Talba għal deċiżjoni preliminari mressqa mill-iSpetsializiran nakazatelen sad (il-Bulgarija) fit-13 ta’ Lulju 2022 – Proċeduri kriminali kontra VB

(Kawża C-468/22)

(2022/C 408/43)

Lingwa tal-kawża: il-Bulgaru

Qorti tar-rinviju

Spetsializiran nakazatelen sad

Parti fil-proċeduri kriminali nazzjonali

VB

Domanda preliminari

Dispożizzjoni nazzjonali, bħalma hija l-Artikolu 423(3) tan-Nakazatelno protsesualen kodeks (il-Kodiċi tal-Proċedura Kriminali), li tobbliga lil persuna li tressaq talba għall-ftuħ mill-ġdid ta’ proċedura kriminali minħabba l-kontumaċja tagħha f’każ li ma huwiex previst fl-Artikolu 8(2) tad-Direttiva (UE) 2016/343 tal-Parlament Ewropew u tal-Kunsill tad-9 ta’ Marzu 2016 dwar it-tisħiħ ta’ ċerti aspetti tal-preżunzjoni tal-innoċenza u tad-dritt li wieħed ikun preżenti waqt il-proċess fil-proċedimenti kriminali (1) sabiex tidher personalment quddiem il-qorti sabiex din it-talba tiġi eżaminata fuq il-mertu, hija konformi mal-Artikolu 9 ta’ din id-direttiva u mal-prinċipju ta’ effettività?

---

(1)   ĠU 2016, L 65, p. 1.