|
24.10.2022 |
MT |
Il-Ġurnal Uffiċjali tal-Unjoni Ewropea |
C 408/28 |
Talba għal deċiżjoni preliminari mressqa mill-iSpetsializiran nakazatelen sad (il-Bulgarija) fit-28 ta’ Ġunju 2022 – Proċeduri kriminali kontra PT, SD
(Kawża C-432/22)
(2022/C 408/38)
Lingwa tal-kawża: il-Bulgaru
Qorti tar-rinviju
Spetsializiran nakazatelen sad
Partijiet fil-proċeduri kriminali nazzjonali
PT, SD
Domandi preliminari
Fil-kuntest ta’ kawża kriminali dwar akkuża abbażi ta’ fatti li jaqgħu fil-kamp ta’ applikazzjoni tad-dritt tal-Unjoni Ewropea, liġi nazzjonali li teżiġi li għandha tkun qorti differenti minn dik adita bil-kawża u li quddiemha jkunu ġew prodotti l-provi kollha li teżamina, fuq il-mertu, ftehim konkluż bejn il-prosekutur u akkużat, f’sitwazzjoni fejn il-bażi għal dan ir-rekwiżit hija l-preżenza ta’ akkużati oħra li ma kkonkludewx tali ftehim, hija konformi mat-tieni subparagrafu tal-Artikolu 19(1) TUE u mal-ewwel u t-tieni paragrafu tal-Artikolu 47 tal-Karta tad-Drittijiet Fundamentali tal-Unjoni Ewropea?
Liġi nazzjonali li tipprevedi li ftehim li jagħlaq il-proċedura kriminali jista’ jiġi approvat biss wara li jingħata l-kunsens mill-akkużati l-oħra kollha u mill-avukati tagħhom hija konformi mal-Artikolu 5 tad-Deċiżjoni Qafas tal-Kunsill 2004/757/ĠAI tal-25 ta’ Ottubru 2004 li tistabbilixxi dispożizzjonijiet minimi dwar l-elementi kostitwenti ta’ att kriminali u ta’ pieni fil-qasam tat-traffikar illeċitu ta’ drogi (1), mal-Artikolu 4 tad-Deċiżjoni Qafas tal-Kunsill 2008/841/ĠAI tal-24 ta’ Ottubru 2008 dwar il-ġlieda kontra l-kriminalità organizzata (2), mat-tieni subparagrafu tal-Artikolu 19(1) TUE u mal-Artikolu 52 tal-Karta tad-Drittijiet Fundamentali, moqri flimkien mal-Artikolu 47 tagħha?
Huwa meħtieġ, bis-saħħa tat-tieni paragrafu tal-Artikolu 47 tal-Karta tad-Drittijiet Fundamentali, li qorti, wara li tkun eżaminat u approvat ftehim, tirrikuża ruħha mill-eżami tal-akkużat mressqa kontra l-akkużati l-oħra f’sitwazzjoni fejn din il-qorti tkun tat deċiżjoni dwar dan il-ftehim b’mod li ma jimplika ebda osservazzjonijiet dwar il-parteċipazzjoni tagħha fl-att u b’mod li ma tkunx ħadet pożizzjoni dwar il-ħtija tagħhom?