—

tannulla d-Deċiżjoni C (2020) 8550 final tal-Kummissjoni tal-4 ta’ Diċembru 2020 dwar l-iskema ta’ għajnuna SA.21259 (2018/C) (ex 2018/NN) eżegwita mill-Portugall favur iż-Żona Ħielsa ta’ Madeira (ŻĦM) – Skema III;

—

tikkundanna lill-Kummissjoni għall-ispejjeż.

1.

L-ewwel motiv ibbażat fuq evalwazzjoni żbaljata tal-issodisfar tar-rekwiżiti għall-kompatibbiltà tal-iSkema III taż-Żona Ħielsa ta Madeira (iktar ’il quddiem iż-“ŻĦM”), fuq kollox fir-rigward tal-oriġini tad-dħul u tal-ħolqien u ż-żamma ta’ postijiet tax-xogħol fir-reġjun.

2.

It-tieni motiv ibbażat fuq id-dewmien inġustifikat tal-Kummissjoni meta ġiet biex temenda l-verżjonijiet suċċessivi tal-iskema taż-ŻĦM sa fejn din tirreferi għall-kriterju ta’ kalkolu tan-numru ta’ postijiet tax-xogħol maħluqa/miżmuma.

3.

It-tielet motiv ibbażat fuq ksur tal-obbligu ta’ motivazzjoni, sa fejn id-deċiżjoni adottata ma hijiex motivata biżżejjed dwar x’għandu jinftiehem b’postijiet tax-xogħol taż-ŻĦM u dwar l-attività effettiva u materjalment imwettqa f’Madeira.

4.

Ir-raba’ motiv ibbażat fuq ksur tad-dritt għal smigħ xieraq u tal-prinċipju ta’ opportunitajiet ugwali għall-partijiet, fid-dawl tad-dewmien tal-Kummissjoni fil-korrezzjoni tal-elementi tal-istruttura legali taż-ŻĦM u tat-terminu qasir għall-eżerċizzju tad-drittijiet tad-difiża mir-rikorrenti.

5.

Il-ħames motiv ibbażat fuq ksur tal-aspettattivi leġittimi, minħabba dewmien negliġenti fl-aġir tal-Kummissjoni u minħabba l-għoti tad-deċiżjoni kkontestata.

6.

Is-sitt motiv ibbażat fuq ksur tal-prinċipju tal-aspettattivi leġittimi, minħabba dewmien fl-aġir tal-Kummissjoni u minħabba bidla fis-sistema ta’ għajnuna mill-Istat fis-seħħ għal perijodu regolatorju speċifiku.