It-trasparenza (aċċess għad-dokumenti)

L-istituzzjonijiet tal-Unjoni Ewropea (UE) għandhom ir-responsabbiltà li jwettqu ħidmiethom bl-aktar mod trasparenti possibbli.

L-Artikolu 15 (3) tat-Trattat dwar il-Funzjonament tal-Unjoni Ewropea jagħti liċ-ċittadini tal-UE, kif ukoll lil kwalunkwe persuna fiżika jew ġuridika li tirrisjedi jew li għandha l-uffiċċju rreġistrat tagħha f’pajjiż tal-UE, id-dritt ta’ aċċess għad-dokumenti tal-istituzzjonijiet.

Ir-Regolament (KE) Nru 1049/2001 rigward l-aċċess pubbliku għal dokumenti tal-Parlament Ewropew, tal-Kunsill u tal-Kummissjoni jimplimenta dan id-dritt ta’ aċċess għad-dokumenti.

Madankollu, huwa jipprevedi wkoll 2 tipi ta’ eċċezzjonijiet:

• eċċezzjonijiet assoluti, li jkopru każijiet fejn l-aċċess jiġi rrifjutat awtomatikament (għal raġunijiet ta’ sigurtà pubblika, difiża, ir-relazzjonijiet internazzjonali, il-politika ekonomika, monetarja jew finanzjarja, jew il-privatezza) u
• eċċezzjonijiet relattivi, li jkopru każijiet fejn l-aċċess jiġi rrifjutat (pereżempju, biex jiġu mħarsa l-interessi kummerċjali ta’ ditta kummerċjali jew ta’ individwu privat, pariri legali, il-proċess tat-teħid tad-deċiżjonijiet jew l-investigazzjonijiet li għaddejjin), ħlief fejn ikun hemm interess pubbliku prevalenti fid-divulgazzjoni.

L-aċċess għad-dokumenti huwa ffaċilitat permezz ta’ reġistru pubbliku elettroniku tad-dokumenti.

Fil-Ftehim Interistituzzjonali tagħhom tal-2003 dwar Tfassil Aħjar tal-Liġijiet, l-istituzzjonijiet tal-UE qablu li jtejbu t-trasparenza u l-aċċessibbiltà tal-informazzjoni lill-pubbliku.

ARA WKOLL

• Id-defiċit demokratiku
• Il-Governanza
• Abbozzar mill-ġdid tal-leġiżlazzjoni
• Simplifikazzjoni tal-leġiżlazzjoni
• Aċċess għal dokumenti tal-Parlament Ewropew, tal-Kunsill u tal-Kummissjoni(sommarju)
• Trasparenza u aċċess għad-dokumenti fuq is-sit elettroniku tal-Kunsill tal-Unjoni Ewropean
• Portal tal-Kummissjoni Ewropea dwar it-trasparenza