hija strumentali wkoll fil-ġlieda kontra t-traffikar illeċitu ta’ armi tan-nar. L-Eurojust kienet involuta f’diversi każijiet sinifikanti matul dawn l-aħħar snin, b’mod partikolari f’rabta ma’ reati oħra bħat-traffikar tad-drogi.

Tfixkil tal-provvista tal-armi tan-nar illeċiti permezz tal-Internet (miftuħ u darkweb)

Il-kapaċità ta’ ċrieki tal-kriminalità organizzata u terroristi li jiksbu armi tan-nar, partijiet jew komponenti fuq l-Internet, jekk mhux fuq l-Internet “miftuħ” jew fuq id-“darkweb” hija vulnerabbiltà li teħtieġ li tiġi indirizzata b’mod urġenti. L-azzjonijiet li ġejjin għandhom jiġu segwiti:

1.Minbarra l-implimentazzjoni sħiħa tal-Pjan ta’ Azzjoni Operattiva dwar l-armi tan-nar, il-Kummissjoni tappella lill-Istati Membri biex iwaqqfu timijiet ta' għassa ċibernetika jew jiffokaw l-attivitajiet ta’ dawk eżistenti fuq id-detezzjoni ta’ traffikar ta’ armi tan-nar, partijiet jew komponenti, u splussivi fuq l-Internet.

2.Il-Europol qiegħda tibni fuq il-lezzjonijiet li tgħallmet mill-Operazzjoni Onymous 23 u Darkode 24 , billi se tappoġġja operazzjonijiet u investigazzjonijiet tal-Istati Membri billi tipprovdilhom analiżi operattiva, koordinazzjoni u għarfien espert, b'mod partikulari permezz ta' kapaċitajiet ta' appoġġ forensiku diġitali u l-użu sħiħ tat-Taskforce ta' Azzjoni kontra ċ-Ċiberkriminalità (J-CAT) 25  

3.L-Europol ser tiżviluppa wkoll sett ta’ għodod għal investigazzjonijiet online, b’mod partikolari b’kooperazzjoni mal-Bureau tal-Istati Uniti dwar Alkoħol, Tabakk, Armi tan-nar u Splussivi.

4.Billi l-biċċa l-kbira tal-infrastruttura tal-Internet hija proprjetà ta’ u mħaddma mis-settur privat, il-Kummissjoni se tinkludi l-prevenzjoni u d-detezzjoni ta’ traffikar illeċitu ta’ armi tan-nar, partijiet jew komponenti u splussivi fis-sħubijiet attwali tagħha mas-settur privat 26 .

It-tisħiħ tal-kontroll tal-movimenti intra-UE

Is-Sistema ta’ Kontroll u Protezzjoni tal-Isplussivi (SCEPYLT) 27 tippermetti l-approvazzjoni elettronika ta’ trasferimenti intra-UE ta’ splussivi, li tgħaġġel u tħaffef il-kontrol tal-moviment ta' splussivi madwar l-Ewropa. Fil-ġejjieni, tista’ tintuża wkoll bħala għodda ta’ traċċabiltà li tappoġġja sforzi ta' identifikazzjoni u traċċar.

Sabiex jitjieb il-kontroll tal-isplussivi, il-Kummissjoni se tinkoraġġixxi lill-Istati Membri kollha biex jużaw u jikkollegaw bis-sħiħ ma' din is-sistema.

Skont il-proposta għar-reviżjoni tad-Direttiva tal-Armi tan-Nar adottata fit-18 ta’ Novembru 2015 28 , il-Kummissjoni se tevalwa l-modalitajiet għal sistema għall-iskambju ta’ informazzjoni dwar movimenti intra-UE ta’ armi tan-nar billi jiġu kkunsidrati sistemi ta’ informazzjoni u strumenti eżistenti rilevanti tal-UE. Din is-sistema għandha tiżgura rabta bejn l-Istati Membri li jdaħħlu u dawk li jirċievu sabiex it-trasferimenti interni jsiru aktar siguri u tittejjeb it-traċċabbiltà tal-armi u l-munizzjon.

Sabiex issaħħaħ it-traċċabilità ta’ movimenti ta’ armi tan-nar legali fi ħdan Stat Membru u madwar l-Istati Membri, il-Kummissjoni se tesplora l-possibbiltà li tipprojbixxi ħlasijiet bi flus kontanti fil-kuntest ta’ bejgħ jew l-akkwist ta’ armi tan-nar u munizzjon minn individwi.

Kontrolli msaħħa fil-fruntieri esterni

Għalkemm is-sorsi illeċiti tat-traffikar ta' armi tan-nar u splussivi huma diversi, il-kontrolli fil-fruntieri esterni u kooperazzjoni tal-pulizija u tad-dwana jibqgħu tal-akbar importanza.

Il-Kummissjoni ssejjaħ lill-Istati Membri biex iwettqu kontrolli abbażi ta' riskju fuq oġġetti fil-fruntiera esterna kemm jekk jaslu permezz ta' traffiku kummerċjali (eż. kontejners), fi trasport tal-passiġġieri (pereżempju: karozzi) jew f’bagalji tal-passiġġieri. Għal dan l-għan, il-Kummissjoni tipproponi li tistabbilixxi Azzjoni ta’ Kontroll Doganali ta' Prijorità mal-Istati Membri dwar it-traffikar illeċitu ta’ armi tan-nar u - sa fejn huwa possibbli - splussivi, fil-fruntieri esterni. L-implimentazzjoni ta’ azzjonijiet kollha relatati mas-sigurtà previsti fl-Istrateġija ta' Ġestjoni ta' Riskju Doganali u l-pjan ta’ azzjoni se jiġu aċċellerati mill-Kummissjoni u l-Istati Membri għandhom imexxu ‘l quddiem l-isforzi tagħhom kif xieraq. 29  

It-traċċar tal-armi tan-nar użati minn kriminali u terroristi

It-traċċar tal-armi tan-nar huwa parti essenzjali mill-investigazzjoni ta’ reati relatati mal-armi tan-nar u aktar tagħlim dwar il-mezzi għal armi tan-nar illeċiti. Huwa wkoll kruċjali li jiġi mfixkel b'suċċess l-aċċess għal splussivi u prekursuri għall-isplussivi. Il-possibbiltà li jiġi traċċat munizzjon, li bħalissa huwa limitat, tkun ta’ għajnuna wkoll għal investigazzjonijiet.

Ir-reviżjoni tad-Direttiva tal-Armi tan-Nar proposta mill-Kummissjoni tipprevedi regoli komuni dwar l-immarkar tal-armi tan-nar sabiex titjieb it-traċċabbiltà tal-Armi tan-Nar miżmuma legalment jew importati.

Barra minn hekk, il-Kummissjoni se tkompli tappoġġa bis-sħiħ l-attivitajiet 30 tal-Grupp Ewropew ta’ Esperti tal-Armi tan-Nar biex jiġi żviluppat manwal għall-insegwiment u t-traċċar ta’ armi tan-nar illegali. Biex jitkompla fuq il-bażi tal-Istrument Internazzjonali dwar it-Traċċar u tal-aħjar prattiki internazzjonali żviluppati mill-Istandards Internazzjonali tal-Kontroll tal-Armi Żgħar tan-Nazzjonijiet Uniti (ISACS) 31 , dan il-manwal se jiġi disseminat fost l-awtoritajiet tal-infurzar tal-liġi tal-Istati Membri kollha. Il-gwida u r-regoli ta' traċċar jistgħu jinkludu rekwiżit biex jiġu ġġenerati rapporti lill-Europol sabiex jiffaċilitaw talbiet ta’ traċċar.

It-tisħiħ tat-taħriġ

It-taħriġ huwa ċentrali biex jogħla l-livell ta’ għarfien espert, u b’hekk titjieb il-kooperazzjoni fl-UE. Kontrolli effikaċi u konsistenti fil-fruntiera esterna jeħtieġu wkoll l-iskambju prattiku tal-aqwa prassi, għarfien u informazzjoni. Is-CEPOL 32 se twettaq l-attivitajiet tagħha f’dan il-qasam u twettaq “analiżi tal-lakuni” sabiex jiġu identifikati l-ħtiġijiet attwali ta’ taħriġ. Dan l-eżerċizzju jista’ jwassal għall-iżvilupp ta’ kurrikuli komuni dwar l-armi tan-nar u splussivi għal esperti mill-Istati Membri kollha, f’kooperazzjoni man-Netwerk Ewropew għat-Tneħħija ta' Tagħmir Splussiv (EEODN) 33 . Is-CEPOL se tikkunsidra wkoll tiżviluppa skemi ta’ taħriġ ma’ esperti ta' pajjiżi terzi tal-armi tan-nar. 

Żvilupp ta’ għodod ta’ detezzjoni innovattivi

Il-Komunikazzjoni tal-Kummissjoni tal-2014 dwar id-Detezzjoni 34 enfasizzat li strateġija effikaċi ta' detezzjoni ta' theddid tista’ tinkiseb biss jekk is-sustanzi u l-ambjent ta' theddida (avjazzjoni, żoni pubbliċi, avvenimenti sportivi, żoni ta' trasport urban, eċċ.) jitqiesu b’mod xieraq. Filwaqt li l-avjazzjoni ċivili għandha standards speċifiċi għal proċessi u teknoloġiji ta’ detezzjoni, dan ma kienx il-każ f’żoni pubbliċi oħra (avvenimenti sportivi, mezzi oħra ta’ trasport u infrastruttura kritika). Jeħtieġ li jsiru iktar sforzi kemm fl-użu ta' teknoloġija ta' detezzjoni u lejn l-istandardizzazzjoni tal-użu tagħha. Fl-2012, il-Kummissjoni bdiet programm bi provi ta' detezzjoni f’ambjenti operattivi differenti (ajruporti, infrastruttura kritika, bini pubbliku, u avvenimenti – bħall-EURO 2012 fil-Polonja) 35 .

Abbażi ta’ dan l-attivitajiet ta’ hawn fuq, il-Kummissjoni se tivvaluta l-fattibilità tat-twaqqif ta’ grupp ta’ detezzjoni tal-UE magħmul minn esperti tal-Kummissjoni u tal-Istati Membri, li jistabbilixxi programm ta’ appoġġ u ta’ bini ta’ kapaċità fil-qasam tad-detezzjoni tal-isplussivi u l-armi tan-nar. Tali grupp jista’ jiffoka inizjalment fuq l-offerta ta' appoġġ għall-forzi tal-ordni u servizzi rilevanti fl-Istati Membri u jespandi aktar hekk kif xieraq.

Azzjonijiet speċifiċi: Żieda tal-kooperazzjoni transfruntieri permezz ta’: oImplimentazzjoni sħiħa tal-Pjan ta’ Azzjoni Operattiva (OAP) dwar l-armi tan-nar; oAktar kooperazzjoni biex tfixkel il-provvista onlajn tal-armi tan-nar illeċiti (miftuħ u darkweb); oEvalwazzjoni tal-modalitajiet għal sistema għall-iskambju ta’ informazzjoni dwar movimenti intra-UE ta’ armi tan-nar li tikkunsidra sistemi ta’ informazzjoni u strumenti eżistenti tal-UE; oEsplorazzjoni tal-possibbiltà li jiġu pprojbiti ħlasijiet bi flus kontanti fil-kuntest ta’ bejgħ jew l-akkwist ta’ armi tan-nar u munizzjon minn individwi; oRinforz tal-kontrolli fil-fruntieri esterni billi jsiru kontrolli abbażi ta' riskju fuq oġġetti u permezz tal-istabbiliment ta' Azzjoni ta’ Kontroll Doganali ta' Prijorità. Tisħiħ tal-ittraċċar tal-armi tan-nar permezz tal-iżvilupp ta’ manwal għall-insegwiment u t-traċċar ta’ armi tan-nar illegali fil-qafas tal-Grupp ta’ Esperti Ewropej tal-Armi tan-Nar; Żvilupp ta’ kurrikula ta’ taħriġ komuni dwar l-armi tan-nar u splussivi; Żvilupp ta’ għodod ta’ detezzjoni innovattivi; Azzjonijiet operattivi konġunti li jinvolvu l-awtoritajiet rilevanti kollha tal-infurzar tal-liġi.

4.TITJIB tal-ġbir U L-KONDIVIŻJONI TA’ INFORMAZZJONI operattiva permezz tal-aħjar użu tal-għodod eżistenti

L-Aġenda Ewropea dwar is-Sigurtà enfasizzat il-ħtieġa urġenti li jsir użu sħiħ mill-għodod eżistenti li l-Unjoni tqiegħed għad-dispożizzjoni tal-Istati Membri biex jiġi ffaċilitat l-iskambju ta’ informazzjoni bejn l-awtoritajiet nazzjonali tal-infurzar tal-liġi. Lakuni kritiċi li fadal jistgħu jeħtieġu aktar għodod tal-UE, filwaqt li tiġi żgurata l-interoperabbiltà ta’ sistemi eżistenti.

L-eżistenza ta’ sistemi differenti ta’ skambju ta’ informazzjoni użati minn awtoritajiet differenti tal-infurzar tal-liġi għal skopijiet differenti, iżda kollha rilevanti għall-ġlieda kontra t-traffikar illeċitu ta’ armi tan-nar u splussivi, tenfasizza l-bżonn li tissaħħaħ l-interkonnettività teknika. Il-Kummissjoni se tivvaluta kif l-aħjar tiżgura l-kompatibbiltà effettiva tagħhom.

Biex tagħmel dan, il-Kummissjoni se tagħti attenzjoni partikolari lill-ħtieġa li tittejjeb il-kooperazzjoni tal-pulizija u d-dwana, filwaqt li tqis is-sistema ta’ skambju ta’ informazzjoni dwar movimenti intra-UE ta’ armi tan-nar li għandha tiġi żviluppata skont l-abbozz tad-Direttiva dwar l-Armi tan-Nar riveduta ppreżentata fit-18 ta’ Novembru 2015.

Żgurar tal-interoperabbiltà bejn iARMS/SIS II/UMF

Interoperabbiltà bejn is-Sistema ta’ Informazzjoni ta’ Schengen (SIS) 36 u iARMS tal-INTERPOL 37 tiffaċilita ħafna l-azzjoni ta’ infurzar tal-liġi, billi tagħmilha aktar effettiva.

Din l-interoperabbiltà fil-prattika diġa qed tieħu forma permezz ta’ azzjonijiet li għaddejjin bejn il-Kummissjoni u l-INTERPOL. L-INTERPOL aġġorna s-softwer “SIB” li tkopri wkoll armi tan-nar u talab lill-Istati Membri biex jivvolontarjaw għal proġett pilota li għandu jsir fl-ewwel nofs tal-2016 li simultanjament tfittex fil-bażijiet ta’ dejta nazzjonali, is-SIS u iARMS. Fl-aħħar nett, valuri ta' “tip ta’ arma tan-nar” jistgħu jiġu mfittxija fiż-żewġ sistemi u jkun jista’ jsir tqabbil bejn it-tabelli li jiddeskrivu l-għamla tal-armi tan-nar.

Il-Kummissjoni se tissokta l-kooperazzjoni mal-Europol 38 , l-Interpol u l-Istati Membri, bil-ħsieb li tiġi żgurata l-interoperabbiltà bejn iż-żewġ sistemi sa Lulju 2016. Għal dan l-għan, il-Kummissjoni tħeġġeġ lill-Istati Membri biex jipparteċipaw fil-proġett pilota.

Fl-istess ħin, l-aċċess minn awtoritajiet tal-infurzar tal-liġi nazzjonali kollha, l-awtoritajiet tal-fruntieri u tad-dwana, fi ħdan il-mandati rispettivi tagħhom, jista’ jtejjeb ħafna l-effiċjenza tal-ħidma operattiva fuq il-post. Il-possibbiltà li fl-istess ħin iddaħħal jew tfittex informazzjoni f’diversi bażijiet tad-dejta li fihom informazzjoni simili jew kumplimentari għandha tkompli tiġi sfruttata.

Tisħiħ tal-iskambju ta’ informazzjoni ballistika

Il-biċċa l-kbira tal-armi tan-nar għandhom karatteristiċi uniċi li jiddistingwuhom u anke jekk l-arma tan-nar ma tkunx tħalliet fix-xena tad-delitt, informazzjoni ewlenija tkun tista’ madankollu tiġi determinata minn balla, in-natura tal-ferita (jekk ikun hemm) u kwalunkwe residwu li jibqa’ madwarha.

Bħalissa ma hemm l-ebda sistema madwar l-UE għall-analiżi ta' dejta ballistika, u l-ebda repożitorju ċentrali li jintegra u jqabbel din l-analiżi. S’issa, żewġ sistemi differenti huma ġeneralment użati mill-Istati Membri tal-UE 39 . Taħt is-Seba' Programm Qafas, il-Kummissjoni appoġġat proġett (il-Pjattaforma Odyssey) bil-għan li tiġi indirizzata l-problema tal-analiżi tad-dejta kriminali u ballistika meħuda minn diversi sistemi ballistiċi madwar l-Ewropa 40 . Wara s-sejbiet tal-proġett Odyssey, il-Kummissjoni ser tiffaċilita l-iskambju ta’ informazzjoni ballistika permezz ta’ pjattaforma dedikata permezz tal-użu tan-Netwerk ta’ Informazzjoni Ballistika u sistemi oħra rilevanti użati fl-Istati Membri.

Użu estensiv ta’ iTRACE

Il-komunità internazzjonali attwalment nieqsa minn informazzjoni konkreta dwar meta, fejn u kif armi konvenzjonali prodotti legalment jidħlu fis-suq illeċitu u jkunu ddevjati għal atturi f’kunflitti armati jew għal utenti finali oħra illegali.

Għalhekk, l-UE qed tiffinanzja l-proġett “iTRACE” 41 . Abbażi ta’ dawn ir-riżultati pożittivi 42 , l-UE tappoġġa t-tieni fażi tal- programm iTRACE inkluża l-intensifikazzjoni ta’ investigazzjonijiet fuq il-post u t-twessiegħ tal-ambitu ġeografiku tal-għodda. Madankollu huwa ċar li l-progress jiddependi mir-risposta ta' Stati, inklużi l-Istati Membri kollha tal-UE, għal talbiet ta’ traċċar. Barra minn hekk, kwalunkwe detezzjoni minn kwalunkwe awtorità nazzjonali tal-infurzar tal-liġi għandha tiġi ċċekkjata skont din l-għodda. Għal dan l-għan, il-Kummissjoni se tikkunsidra, għall-Istati Membri tal-UE, il-ħtieġa ta’ regoli li jorbtu legalment f’dan il-qasam.

Il-Kummissjoni se tappoġġja kooperazzjoni mill-qrib bejn l-Europol, l-INTERPOL, l-atturi prinċipali ta' iTrace u korpi rilevanti oħra, bħall-awtoritajiet doganali u ta’ liċenzjar tal-importazzjoni u l-esportazzjoni tal-armi tan-nar, biex titjieb il-kooperazzjoni operattiva, it-traċċabilità u l-prevenzjoni ta’ armi tan-nar milli jiġu ddevjati lejn is-suq illeċitu.

Żvilupp ta’ Sistema ta’ Analiżi tal-Europol u l-iżgurar tal-użu sħiħ tal-Punt Fokali tal-Europol dwar l-armi tan-nar

Fl-2016, l-Europol għandha tibda tħaddem Pjattaforma ġdida għas-Sistema ta’ Analiżi tal-Europol (EAS), għodda analitika qawwija li tappoġġja l-analiżi operattiva u strateġika tad-dejta pprovduta mill-Istati Membri u minn partijiet terzi. Hija mfassla biex tkun waħda mis-sistemi tal-ipproċessar tal-informazzjoni prinċipali tal-Europol. Il-Kummissjoni se taħdem biex tiżgura l-implimentazzjoni rapida u komprensiva ta’ dan l-istrument billi tassisti lill-Istati Membri u tappoġġja sforzi kumplimentari sabiex ittejjeb monitoraġġ sistematiku ta’ armi tan-nar. Il-Kummissjoni se tikkunsidra l-ħtieġa ta’ regoli li jorbtu legalment f’dan il-qasam biex titjieb il-kapaċità tal-analiżi tal-Europol għall-appoġġ lill-awtoritajiet tal-infurzar tal-liġi tal-Istati Membri kollha.

Fuq talba tal-Kunsill fl-2014, l-Europol stabbilixxiet Punt Fokali dwar l-Armi tan-Nar. Huwa jipprovdi appoġġ operattiv u strateġiku lill-investigazzjonijiet li għaddejjin. 21 Stat Membru 43 u sitt pajjiżi terzi bħalissa huma assoċjati 44 ma’ dan il-Punt Fokali. Sa mill-bidu tiegħu, il-Punt Fokali dwar l-Armi tan-Nar irċieva 3,089 kontribuzzjoni b’madwar 625 każ investigattiv inkluża informazzjoni dwar 35,000 arma tan-nar, 28,700 persuna u kważi 3,216-il kumpanija suspettata. Din is-sena, il-Punt Fokali dwar l-Armi tan-Nar irċieva 1,750 kontribuzzjoni. Il-Kummissjoni tħeġġeġ lill-Istati Membri kollha biex jikkondividu informazzjoni b’mod proattiv u jipparteċipaw bis-sħiħ fl-azzjonijiet tal-Punt Fokali dwar l-Armi tan-Nar. 

Massimizzazzjoni tal-użu tas-Sistema Ewropea ta’ Dejta dwar il-Bombi (EBDS)

Fi ħdan il-Pjan ta’ Azzjoni tal-UE dwar l-Isplussivi, il-Kummissjoni ffinanzjat l-iżvilupp tas-Sistema Ewropea ta’ Dejta dwar il-Bombi (EBDS) li attwalment hija ġestita mill-Europol. L-EBDS tikkollega kważi l-Istati Membri kollha, kif ukoll in-Norveġja u l-Kummissjoni, u tista’ tintuża għall-iskambju ta’ dejta teknika dwar splussivi u materjal CBRN, kif ukoll inċidenti, xejriet u tagħmir.

Konnettività sħiħa minn utenti relevanti fl-Istati Membri għandha tkun żgurata u li aktar sforzi għandhom ikunu dedikati biex jiġu identifikati l-utenti potenzjali kollha rilevanti u biex jitħarrġu l-utenti tagħha. Barra minn hekk, il-Kummissjoni, flimkien mal-Europol, se tivvaluta jekk l-EBDS għandhiex tinkorpora informazzjoni tat-tip “twissija bikrija” 45 , kapaċitajiet ta’ detezzjoni, u jekk din is-sistema għandiex tintrabat ma’ bażijiet ta' dejta magħżula oħrajn Ewropej. Sabiex tikkumplimenta l-informazzjoni kondiviża permezz tal-EBDS, il-Kummissjoni ser tipproponi aġġornamenti regolari f'ambjent ikklassifikat għall-Istati Membri u l-Europol biex jikkondividu valutazzjonijiet speċjalizzati tat-theddid fir-rigward tal-isplussivi.

Azzjonijiet speċifiċi: Valutazzjoni tas-sistemi eżistenti ta’ skambju ta’ informazzjoni rilevanti għall-ġlieda kontra t-traffikar tal-armi tan-nar u l-isplussivi li tiżgura l-kompatibbiltà teknika tagħhom b’attenzjoni partikolari fuq il-ħtieġa li tissaħħaħ il-kooperazzjoni bejn il-pulizija u d-dwana u l-iżvilupp previst mill-abbozz tad-Direttiva dwar l-Armi tan-Nar; Żgurar tal-interoperabbiltà bejn sistemi ta’ informazzjoni eżistenti, inkluż l-iARMS/SIS II b’rabta ma’ UMF; Estensjoni tal-użu ta’ iTrace, is-Sistema Ewropea ta’ Data dwar il-Bombi (EBDS) u s-Sistema ta’ Analiżi tal-Europol filwaqt li jiġi żgurat l-użu sħiħ tal-Punt Fokali tagħha dwar l-armi tan-nar; Titjib tal-iskambju ta’ informazzjoni ballistika permezz ta’ pjattaforma apposta

5.KOOPERAZZJONI MSAĦĦA MA' PAJJIŻI TERZI

Kif stabbilit fil-Komunikazzjoni Konġunta tal-Kummissjoni Ewropea u r-Rappreżentant Għoli tal-Unjoni għall-Affarijiet Barranin u l-Politika ta’ Sigurtà dwar ir-Reviżjoni tal-Politika Ewropea tal-Viċinat 46 adottati fit-18 ta’ Novembru 2015, l-UE se żżid il-kooperazzjoni tagħha ma' pajjiżi ġirien dwar il-qasam ta’ sigurtà, inkluż dwar il-ġlieda kontra t-traffikar illeċitu tal-bnedmin, it-traffikar illeċitu ta’ Armi Ħfief u ta’ Kalibru Żgħir (SALW) u l-kooperazzjoni dwar id-droga.

It-traffikar illeċitu u l-użu ta’ armi tan-nar u splussivi għandhom jiġu integrati b’mod sistematiku fid-djalogi dwar is-sigurtà ma’ pajjiżi u organizzazzjonijiet sħab ewlenin. Dawn id-djalogi għandhom iwasslu wkoll, kull meta jkun rilevanti, għal pjanijiet ta’ azzjoni konġunti speċifiċi dwar l-armi tan-nar u fejn possibbli anke ta’ splussivi, inklużi l-aġenziji tal-UE bħall-Europol, l-Eurojust u s-CEPOL kif ukoll organizzazzjonijiet internazzjonali rilevanti bħalma huma n-Nazzjonijiet Uniti u l-INTERPOL. Assistenza finanzjarja mill-UE tista’ wkoll tiġi prevista f’ċerti każijiet (bħal armi tan-nar kkonfiskati/dekommissjonati), eż. skont l-Istrument li jikkontribwixxi għall-Istabbiltà u l-Paċi, programmi oħra ta’ assistenza mill-UE jew il-baġit tal-PESK.

Taħriġ u miżuri oħra ta’ appoġġ (inkluż l-għoti ta’ tagħmir u għodda rilevanti) biex jissaħħu l-kapaċitajiet tal-pajjiżi sħab u pajjiżi terzi rilevanti oħra kontra t-traffikar u l-użu illeċiti ta’ armi tan-nar u splussivi għandhom, kull meta jkun rilevanti, jiġu inklużi fil-programmi ta’ kooperazzjoni fil-livell globali, reġjonali jew dak bilaterali.

Tisħiħ ta' attivitajiet operattivi u twessiegħ tal-ambitu tal-Pjan ta’ Azzjoni tal-UE għall-Ewropa tax-Xlokk

L-UE u s-sħab tagħha fix-Xlokk tal-Ewropa għandhom interess komuni fit-tisħiħ tal-kooperazzjoni tagħhom kontra t-theddid tat-traffikar illeċitu ta’ armi u splussivi ta' grad militari 47 . 

Din il-kooperazzjoni ġiet żviluppata aktar permezz tal-adozzjoni ta’ Pjan ta’ Azzjoni dwar it-traffikar illeċitu ta’ armi tan-nar bejn l-UE u r-Reġjun tax-Xlokk tal-Ewropa għas-snin 2015-2019 48 .

L-attivitajiet skont il-Pjan ta’ Azzjoni jeħtieġ li jiġu intensifikati malajr sabiex ikompli jitnaqqas il-fluss illegali ta’ armi tan-nar lejn l-UE. L-Europol għandha taċċellera l-implimentazzjoni tal-Pjan ta' Azzjoni Operattiv 2016 taċ-Ċiklu ta' Politika. L-iktar permezz tal-istabbiliment ta' operazzjonijiet konġunti abbażi ta' intelligence, u kooperazzjoni mill-qrib bejn uffiċjali ta' kollegament fir-reġjun u n-Netwerk ta' Esperti dwar l-Armi tan-Nar.

Il-Kummissjoni se torganizza konferenza oħra fl-2016 flimkien mas-sħab tagħha fil-Balkani tal-Punent li tevalwa l-implimentazzjoni tal-Pjan ta’ Azzjoni u jiddiskutu l-passi futuri, inkluż il-proposta biex jiġi estiż dan il-Pjan ta’ Azzjoni għal splussivi illeċiti.

Il-pajjiżi tal-Balkani tal-Punent qed jimplimentaw strateġiji nazzjonali għall-ġlieda kontra t-traffikar ta’ armi u l-proliferazzjoni tal-armi ħfief u ta’ kalibru żgħir. Il-progress li qed isir f’dan il-qasam qed ikun issorveljat ukoll fil-kuntest tan-negozjati dwar l-adeżjoni fil-kapitolu 24 – Ġustizzja, Libertà u Sigurtà. 

Il-Kummissjoni qiegħda tibni fuq il-lezzjonijiet li tgħallmet minn inizjattivi simili 49 , fi sħubija ma’ sħab ewlenin, se tikkunsidra r-rilevanza ta’ skemi ta’ xiri lura ta’ armi tan-nar fir-reġjun.

Tisħiħ tal-kooperazzjoni ma’ pajjiżi fil-Lvant Nofsani u l-Afrika ta’ Fuq (MENA)

L-instabbiltà attwali fir-reġjun MENA, b’mod speċjali l-kunflitti fit-tul fil-Libja u s-Sirja, żied drastikament il-livell ta’ traffikar illeċitu ta’ armi tan-nar fir-reġjun. Dan jippreżenta theddida sinifikanti għas-sigurtà fit-tul tal-UE li jeħtiġilha tiġi indirizzata b’mod urġenti.

L-UE diġa bdiet djalogu biex tesplora l-kooperazzjoni possibbli fil-ġejjieni ma' pajjiżi MENA (wara kuntatti esploratorji u l-ewwel konferenza ma' pajjiżi MENA fuq livell tekniku fl-1 ta' Ottubru 2015) u se tfittex li ssaħħaħ il-kooperazzjoni UE-MENA fost l-aġenziji tal-infurzar tal-liġi rilevanti, tiżgura assistenza ta' bini ta' kapaċità fi programmi reġjonali u/jew bilaterali rilevanti 50 u tiżviluppa azzjonijiet operattivi skont qafas maqbul komunament.

Dan l-approċċ reġjonali jeħtieġ li jkun ikkumplimentat fil-livell bilaterali minn inklużjoni sistematika l-aspett tal-armi tan-nar u l-isplussivi fid-djalogi ta’ politika ma’ pajjiżi fil-qafas tal-Ftehimiet ta’ Assoċjazzjoni tal-Politika Ewropea tal-Viċinat u sottokumitati relatati dwar kwistjonijiet ta’ Ġustizzja u Affarijiet Interni u, fejn rilevanti, id-djalogi speċifiċi dwar il-ġlieda kontra t-terroriżmu (li diġà nbdew mat-Tuneżija jew dalwaqt mal-Libanu, il-Ġordan, l-Alġerija u l-Marokk). 

Il-firxa u t-traffikar illeċiti ta' armi konvenzjali fi jew mil-Libja jibqa' jżid in-nuqqas ta' sigurtà fir-reġjun, inkluż permezz tad-devjazzjoni ulterjuri ta' tagħmir splussiv improvizzat (IEDs) 51 jew MANPADS 52 . Skont rapporti, milizzji fil-Libja ħatfu wkoll armi kimiċi minn ħażniet maħżuna f'kundizzjonijiet ħżiena, li huma f’riskju li jispiċċaw f’idejn terroristi jew ta’ gruppi estremisti vjolenti.

Ladarba Gvern ta’ Kunsens Nazzjonali jiġi ffurmat, l-UE, bħala kwistjoni ta’ prijorità u f’koordinazzjoni ma’ sħab internazzjonali oħra rilevanti, se toffri programmi ta’ żvilupp ta’ kapaċità kontra t-terroriżmu lill-awtoritajiet Libjani. L-indirizzar tat-traffikar illeċitu ta’ armi tan-nar u l-użu ta' splussivi ser ikun komponent vitali ta’ tali pakkett.

Tisħiħ tal-kooperazzjoni mal-Ukrajna

Huwa fl-interess kemm tal-UE kif ukoll tal-Ukrajna li l-kooperazzjoni bejniethom tissaħħaħ kontra t-theddid komuni tat-traffikar illeċitu u l-użu ta’ armi tan-nar u splussivi. Fl-istess ħin, l-UE tista’ ssaħħaħ l-appoġġ tagħha għar-riforma tas-settur tas-sigurtà ċivili fl-Ukrajna, inkluż fil-qasam ta’ interess koperti minn din il-Komunikazzjoni.

Tisħiħ tal-kooperazzjoni mat-Turkija

Id-djalogu attwali bejn l-UE u t-Turkija dwar il-Ġlieda kontra t-terroriżmu għandha tiġi estiża għat-traffikar u l-użu illeċiti ta’ armi tan-nar u splussivi.

Tisħiħ tal-kooperazzjoni ma’ atturi reġjonali oħra u organizzazzjonijiet internazzjonali

Gruppi terroristiċi u kriminali jżidu mas-sitwazzjoni volatili tas-sigurtà fil-Libja, b’impatt fuq is-Saħel (eż. Mali) u s-sitwazzjoni tas-sigurtà tar-reġjun tal-Lag taċ-Ċad (b’mod partikolari n-Niġerja). Il-Kummissjoni, b’koordinazzjoni mas-SEAE, se tiżgura appoġġ rilevanti biex jiġu miġġielda dawn il-gruppi permezz ta’ assistenza relatata mas-sigurtà, possibbilment inkluża skont il-Fond Fiduċjarju ta' Emerġenza tal-Unjoni Ewropea stabbilit m'ilux għall-istabbiltà u l-indirizzar tal-kawżi prinċipali tal-migrazzjoni irregulari u l-persuni spostati f’pajjiżhom fl-Afrika.

Il-Kummissjoni se tassisti lil-Lega tal-Istati Għarab (LAS) 53 fl-iżvilupp ta’ sistema kompjuterizzata ta’ kontroll tat-trasferimenti ta’ armi u armamenti u se tesplora modi li bihom il-punti ta’ kuntatt tal-LAS dwar armi ħfief u ta' kalibru żgħir (SALW) jkunu jistgħu jaħdmu flimkien ma’ strutturi komparabbli tal-UE.

Abbażi ta' sforzi eżistenti tal-UE permezz tal-implimentazzjoni tal-Istrateġija tal-UE dwar Armi Ħfief u ta' Kalibru Żgħir (SALW) tal-2005 54 kif ukoll l-Istrateġija Ewropea għas-Sigurtà 55 , l-UE se tkompli tippromwovi r-ratifikazzjoni, it-traspożizzjoni u l-implimentazzjoni tal-konvenzjonijiet internazzjonali rilevanti, bħat-Trattat tal-Kummerċ fl-Armi, u l-protokoll tal-Armi tan-Nar tal-Konvenzjoni tan-Nazzjonijiet Uniti dwar Kriminalità Organizzata Transnazzjonali. Se jintużaw ukoll in-netwerks reġjonali tas-CBRN kif stabbilit fi tmien reġjuni skont l-Inizjattiva ta’ Mitigazzjoni tar-Riskju tal-UE.

KONKLUŻJONIJIET Il-Kummissjoni tistieden lill-Istati Membri u lill-partijiet interessati rilevanti l-oħra kollha biex jieħdu l-passi kollha meħtieġa biex jiżguraw l-implimentazzjoni rapida ta’ dan il-Pjan ta’ Azzjoni. Il-Kummissjoni se tirrapporta lill-Parlament Ewropew u lill-Kunsill dwar l-implimentazzjoni ta’ dan il-Pjan ta’ Azzjoni fi ħdan il-qafas tal-aġġornament kull sitt xhur dwar l-implimentazzjoni tal-Aġenda Ewropea dwar is-Sigurtà.

(1) http://ec.europa.eu/dgs/home-affairs/e-library/documents/basic-documents/docs/eu_agenda_on_security_en.pdf

(2)

http://www.consilium.europa.eu/mt/press/press-releases/2015/10/08-jha-fighting-trafficking-firearms/

(3) http://europa.eu/rapid/press-release_IP-15-6110_en.htm  

(4) Dokument ristrett.

(5)   http://www.consilium.europa.eu/mt/documents-publications/publications/2015/eu-policy-cycle-tackle-organized-crime/  

(6) Prekursuri ta' splussivi huma sustanzi jew taħlitiet kimiċi li jistgħu jintużaw fil-manifattura ta’ splussivi

(7) Din l-idea ġiet proposta mill-Istati Membri waqt is-Seminar tal-UE dwar l-użu tal-analiżi forensika biex titjieb l-analiżi strateġika u operattiva għal skopijiet operattivi u tattiċi. Birmingham – 11 ta’ Novembru 2015.

(8) Proġetti ta’ riċerka rilevanti dwar il-monitoraġġ tal-Internet diġà tnedew fil-kuntest tal-programm Orizzont 2020, http://ec.europa.eu/programmes/horizon2020/

(9) L-IRU tal-UE, imnedija fl-1 ta’ Lulju 2015 għall-ġlieda kontra l-propaganda terroristika u attivitajiet estremisti vjolenti relatati fuq l-Internet.

(10) Inkluż fil-livell nazzjonali, mis-settur privat u l-akkademja.

(11) Informazzjoni li toriġina minn operazzjonijiet ta’ infurzar tal-liġi tindika li l-vulnerabbiltà ta’ fieri kummerċjali tal-armi tan-nar għat-traffikar illeċitu ta’ armi tan-nar.

(12) http://ec.europa.eu/research/fp7/index_en.cfm Il-Kummissjoni diġà qed tiffinanzja, permezz tal-Fond għas-Sigurtà Interna (ISF), żewġ studji rilevanti jiġifieri l-proġett EFFECT u l-proġett FIRE li għandhom l-għan li jtejbu l-għarfien dwar it-traffikar illeċitu ta’ armi tan-nar u li jiffaċilitaw l-iżvilupp ta’ politiki abbażi ta' evidenza u azzjonijiet madwar l-Ewropa. Il-Kummissjoni tat ukoll madwar EUR 60 miljun għal 15-il proġett relatat ma' splussivi fl-ambitu tal-programm ta’ riċerka FP7 (), kif ukoll bosta proġetti fl-ambitu tal-programm tal-Prevenzjoni u l-ġlieda kontra l-kriminalità. Il-Kummissjoni se tiffinanzja aktar proġetti ta’ riċerka dwar is-sigurtà skont il-programm ta' soċjetajiet siguri ta' Orizzont 2020 u l-ISF.

(13) L-istampar 3D jista' jintuża għall-manifattura ta’ armi tan-nar u għall-produzzjoni ta' komponenti essenzjali biex jiġu riattivati armi tan-nar diżattivati. Armi mhux metalliċi, bħal dawk magħmulin mill-kevlar u ċ-ċeramika, jippreżentaw riskju potenzjali li jeħtieġu monitoraġġ mill-qrib

(14) Dokument tal-Kunsill Doc. 8109/08.

(15) Dan jinkludi 48 azzjoni mmirata biex, b’mod komprensiv, jiġi indirizzat għadd kbir ta’ aspetti marbuta mal-iżgurar tas-sigurtà tal-isplussivi, bħall-prekursuri, il-ħażna, it-trasport, it-traċċabbiltà, id-detezzjoni, ir-riċerka, l-iskambju transfruntieri tal-informazzjoni u l-koordinazzjoni bejn l-aġenziji.

(16) Dan ir-Regolament jirrestrinġi u jtejjeb il-kontroll fuq għadd ta’ sustanzi kimiċi perikolużi li huma prekursuri ta' splussivi u għalhekk jistgħu jiġu użati ħażin għall-manifattura ta’ splussivi magħmulin id-dar.

(17) L-operaturi, mill-manifatturi sal-bejjiegħa bl-imnut, għandhom l-obbligu li jirrappurtaw attività suspettuża lill-punti ta’ kuntatt nazzjonali f’kull Stat Membru. Huma fl-aħjar pożizzjoni sabiex jidentifikaw tranżazzjonijiet li jaqgħu barra mill-ambitu tal-attività normali f’kull settur u sabiex josservaw mġiba suspettuża.

(18)  Ir-reviżjoni se tiġi mwettqa f’konsultazzjoni mal-grupp ta' esperti tal-Kumitat Permanenti dwar il-Prekursuri, http://ec.europa.eu/transparency/regexpert/index.cfm?do=groupDetail.groupDetail&groupID=3245&Lang=MT

(19) Dan it-tħassib kien diġà stipulat fil-Komunikazzjoni tal-Kummissjoni tal-2014 dwar approċċ ġdid lejn id-detezzjoni u l-mitigazzjoni tar-riskji CBRN-E, COM(2014) 247 final.

(20) Dan kien diġà previst fil-Pjan ta’ Azzjoni tal-2008.

(21) Il-Kummissjoni ssimplifikat l-assistenza finanzjarja għal azzjonijiet operattivi. Skont il-Ftehim ta' Delega tal-Pjattaforma Multidixxiplinarja Ewropea kontra t-Theddidiet Kriminali (EMPACT), EUR 7 miljun ġew trasferiti lill-Europol li minnhom madwar EUR 350 000 kienu intiżi sabiex jiżguraw l-implimentazzjoni tal-Pjan ta’ Azzjoni Operattiva (OAP) dwar l-armi tan-nar fir-rebbiegħa tal-2015. Finanzjament privileġġjat fl-OAP dwar l-armi tan-nar ser jiġi provdut mill-Europol fl-2016

(22) Dokument ristrett.

(23) https://www.europol.europa.eu/content/global-action-against-dark-markets-tor-network

(24)   https://www.europol.europa.eu/content/cybercriminal-darkode-forum-taken-down-through-global-action

(25) It-Taskforce ta' Azzjoni Konġunta kontra ċ-Ċiberkriminalità huwa ospitat f’Ċentru Ewropew taċ-Ċiberkriminalità (EC 3) fl-Europol. Tnieda fl-1 ta’ Settembru 2014 biex ikompli jsaħħaħ il-ġlieda kontra ċ-ċiberkriminalità fl-Unjoni Ewropea u lil hinn minnha.

(26)  Fil-kuntest tal- Istrateġija tas-Suq Uniku Diġitali , il-Kummissjoni qed tivvaluta kif l-aħjar tittratta kontenut illegali fuq l-internet.

(27) Ara l-konklużjonijiet tal-Kunsill dwar sistemi u mekkaniżmi għat-titjib tas-sigurtà tal-isplussivi tas-26 ta’ April 2010, http://www.consilium.europa.eu/uedocs/cms_data/docs/pressdata/en/jha/114017.pdf

(28)  COM(2015) 750 finali tat-18.11.2015. Proposta għal Direttiva tal-Parlament Ewropew u tal-Kunsill li temenda d-Direttiva tal-Kunsill 91/477/KEE dwar il-kontroll tal-akkwist u l-pussess ta’ armi.

(29) COM(2014)527 finali tal-21.8.2014. Kommunikazzjoni dwar l-Istrateġija u l-Pjan ta’ Azzjoni tal-UE għall-ġestjoni tar-riskju doganali: L-indirizzar ta’ riskji, it-tisħiħ tas-sigurtà tal-katina tal-provvista u l-iffaċilitar tal-kummerċ.

(30) Il-Grupp Ewropew ta’ Esperti tal-Armi tan-Nar, magħmul minn esperti minn kull Stat Membru tal-UE, mill-Europol u minn membri assoċjati li huma l-Liechtenstein, in-Norveġja, l-Iżvizzera u t-Turkija, ġie stabbilit fl-2004 biex jiffaċilita l-iskambju tal-informazzjoni u biex jippromwovi l-kooperazzjoni kontra t-traffikar illeċitu tal-armi tan-nar. Dan in-netwerk ta' valur kbir jappoġġja l-Grupp ta’ Ħidma tal-Infurzar tal-Liġi tal-Kunsill.

(31) http://www.smallarmsstandards.org/

(32) Kulleġġ Ewropew tal-Pulizija, https://www.cepol.europa.eu/who-we-are/european-police-college/about-us

(33) L-EEODN riċentement sar netwerk ta’ valur kbir li joffri taħriġ u kondiviżjoni ta’ informazzjoni, inkluż dwar inċidenti reċenti, għal esperti tal-isplussivi mill-Istati Membri kollha, u kkontribwixxa sostanzjalment għall-bini ta’ kapaċità u l-iskambju ta’ prattiki tajbin

(34) COM(2014) 247 finali, 5.5.2014.

(35) B'riżultat minn dawn il-provi, ġie żviluppat materjal ta’ gwida differenti, bħalma huma l-protezzjoni ta' miri faċli fl-ajruporti, l-użu ta' klieb tad-detezzjoni tal-isplussivi u l-protezzjoni ta' miri faċli f’ambjenti differenti, kif ukoll għad-detezzjoni ta’ residwi ta’ armi tan-nar u splussivi fuq il-passaporti li ser isiru disponibbli għall-Istati Membri.

(36) Is-SIS hija l-akbar pjattaforma għall-iskambju ta' dejta dwar l-armi tan-nar mitlufa u misruqa fi ħdan l-UE u l-pajjiżi assoċjati ta’ Schengen. S’issa, 29 pajjiż fl-Ewropa huma konnessi. Fil-31 ta’ Diċembru 2014, kellha 457 059 twissija ta' arma tan-nar, b’180 riżultat biss effettivament miksuba fl-2014 (fuq total ta’ 128 598 riżultat ta' twissija għall-kategorija kollha ta’ armi tan-nar). Din ir-rata baxxa ħafna hija prinċipalment dovuta għal kwistjonijiet ta’ kwalità ta' dejta, bħal pereżempju l-fatt li bosta Stati Membri ma jirreġistrawx il-kalibru, u li n-numri tas-serje ta’ armi tan-nar mhumiex uniċi.

(37) http://www.interpol.int/Crime-areas/Firearms/INTERPOL-Illicit-Arms-Records-and-tracing-Management-System-iARMS Is-Sistema ta' Ġestjoni tar-Reġistrar u t-Traċċar ta’ Armi Illeċiti tal-INTERPOL (iARMS), iffinanzjata mill-UE, tiffaċilita l-iskambju ta’ informazzjoni u kooperazzjoni investigattiva bejn l-aġenziji tal-infurzar tal-liġi b’rabta mal-moviment internazzjonali ta’ armi tan-nar illegali, kif ukoll tal-armi tan-nar leċiti li kienu involuti fit-twettiq ta’ reat. Il-bażi tad-dejta iARMS tal-Interpol qiegħda tinfirex għal 190 pajjiż membru tal-Interpol. Fiha madwar 756 000 rekord li huma prinċipalment mdaħħla mill-Awstralja u pajjiżi tal-Amerika Latina. S’issa tlieta fil-mija biss tal-informazzjoni dwar l-armi tan-nar f’din il-bażi tad-dejta iARMS oriġinat fl-UE.

(38) Il-proġett relatat Format Universali ta’ Messaġġ (UFM, sett ta’ moduli għall-bini ta’ skambji standard ta’ dejta biex jiġu interkonnessi s-sistemi mferrxa tal-infurzar tal-liġi) se jiġi allinjat mal-proġett ta' interoperabbiltà bejn is-SIS u iARMS.

(39) L-Interpol tospita n-Netwerk ta’ Informazzjoni Ballistika (IBIN) għal dawk il-pajjiżi li jkollhom teknoloġija ta' Sistemi Integrata ta’ Identifikazzjoni Ballistika (IBIS). Bħalissa, 19-il pajjiż madwar id-dinja, li minnhom tmienja jinsabu fiż-żona ta’ Schengen huma membri tal-IBIN. 42 pajjiż ieħor jużaw it-teknoloġija IBIS iżda mhumiex parti mill-IBIN (tlieta minnhom huma pajjiżi tal-UE). S’issa kien hemm 36 riżultat, il-biċċa l-kbira minnhom fost il-pajjiżi tal-UE.

(40) http://research.shu.ac.uk/aces/odyssey/index.php?option=com_content&view=category&layout=blog&id=56&Itemid=88

(41) Id-Deċiżjoni tal-Kunsill 2013/698/PESK: iTRACE jiġbor u jipprovdi informazzjoni preċiża u verifikata ma' dejta fuq il-post dwar rotot ta' kummerċ illeċitu ta' armi konvenzjonali ddevjati jew traffikati. http://www.conflictarm.com/itrace/  Barra minn hekk, il-proġett iTRACE għandu l-għan speċifiku wkoll li jappoġġa l-implimentazzjoni tat-Trattat tal-Kummerċ tal-Armi billi jassisti awtoritajiet nazzjonali fid-detezzjoni tad-devjazzjoni ta' armi konvenzjali trasferiti u fil-valutazzjoni ta' riskji ta' devjazzjoni meta jiġu eżaminati applikazzjoni għal-liċenzja tal-esportazzjoni. Investigazzjonijiet fuq il-post imwettqa minn esperti mill-kumpanija privata “Conflict Armament Research (CAR) f’21 pajjiż (speċjalment fl-Afrika u fil-Lvant Nofsani), jidħlu f'"bażi tad-dejta ta' traċċar ta' armi" b'aċċess pubbliku dwar armi ddevjati jew traffikati.

(42) 130,000 oġġett iddokumentat: armi, munizzjon u materjal relatat; 213-il talba ta' traċċar mibgħuta lil gvernijiet (minn Lulju 2015).

(43) Membri tal-Punt Fokali: Il-Belġju, il-Bulgarija, il-Kroazja, Ċipru, ir-Repubblika Ċeka, id-Danimarka, il-Finlandja, Franza, il-Greċja, il-Litwanja, il-Lussemburgu, Malta, in-Netherlands, il-Polonja, il-Portugall, ir-Rumanija, ir-Repubblika Slovakka, is-Slovenja, Spanja, l-Iżvezja, ir-Renju Unit.

(44) L-Eurojust, l-Interpol, l-Iżvizzera, l-Awstralja, il-Bureau tal-Istati Uniti dwar Alkoħol, Tabakk, Armi tan-Nar u Splussivi, u l-Albanija.

(45) Sistema ta’ twissija bikrija kienet ġiet żviluppata skont il-Pjan ta’ Azzjoni tal-UE dwar l-Isplussivi b’finanzjament mill-Kummissjoni, iżda ma rnexxilhiex tikkollega l-awtoritajiet tal-Istati Membri kollha.

(46) JOIN(2015) 50 finali.

(47) Mill-2002 ‘l hawn, l-UE kienet qed tappoġġa sforzi biex titnaqqas it-theddida kkawżata mill-akkumulazzjoni fuq skala kbira ta’ armi ħfief u ta’ kalibru żgħir (SALW) u l-ħażniet ta’ munizzjon fix-Xlokk tal-Ewropa ( http://www.seesac.org/news.php?id=495 ). Diversi proġetti ġew iffinanzjati mill-UE fir-reġjun tal-Balkani tal-Punent bil-ħsieb li titjieb is-sigurtà tal-ġestjoni tal-ħażniet.

(48) Wara Forum Ministerjali bejn l-UE u l-Balkani tal-Punent dwar il-Ġustizzja u l-Affarijiet Interni li sar f’Tirana fl-2012, netwerk reġjonali ta’ esperti fit-traffikar tal-armi tan-nar ġie stabbilit fl-2013. Dan wassal għall-adozzjoni tal-Pjan ta’ Azzjoni. Ġie approvat f’Diċembru 2014 kemm mill-Kunsill kif ukoll mis-sħab fil-Balkani tal-Punent fil-Forum Ministerjali bejn l-UE u l-Balkani tal-Punent dwar il-Ġustizzja u l-Affarijiet Interni f’Belgrad. Il-pjan ta’ azzjoni jipprevedi l-azzjonijiet li ġejjin:

(49) L-Istrateġija tal-UE biex tiġġieled l-akkumulazzjoni u t-traffikar illeċiti ta' armi ħfief u ta’ kalibru żgħir (SALW) u l-munizzjon tagħhom. Dok. 5319/06 PESC 31, 13 ta’ Jannar 2006;

(50) Bħal pereżempju l-Istrument Ewropew ta’ Viċinat (ENI) u l-Istrument li jikkontribwixxi għall-Istabbiltà u l-Paċi (IcSP), kif diġà huwa l-każ bil-programm il-ġdid Euromed Police IV iffinanzjat mill-ENI (li se jiġi varat daqt).

(51) Armi mil-Libja nstabu f’pajjiżi bħaċ-Ċad, l-Eġittu, Gaża, Mali, in-Niġer u t-Tuneżija.

(52) Sistemi ta' difiża mill-ajru li jinġarru.

(53) organizzazzjoni reġjonali pajjiżi Għarab Afrika tat-Tramuntana Qarn tal-Afrika Peniżola Għarbija Il-LAS hija ta' fi u madwar l-, il- u l-.

(54) http://eeas.europa.eu/non-proliferation-and-disarmament/conventional_weapons/salw/index_en.htm

(55) http://www.eeas.europa.eu/csdp/about-csdp/european-security-strategy/

IL-KUMMISSJONI EWROPEA

Brussell, 2.12.2015

COM(2015) 624 final

ANNESS

KOMMUNIKAZZJONI MILL-KUMMISSJONI LILL-PARLAMENT EWROPEW U LILL-KUNSILL

L-Implimentazzjoni tal-Aġenda Ewropea dwar is-Sigurtà:
pjan ta' azzjoni tal-UE kontra t-traffikar illeċitu u l-użu ta' armi tan-nar u splussivi

ANNESS: Azzjonijiet ta’ prijorità