Sentenza tal-Qorti tal-Ġustizzja (It-Tmien Awla) tal-1 ta’ Awwissu 2022 (talba għal deċiżjoni preliminari tal-Corte d’appello di Venezia – l-Italja) – Agecontrol SpA vs ZR, Lidl Italia Srl

(Kawża C-319/21) (1)

(Rinviju għal deċiżjoni preliminari - Agrikoltura - Organizzazzjoni komuni tas-swieq - Regolament (KE) Nru 1234/2007 - Frott u ħaxix frisk f’imballaġġ - Regolament ta’ Implimentazzjoni (UE) Nru 543/2011 - Verifika tal-konformità - Trasport lejn post tal-bejgħ li jappartjeni lill-istess kumpannija ta’ kummerċjalizzazzjoni - Dokument ta’ akkumpanjament - Indikazzjoni tal-pajjiż ta’ oriġini)

(2022/C 408/22)

Lingwa tal-kawża: it-Taljan

Qorti tar-rinviju

Corte d’appello di Venezia

Partijiet fil-kawża prinċipali

Rikorrent: Agecontrol SpA

Konvenuti: ZR, Lidl Italia Srl

Dispożittiv

L-Artikolu 5(4) tar-Regolament ta’ Implimentazzjoni tal-Kummissjoni (UE) Nru 543/2011 tas-7 ta’ Ġunju 2011 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 1234/2007 għas-setturi tal-frott u l-ħaxix u tal-frott u l-ħaxix ipproċessat, moqri fid-dawl tal-Artikolu 8 ta’ dan ir-regolament u tal-Artikoli 113 u 113a tar-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (Regolament dwar OKS Unika), kif emendat bir-Regolament tal-Kunsill (KE) Nru 361/2008 tal-14 ta’ April 2008, għandu jiġi interpretat fis-sens li l-verifika tal-konformità mal-istandards ta’ kummerċjalizzazzjoni ta’ prodotti li jaqgħu taħt is-settur tal-frott u tal-ħaxix ma teżiġix li d-detentur ta’ dawn il-prodotti joħroġ dokument ta’ akkumpanjament. Madankollu, meta dan id-detentur joħroġ tali dokument, huwa għandu, fl-istadji kollha tal-kummerċjalizzazzjoni tal-imsemmija prodotti, isemmi l-isem u l-pajjiż ta’ oriġini tal-istess prodotti, indipendentement mill-fatt li d-dettalji tat-tagħrif esterni meħtieġa mir-Regolament ta’ Implimentazzjoni Nru 543/2011 ikunu diġà jidhru b’mod viżibbli u li ma jitħassarx fuq naħa waħda tal-imballaġġi tagħhom, fuq avviż imqiegħed b’mod viżibbli ġewwa l-mezz ta’ trasport li bih jiġu ttrasportati kif ukoll fuq il-fatturi maħruġa mill-fornitur ta’ dawn il-prodotti.

---

(1)   ĠU C 310, 2.8.2021.