Letra larriak

LETRA LARRIAK
erabiltzeko irizpideak

17
Euskara Zerbitzua
Hizkuntza Prestakuntza

LETRA LARRIAK
erabiltzeko irizpideak
Alfontso Mujika

Ikasmaterialetako hizkuntzaren
egokitasun-irizpideak finkatzeko
Aholku Batzordea

HEZKUNTZA, UNIBERTSITATE DEPARTAMENTO DE EDUCACIÓN
ETA IKERKETA SAILA UNIVERSIDADES E INVESTIGACIÓN

Vitoria-Gasteiz, 2008

Lan honen bibliografia-erregistroa Eusko Jaurlaritzako Liburutegi Nagusiaren katalogoan
aurki daiteke: <http://www.euskadi.net/ejgvbiblioteka>.

Argitaraldia: 1.a, 2008ko maiatzean
Ale kopurua: 3.000 ale
© Euskal Autonomia Erkidegoko Administrazioa
Hezkuntza, Unibertsitate eta Ikerketa Saila
Internet: www.euskadi.net
Argitaratzailea: Eusko Jaurlaritzaren Argitalpen Zerbitzu Nagusia
Servicio Central de Publicaciones del Gobierno Vasco
Donostia kalea, 1 - 01010 Vitoria-Gasteiz
ISBN: 978-84-457-2738-6

Sarrera
Duela lau urte ekin zion Hezkuntza, Unibertsitate eta Ikerketa
Sailak, EIMA programaren ildotik, noizbait estilo-liburu izen osoa mere-
zitzeko moduan izango den proiektuari. Pixkana-pixkana, arazoak eta
gramatika-katramilak ez baitira koxkarik gabeak, Ikasmaterialen Aholku
Batzordea tinko ari da hura taxutzen, itxuratzen, moldatzen eta apai-
latzen. Joxe Ramon Zubimendiren Ortotipografia liburukia izan zen
lehena, 2004an. Handik gutxira, 2005ean, Juan Garziaren Kalko okerrak
eta Elhuyar Fundazioko koordinatzaileekin talde-lanean eginiko
Onomastika liburukiak atondu ziren. Liburuki horiek paper-euskarrian
atera ziren lehen pausoan. Tresneria berriak eskaintzen dituen errazta-
sunak bitarteko, berehala jarri ziren Interneten ere, Sailaren webgunean.
Denbora-tarte luzeagoa behar izan da esku artean duzun Alfontso
Mujikaren Letra larriak erabiltzeko irizpideak izeneko hau atontzeko.
Bidean datoz, bestalde, beste liburuki batzuk. Ea horiek ere azkar
hartzen duten moldiztegi-arrastoa eta kalean ikusten ditugun laster.
Euskaraz irakasten duten milaka maisu-maistrei, euskal ikasliburuen
sortzaile-prestatzaileei eta alor horretan diharduten argitaletxeei
lagundu nahirik kaleratzen ditugu letra larriak erabiltzeko irizpideok.
Letra larriak direla eta, ez gara hutsetik abiatzen. Lehen ere egin
izan da saiorik, horien erabilera arautzeko. Euskaltzaindiaren 1990eko
Letra larrien erabilera euskaraz izeneko gomendioa aipatu behar da beste
ororen gainetik. Horixe izan du lantxo honen egileak abiapuntu nagusi.
Nolanahi ere, autoreak berak hitzaurrean dioskunez, beste hainbat
ekarpen eta moldaera ere kontuan hartu ditu.
Urrats asko egin delarik ere euskararen normaltze-bidean, orain
arteko arau-gomendioek ez diete eguneroko behar guzti-guztiei eran-
tzuten. Euskara batuaren testuinguruan badira, oraindik, jorratu
eharreko arloak. Arlo batzuk teoriatik hurbilago daude; beste batzuk,
berriz, kontu pragmatikoetatik gertuago. Bigarren molde horretakoa
dugu letra larrien arloa. Benetako premia bati erantzutera dator, askoren
ustean. Liburuki honen paratzaile nagusi den Alfontso Mujikak bikain
atondu du, bere egitekoa. Ez zuen erronka txikia. Oreka ederrean jokatzen

jakin du eta egoki uztartu ditu teoria-alderdia eta adibideen iturri oparoa.
Talde-lanean eginiko liburukia da hau. Hala komeni ere zen, eta halaxe
jokatu da. Itzal eta hedadura zabalagoak lortuko ditu, hartara. Egileaz eta
Ikasmaterialen Aholku Batzordeko kideez gainera, idazle, argitaletxe,
irakasle eta bestelako espezialista asko izan dira beren kritikak eta ekar
penak egin dituztenak. Testuak irabazi baino ez du egin, horrela.
Euskaltzaindiaren goi-gidaritza estimu handitan du Sailak, eta
hark egindako gomendioei orpoz orpo jarraitzen saiatzen da beti. Beste
liburukiekin egin zen bezala, Akademiari aurkeztu zitzaion oraingo
hau ere, irizpen eske. Bere Corpus batzordearen irizpena oinarri hartuz,
egoki eta taxuzko iritzi dio Euskaltzaindiak liburuki honi: egoki eta
baliagarri. Aldeko irizpen horrekin batera zenbait hobekuntza-propo-
samen ere hobetsi ditu Akademiak, puntu jakin batzuetan. Kontuan
hartu dira ohar horiek, zintzoki. Liburukiak Euskaltzaindiaren oni-
ritzia du, batetik; Akademiak berak bihar edo etzi gai honetaz erabaki
ditzakeenak ez dira baldintzatzen, bestetik. Eskerrak eman nahi dizkio
Sailak Euskaltzaindiari, oraingoan ere bere eskeari hain eskuzabalik
erantzun izanagatik.
Besterik ez, honenbestez. Beti bezala, zeu zara gai hauetan, irakurle,
unean uneko epaile eta eragile nagusi. Zeuk ikusiko duzu argibide eta
gomendio hauek noraino diren zure beharretarako egoki, eta zer neurritan
hobekizun. Eguneroko idatz-langintza saiatuak erakusten digu argien,
guztioi, honelako gomendioen irismena eta balio-indarra zenbaterainokoa
den. Errespetu handia diogu idazle trebatuaren bere baitariko esperien-
tziari. Badakigu jakin gomendioak bidea egiten laguntzeko direla: lagun-
garri izan behar dutela, ez bidegile saiatuaren behaztopa-harri. Euskararen
onerako, ahalegin honetan asmatu izana da gure uste eta desio bakarra.
Zernahi dela ere, jakizu zure ekarpen baliotsuak jasotzeko prest gauzka-
zula noiznahi. Hemen gauzkazu: <huiseus4@ej-gv.es>.

Gasteizen, 2008ko maiatzaren 7an

JOSE ANTONIO CAMPOS GRANADOS
Hezkuntza, Unibertsitate eta Ikerketa sailburua

Aurkibidea

Hitzaurrea . . . . . . . . . . . . . . . . . . . . . . . . . . . . . . . . . . . . . . . . . . 11
Ohar nagusia . . . . . . . . . . . . . . . . . . . . . . . . . . . . . . . . . . . . . . . . . . 15
1. Letra larriei buruzko ohar orokorrak . . . . . . . . . . . . . . . . . . 17
1.1. Letra larri handiak eta txikiak . . . . . . . . . . . . . . . . . . . . . . 17
1.2. Digramak . . . . . . . . . . . . . . . . . . . . . . . . . . . . . . . . . . . . . 17
1.3. i eta j letrak . . . . . . . . . . . . . . . . . . . . . . . . . . . . . . . . . . . 17
1.4. Diakritikoak . . . . . . . . . . . . . . . . . . . . . . . . . . . . . . . . . . . 18
1.5. Letra guztiak larriz . . . . . . . . . . . . . . . . . . . . . . . . . . . . . . 18
1.5.1. Zenbaki erromatarrak . . . . . . . . . . . . . . . . . . . . . . . 18
1.5.2. Siglak eta akronimoak . . . . . . . . . . . . . . . . . . . . . . . 18
2. Letra larriaren eginkizunak edo funtzioak . . . . . . . . . . . . . . 21
2.1. Kokatze-funtzioa . . . . . . . . . . . . . . . . . . . . . . . . . . . . . . . . 21
2.1.1. Testuaren hasieran . . . . . . . . . . . . . . . . . . . . . . . . . . 21
2.1.2. Puntuaren ondoren . . . . . . . . . . . . . . . . . . . . . . . . . 21
2.1.3. Galdera- edo harridura-markaren ondoren . . . . . . . . 22
2.1.4. Eten-puntuen ondoren . . . . . . . . . . . . . . . . . . . . . . 22
2.1.5. Parentesi arteko testua . . . . . . . . . . . . . . . . . . . . . . 22
2.1.6. Komatxo arteko aipuak . . . . . . . . . . . . . . . . . . . . . . 23
2.1.7. Bi puntuen ondorengo testua . . . . . . . . . . . . . . . . . 24
2.1.8. Zerrendak . . . . . . . . . . . . . . . . . . . . . . . . . . . . . . . . 25
2.2. Nabarmentze-funtzioa . . . . . . . . . . . . . . . . . . . . . . . . . . . . 26
2.2.1. Pertsona- eta jainko-izen bereziak . . . . . . . . . . . . . . 28
2.2.1.1. Pertsonen izen-deiturak . . . . . . . . . . . . . . . 28
2.2.1.2. Izengoiti eta ezizenak . . . . . . . . . . . . . . . . . 30
2.2.1.3. Jainkoak eta pertsonaia mitologikoak . . . . . 30
2.2.1.4. Fikzio-pertsonaiak eta animalia
antropomorfoen izenak . . . . . . . . . . . . . . . . 31
2.2.1.5. Dinastiak, leinuak eta familiak . . . . . . . . . . 31
2.2.1.6. Izen bereziekin batera erabiltzen
diren izendapen generikoak . . . . . . . . . . . . 32

2.2.1.7. Izen berezirik gabe erabiltzen
diren izendapen generikoak . . . . . . . . . . . . 33
2.2.1.7.1. Azalpena . . . . . . . . . . . . . . . . . . 33
2.2.1.7.2. Irizpidea . . . . . . . . . . . . . . . . . . . 35
2.2.1.8. Hagionimia: santuei eta Ama Birjinari
deitzeko izenak . . . . . . . . . . . . . . . . . . . . . . 39
2.2.2. Animalia-izen bereziak . . . . . . . . . . . . . . . . . . . . . . 40
2.2.3. Gauzakien izen bereziak eta abstrakzioak . . . . . . . . 40
2.2.3.1. Abstrakzioak eta pertsonifikazioak . . . . . . . 40
2.2.3.2. Gauzakien izen bereziak . . . . . . . . . . . . . . . 41
2.2.3.3. Ibilgailuen izen bereziak . . . . . . . . . . . . . . 41
2.2.3.4. Produktuak . . . . . . . . . . . . . . . . . . . . . . . . 41
2.2.3.5. Markak eta modeloak . . . . . . . . . . . . . . . . . 42
2.2.3.6. Internet hitza . . . . . . . . . . . . . . . . . . . . . . . . 43
2.2.3.7. Erakunde, instituzio, enpresa
eta orotariko taldeen izenak . . . . . . . . . . . . 43
2.2.3.7.1. Estatua . . . . . . . . . . . . . . . . . . . . 46
2.2.3.7.2. Administrazioa . . . . . . . . . . . . . . 50
2.2.3.8. Era guztietako erakunde eta taldeen
mendeko kudeaketa-organo, sail,
talde eta batzordeen izenak . . . . . . . . . . . . . 51
2.2.4. Entitate abstraktuak . . . . . . . . . . . . . . . . . . . . . . . . 53
2.2.4.1. Zientzia eta teknologiako terminoak . . . . . 53
2.2.4.2. Biologia: bizidunen sailkapen
sistematikoa . . . . . . . . . . . . . . . . . . . . . . . . 54
2.2.4.3. Ospakizun erlijiosoak, zibilak,
politikoak edo bestelakoak . . . . . . . . . . . . . 55
2.2.4.4. Historiako gertakariak . . . . . . . . . . . . . . . . 55
2.2.4.5. Aldi geologikoak, historiaurrekoak,
historikoak eta historia banatzeko
denbora-tarte nagusiak . . . . . . . . . . . . . . . . 56
2.2.4.6. Hezkuntza-sistemaren barneko ikasketak,
irakasgaiak eta jakintza-alorrak . . . . . . . . . 57
2.2.4.7. Jarduerak, ekimenak, ekitaldiak,
ospakizunak . . . . . . . . . . . . . . . . . . . . . . . . 59

2.2.4.8. Sariak . . . . . . . . . . . . . . . . . . . . . . . . . . . . . 59
2.2.4.9. Hitzaldiak, txostenak, komunikazioak,
artikuluak . . . . . . . . . . . . . . . . . . . . . . . . . 60
2.2.4.10. Liburuak eta bestelako argitalpenak . . . . . . 60
2.2.4.11. Aldizkariak . . . . . . . . . . . . . . . . . . . . . . . . 62
2.2.4.12. Ikus-entzunezko komunikabideetako
saioak . . . . . . . . . . . . . . . . . . . . . . . . . . . . . 63
2.2.4.13. Antzezlanak, filmak, kantak,
musika-obrak eta arte plastikoetako obrak . . . 63
2.2.4.14. Arau eta agiri ofizialak . . . . . . . . . . . . . . . . 63
2.2.5. Leku-izenak . . . . . . . . . . . . . . . . . . . . . . . . . . . . . . . . 66
2.2.5.1. Leku-izenak . . . . . . . . . . . . . . . . . . . . . . . . 66
2.2.5.2. Astronimia . . . . . . . . . . . . . . . . . . . . . . . . . . 70
2.2.5.3. Zodiakoa . . . . . . . . . . . . . . . . . . . . . . . . . . . . 70
2.2.5.4. Puntu kardinalak . . . . . . . . . . . . . . . . . . . . . 71
2.2.5.5. Zeru-lurretako irudizko lerroen
eta poloen izenak . . . . . . . . . . . . . . . . . . . . 72
2.2.5.6. Herri eta hirietako kale, plaza,
pasealeku, errepide eta gainerako
odonimoen izenak . . . . . . . . . . . . . . . . . . . 73
2.2.5.7. Etxe eta bestelako eraikinen izenak . . . . . . . 74
2.2.5.8. Leku-izenetatik eratorritako aditzak . . . . . . . 74
3. Letra larriak noiz ez diren erabili behar . . . . . . . . . . . . . . . . 75

Hitzaurrea
Letra larri edo maiuskulen eta letra xehe edo minuskulen erabilera
atal berezia da hizkuntzaren ortografiaren barnean. Atal berezia da, hain
zuzen ere, askotan ez dagoelako arau garbirik ematerik, eta, gainera
batzuetan, letra larriaren edo xehearen erabilera idazle bakoitzaren
gustuen, apeten edo ideia politiko edo erlijiosoen mende ere badagoe-
lako. Hizkuntza idatziaren alderdia ez dagokio hizkuntzaren muinari,
baina garbi dago baduela garrantzia testu uniformeak eta barne-kohesioa
dutenak lortu nahi badira. Eguneroko jardunak erakusten du idazle,
itzultzaile eta testu-zuzentzaileen kezka-iturri atergabea dela, letra
larrien erabilerari dagokionez, bai erdaraz (erdaretan) eta bai euskaraz
dabilen irizpide-aniztasuna edo, askotan, irizpide falta.
Askoren mina txoroen atsegina baino ez bada ere, komeni da
ohartzea arazoa ez dela euskararena bakarrik. Askoz estandarizazio-
maila handiagoa eta idatzizko tradizio finkatuagoa duten gure auzo-
erdaretan ere letra larrien erabilera ez dago erabat normalizaturik, nahiz
eta arauak, gomendioak eta estilo-liburuak nahi beste izan. Arazoa
lehen hurbiltzean ematen duen baino konplexuagoa den seinale.
Izan ere, letra larrien erabilera ez dago arau sail aldagaitz eta uni-
bertsal batek gobernatua. Inguruko hizkuntzetan pixka bat aztarrika
hasita, berehala ikusten da ez dela arau orohartzailerik, eta badirela
ohiturak, badirela modak, eta badirela norberaren edo erakunde
bakoitzaren gustuak, estiloak edo hitzarmenak. Adibidez, frantsesez
gutxiago erabiltzen dira letra larriak gaztelaniaz baino; ingelesez,
berriz, askoz gehiago erabiltzen dira gaztelaniaz baino, baina, nola-
nahi ere, alemanez baino gutxiago. Esan liteke, beraz, letra larrien era-
bilera bideratzeko arau orokor-orokorrak gutxi direla eta hitzarmen
edo hobespen eta ohitura sektorialak, berriz, ugariak direla.
Euskaraz ere izan dira saioak letra larrien erabilera arautzeko.
Ahalegin horretan, oroz gainera, Euskaltzaindiak 1990eko azaroaren
30ean plazaratu zuen Letra larrien erabilera euskaraz izeneko gomendioa
aipatu behar da. Lehen urrastzat ulertu behar da gomendio hori, garatu,
zehaztu eta osatu beharreko urrastzat.

11

Administrazioaren arloan, Gipuzkoako Foru Aldundiko Euska-
raren Normalkuntzarako Zuzendaritza Nagusiak Letra larri eta xeheak
lana moldatu zuen 1991n, gerora berrikusi eta zehaztua. Lan horrek
aski ongi deskribatzen du letra larrien unibertsoa. Euskaldunon
Egunkariak ere, Estilo liburuan (1992), arau batzuk eman zituen egun-
karian erabiltzeko, eta hurrengo argitalpenetan arauak findu eta
zehaztu egin zituen. Joxe Ramon Zubimendiren eta Pello Esnalen
Idazkera liburuan ere (1993), badira letra larrien erabilerari buruzko
ohar batzuk. 1994an, Euskaltzaindiaren XIII. Biltzarrean, Antton
Elosegik «Euskaltzaindiaren gomendio-arauen idazkeraz: letra larriei
buruzkoaren kasua» izeneko lana aurkeztu zuen. Lan horretan,
Euskaltzaindiaren 1990eko gomendioa kritikatu zuen, eta hura osa-
tzeko eta zuzentzeko hainbat proposamen egin zituen. Azkenik, Eusko
Jaurlaritzako Hezkuntza Sailak berak hau baino lehen argitaratu dituen
Ortotipografia eta Onomastika lanetan ere badira hainbat ohar letra larrien
erabileraz, nahiz eta letra larriak ez diren lan horien berariazko langai.
Lan horiek guztiek letra larri eta xeheen oihana zedarritzeko saioak
izan dira, eta ez hutsalak. Hala ere, eguneroko testu-zuzenketako
jardunak erakusten du premia dagoela oraindik kasuak xeheago deskri-
batu, jarraibideak zehazkiago eman eta adibidetegia zabaltzeko.
Ez da lantegi erraza, dena dela, letra larrien erabilera araupetzea,
orain arteko lanek erakusten dutenez. Eta zailtasunaren zioa ez da
euskara batu estandarraren tradizio falta bakarrik. Tradizio faltak ez du
batere laguntzen, jakina, baina arazoa sakonagoa da, ez da euskararen
arazo espezifikoa, inguruko hizkuntzetara begiratuta aise ikus daite-
keenez. Estatu Batuetako Government Printing Office (Gobernuaren
Argitalpen Zerbitzua) erakundearen estilo-liburuaren arabera, adibidez,
ezinezkoa da letra larrien erabilerari buruzko arazo guztiak araupetzea:
«It is impossible to give rules that will cover every conceivable
problem in capitalization. Actually, what is capitalized is mostly
a matter of editorial style and preference rather than a matter of
generally accepted rules. In addition, although there is a clearly
recognized rule requiring capitalization of proper nouns and adjectives,
opinions differ concerning what a proper noun is».

12

Konplexutasuna onartuta ere, printzipio nagusiak ezarri eta aplika-
zioa zainduz gero, zalantzarik ez dago batasun handia lor daitekeela:
«(...) but by considering the purpose to be served and the underlying
principles, it is possible to attain a considerable degree of uniformity».
Komenigarria ez ezik premiazkoa ere bada euskarazko eskola-mate-
rialetan erabiltzen diren testuetan letra larrien eta xeheen erabilera
arautzen ahalegintzea. Horregatik ondu da lan hau, kontsulta-iturri
zehatz bat izateko, erabilera arautzeko, edo irizpideak eskaintzeko behi-
nik behin. Ez dira jaso, ziur, testuetan ager daitezkeen kasu guztiak,
baina oinarri sendo bat jarri nahi izan da lan honekin, gero, pixkanaka,
guztion ohar eta kritikekin osatuz joateko.

Eskertza
Aldaketa ugari, bertsio ugari izan ditu liburu honek liburugai izan
den bitartean. Liburugai izatetik liburu bihurtu arteko bidean, jende
askoren laguntza jaso du egileak. Ikasmaterialen Aholku Batzordeko
kideek —Andres Alberdi, Juan Garzia, Xabier Mendiguren Bereziartu,
Joxe Ramon Zubimendi—, lana goitik behera miatu eta kritikatzeaz
gainera, iruzkinak egin eta hobekuntzak proposatu dituzte. Gai korapi-
latsu eta korapilatuetan irizpidea noraino eraman eta zenbateraino
zehaztu, irizpide horietan noiz bide bakarra utzi eta noiz ez eta salbues-
penen kutxa zenbateraino bete, horiexek izan dira luzeen eztabaidatu-
tako gaiak. Batzordekideen iritzi eta laguntzari esker egin du aurrera
liburugaiak punturik konplexuenetan.
Ikasmaterialen Aholku Batzordeko kideen laguntzaz ondutako lana
beste bahe batetik iragaztera bidali zen. Eguneroko lanean letra larrien
katramiletan kateatzea zer den ongi dakiten hainbat adituri bidali
zitzaien, lana kritikatu zezaten. Hainbat ohar, iradokizun eta zuzen-
keta-proposamen zorrotz egin zituzten pertsona hauek:
• Ander Irizar (Nafarroako Parlamentuko itzultzailea)
• Ane Goenaga (Elhuyar Fundazioko Hizkuntza Zerbitzuak Saila)
• Antton Elosegi (Euskal Herriko Unibertsitateko Euskal
Filologia Saila)

13

• Edurne Pérez de San Román (Eusko Jaurlaritzako Hizkuntza
Politikarako Sailburuordetza)
• Fernando Rey (Nafarroako Gobernuaren Itzulpen Atala)
• Iñigo Roque (Euskal Herriko Unibertsitateko Euskara Zerbitzua)
• Irene Arrarats (Berria egunkaria)
• Irune Payros (Euskal Herriko Unibertsitateko Euskara Zerbitzua)
• Itziar Bernaola (Euskal Herriko Unibertsitateko Euskara
Zerbitzua)
• Jesus Maria Agirre (Eusko Legebiltzarreko itzultzaile-zuzentzailea)
• Joxe Mari Berasategi (Arabako Foru Aldundiko Euskara
Zerbitzua)
• Juan Carlos Odriozola (Euskal Herriko Unibertsitateko Euskal
Filologia Saila)
• Saroi Jauregi (Elhuyar Fundazioko Hizkuntza Zerbitzuak Saila)
• Txantxon Zubeldia (Elkarlanean argitaletxea)
• Xabier Olarra (Nafarroako Gobernuaren Itzulpen Atala)
• Xarles Bidegain (Paueko Unibertsitateko irakaslea)
• EIMAko teknikari aztertzaileak
Ohargile guztien oharrak eta kritika oro arretaz irakurri eta kontsi-
deratu dira. Batzuetan, aldeko eta kontrako iritziak jaso dira puntu beren
inguruan, letra larrien gaiak zenbaitetan duen konplexutasunaren eta
—garbi esan dezagun— nolabaiteko subjektibotasunaren froga.
Euskaltzaindiarena izan da azken bahea: Corpus batzordeak lana
aztertu eta ohar-txostena egin du. Euskaltzaindiaren ohar, zehaztapen
eta iradokizun horiek aztertzea eta haien araberako moldaketak egitea
izan da lanaren azken urratsa.
Batzordekide eta aditu prestu horien lankidetza zintzoari esker iritsi
da lana azken bertsioraino.

Alfontso Mujika

14

Ohar nagusia: behar denean soilik erabili
behar da letra larria.

Letra xeheak, edo minuskulak, ohiko letrak dira, idazkera
arruntean erabili ohi direnak; neurriz letra larriak baino txikiagoak
dira, eta formaz ere desberdinak izan ohi dira (letra xeheen erabile-
rari buruzko oharrak 3. puntuan ematen dira). Adibideak:
a, b, c, d, e...
Letra larriak, edo maiuskulak, letra xeheak baino handiagoak
dira, eta forma desberdina izan ohi dute. Adibideak:
A, B, C, D, E...

• Behar denean soilik erabili behar da letra larria testuetan.
• Letra xehea da testua idazteko erabili beharreko letra molde nagusia.
• Letra larriak kasu berezi eta jakinetan baino ez dira erabiltzen.
• Hurrengo puntuetan zehazten diren irizpideen arabera letra larria ez
badagokio, testuari letra xehea dagokiola ulertu behar da.
• Zalantzaren aurrean, ez jo letra larrietara: xeheak erabili.

15

1. Letra larriei buruzko ohar orokorrak

1.1. Letra larri handiak eta txikiak
Bi letra larri mota daude: handiak eta txikiak. Letra larri txikiak,
formaz, letra larriak dira; tamainaz, berriz, beren inguruko letra xeheak
bezalakoak dira.

LETRA LARRI HANDIAK eta LETRA LARRI TXIKIAK
• letra larri handiak (maiuskula handiak), letra larri arruntak (maius-
kula arruntak) edo letra larriak (maiuskulak) dira erabilienak
(LETRA LARRIAK).
• letra larri txikiak (maiuskula txikiak) (LETRA LARRI TXIKIAK). Letra
larri handiak nabarmenegi gertatzen direnean erabili ohi dira.
Nolanahi ere, arruntak baino askoz gutxiago erabiltzen dira.
Bibliografia aipatzean, adibidez, erabiltzen dira, idazlearen deitura
idazteko (ikus estilo-liburuaren lehen liburukia, Ortotipografia,
55. or.). Adibidez:
ARRATIBEL, Joxe: Kontu zaarrak, Editorial La Gran Enciclopedia Vasca,
Bilbo, 1980.

1.2. Digramak
Digrama batez hasten diren erdal nahiz euskal hitzetan (ll, tx, ts, tt,
tz, ch, ph, kh, qu...), letra larriz idaztekoak direnean, digramaren lehen
letra bakarrik da larriz idaztekoa. Adibideak:
Lleida, Lluís Llach, Txillida, Txillardegi, Tsugaru, Ttipia, Tzarkeria,
Chihuahua, Phnom Penh, Khartum, Québec...

1.3. i eta j letrak
i eta j letrak maiuskulaz idazten direnean, gaineko puntua ez da
idatzi behar (ohar honek eskuz idazten denerako balio du, ordena-
gailuz idatziz gero gaineko punturik gabe idazten baitira beti I eta J
letrak). Adibideak:
indiar, baina India; japoniar, baina Japonia...

17

1.4. Diakritikoak
Letra larria erabiliagatik, eutsi egin behar zaio zeinu diakritikoari.
Adibideak:
IÑAKI, OÑATI, ÉCHIROLLES, MARTÍNEZ, PERPINYÀ, NÎMES...

1.5. Letra guztiak larriz
Zenbaitetan, testu baten hitz bat edo zati bat nabarmentzeko, delako
hitza edo esaldia oso-osorik letra larriz idatzi ohi da. Erabilera hori, gehie-
netan, ez dagokio ortografiari, testuen diseinuaren edo maketaren aukera
estilistikoa da, eta, hortaz, ez dago arautzerik. Adibidez, inprimatutako
liburu eta aldizkarien azaletan, edo haien barneko atalen izenburuetan, edo
egunkari eta aldizkarien goiburuetan, letra guztiak larriz idazten dira
askotan; eta zerbait iragartzeko karteletan eta oroitarrietan ere bai.
Adibideak:
DICCIONARIO GENERAL VASCO - OROTARIKO EUSKAL HIZTEGIA
ARGIA; FONTES LINGUAE VASCONUM; SENEZ
MESEDEZ, EZ ERRE
Erabilera horiek guztiak lan honen esparrutik kanpo daude, lan hau
testu arruntari baitagokio, ez maketari.
Aurrekoez gainera, honako hauetan ere letra guztiak larriz idatzi
ohi dira:

1.5.1. Zenbaki erromatarrak
Zenbaki erromatarrak beti letra larriz idazten dira. Adibideak:
Luis XIV.a; Maria II.a; Joan XXIII.a; Euskaltzaindiaren XIII. Biltzarra;
Axularren Geroren III. kapituluan; Orotariko Euskal Hiztegiaren I. liburukiko
sarrerako XXV. orrialdean

1.5.2. Siglak eta akronimoak1
Izen berezien sigla eta akronimoak letra larriz eta punturik gabe
idatzi ohi dira2. Adibideak:
BBK, NBE, AEB, DBH, EAJ, UGT, LHL, ISBN, EHU, ETB...

1 Estilo-liburuaren Ortotipografia liburukiaren «Siglak» atalaren osagarria.

18

(BBK: Bilbao Bizkaia Kutxa; NBE: Nazio Batuen Erakundea; AEB:
Ameriketako Estatu Batuak; DBH: Derrigorrezko Bigarren Hezkuntza; EAJ:
Euzko Alderdi Jeltzalea; UGT: Unión General de Trabajadores; LHL: Lurralde
Historikoen Legea; ISBN: International Standard Book Number; EHU: Euskal
Herriko Unibertsitatea; ETB: Euskal Telebista)
Letra larriz idazten dira izen arrunten siglak ere. Adibideak:
BEZa (balio erantsiaren gaineko zerga3), TAOa (trafiko eta aparkamenduaren
ordenamendua), PVCa (polibinil kloruroa), DNA (azido desoxirribonuklei-
koa)...
Kontuan izan behar da, hala ere, sei letra edo gehiagoko sigla eta
akronimoetan letra larriz lehen letra baino ez idazteko hitzarmena dago-
ela indarrean Europar Batasunaren argitalpen ofizialetan (Europar
Batasuneko hizkuntza ofizial guztietarako hitzarmena da), baldin eta
sigla hitz bat balitz bezala irakur badaiteke. Adibideak:
Unesco (United Nations Educational, Scientific and Cultural Organisation)
Esprit (European strategic programme for research and development in infor-
mation technology)
Edifact (Electronic data interchange for administration, commerce and transport)
Cenelec (Comité européen de normalisation électrotechnique)

2 Badira, dena dela, salbuespenak, sigla batzuk letra larriz eta letra xehez idatzi ohi baitira.
Adibidez:
CiU...
Halaber, badira, salbuespen gisa betiere, jatorrian sigla edo akronimo moduan eratuak izan
arren, autonomia hartu duten izenak edo markak. Adibideak:
Seat (jatorrian, Sociedad Española de Automóviles de Turismo)
Talgo (jatorrian, Tren Articulado Ligero Goicoechea Oriol)
Benelux (België, Nederland, Luxembourg estatu-izenen lehen letrekin osatua)

Azkenik, sigla batetik abiatuta eta letraren bat(zuk) erantsita beste sigla bat sortzen
denean, letra erantsiak xehez idazten dira batzuetan. Adibidez:
RNA (azido erribonukleikoa) eta RNAm/mRNA (azido erribonukleiko mezularia)
3 Euskarazko testu ofizialetan, dena den, ohikoa da zerga-izenak letra larriz hasita idaztea
(Balio Erantsiaren gaineko Zerga; Pertsona Fisikoen Errentaren gaineko Zerga), hori baita Espainiako admi-
nistrazio-testuen tradizioa (Impuesto sobre el Valor Añadido; Impuesto sobre la Renta de las Personas Físicas).
Frantziako testu ofizialetan edo katalanezko testu ofizialetan, berriz, letra xehez idazten dira
zerga-izenak (frantsesa: taxe sur la valeur ajoutée; impôt sur le revenu des personnes physiques. Katalana:
impost sobre el valor afegit; impost sobre la renda de les persones físiques).

19

Sigla edo akronimoa ezin irakurrizkoa bada, ordea, letra larriz
idazten da oso-osorik:
CCAMLR (Commission for the Conservation of Antarctic Marine Living
Resources)
EMCDDA (European Monitoring Centre for Drugs and Drug Addiction)
Dena dela, erabiliaren erabiliz, idazten diren bezala irakurriak iza-
tera heltzen dira sigla batzuk; horrelakoak letra xehez idazten dira oso-
osorik. Izen arrunt bilakaturiko siglak hiztegietan agertzen dira.
Adibideak:
laser, quasar, sonar, radar, hies, bit...
Akronimoetan hasierako letra baino ez da larriz idazten.
Adibideak:
Bizkaibus (eta ez *BizkaiBus), Euskotren (eta ez *EuskoTren)...

20

2. Letra larriaren eginkizunak edo funtzioak
Hitz bat letra larriz hasita idazteko, badira bi arrazoi nagusi: bata, hitz
horrek testuan duen kokapena edo posizioa; bestea, hitz horren izaera bera.
Lehen kasuan, kokapenak eragiten du letra larria; bigarrenean, berriz,
nabarmentze- edo bereizte-funtzioa betetzeko erabiltzen da.

2.1. Kokatze-funtzioa
Puntuazio-zeinuek eta testuaren antolamenduak erabakitzen dute
hitz baten lehen letra noiz idatzi behar den larriz (atal honetan ematen
diren adibideetariko asko euskarazko liburuetatik hartu dira, dela lite-
raturazkoetatik dela bestelakoetatik).

2.1.1. Testuaren hasieran
Letra larriz hasita idazten da beti edozein idazkiren lehen hitza.
Adibideak:
Jaun-andreok, egun on!
Agur t'erdi:
Gerokoak geroko, euskaraz egin nahi nuke...

2.1.2. Puntuaren ondoren
Kasurik ugariena da. Puntuak esaldiaren amaiera adierazten du, eta
hurrengo esaldiaren lehen hitza letra larriz hasita idazten da beti,
berdin dio hurrengo esaldia paragrafo berean edo hurrengo paragrafoan
idaztekoa den. Adibideak:
Hartu arnasa. Utzi kezkak alde batera. Kendu zapatak, modua baldin badau-
kazu. Askatu pijamako botoiak ere, ohean baldin bazaude.
Kontuan izan laburduren puntuaren ondoren eta ordinalen puntuaren
ondoren ez dela letra larririk idatzi behar, puntu horiek ez baitute esal-
diaren amaiera adierazten4. Adibideak:
Argazkiak, infogramak, grafikoak, etab. erabiltzen dira, askotan, gure aldizkarian.
Orotariko Euskal Hiztegiaren I. liburukiko sarrerako XIV. orrialdean ageri da.

4 Kontuz ibili behar da ordenagailu bidezko testu-tratamenduen automatismoak ezartzean,
aplikazio informatiko batzuek automatikoki ezartzen baitute letra larria puntuaren ondoren.

21

2.1.3. Galdera- edo harridura-markaren ondoren
? eta ! markek prosodia-, joskera- eta esanahi-ezaugarri bereziak
dituzten perpausen amaiera adierazten dute. Halakoetan, marka
horien ondorengo hitza letra larriz hasita idatzi behar da. Adibideak:
Zergatik berezia? Zer du diferentea? Ez al da beste edozein bezalako liburu bat,
prezio jakin bat ordainduta edo liburutegian eskatuta eskuratu duzuna?
Hori duk hori sakea! Nondik atera zaio?
Dena dela, galdera laburren sorta bat edo harridura-perpaus
laburren sorta bat dagoenean, bata bestearen atzetik idatziak, auke-
rakoa da haietako bakoitza unitate beregaintzat hartzea, goragoko
adibideetan bezala, edo, multzoa unitatetzat harturik, komaz edo
puntu eta komaz bereiztea haietako bakoitza. Hala jokatuz gero,
lehenengo galde- edo harridura-perpausaren hasieran baino ez da
idatzi behar letra larriz. Adibidez:
Non bizi da?; zarauztarra da?; noiz hasi da tabernan lanean?; zergatik etorri da
berandu?

2.1.4. Eten-puntuen ondoren
Eten-puntuek esaldiaren amaiera adierazten dutenean, letra larriz
hasita idatzi behar da haien ondorengo hitza. Adibideak:
(...) Eskerrik asko, eskerrik asko... Zuek bezala ez dakigu, baina amaren bula-
rretik haziak gaude behintzat.
(...) babalore, historia fidagarririk gabeko, alfer, axolagabe, optimista... Beude
berean.
Baina, batzuetan, eten-puntuek esaldia une batez eten bai baina
berriro hartzen dute berehala, esaldiari amaiera eman gabe.
Horrelakoetan ez da letra larririk idatzi behar. Adibideak:
(...) ohar bedi irakurlea Lancre-ren formulak «sasi guztien gainetik...» ezagu-
narekin duen antzaz.
(...) zeren delitua da hori ere... gezur biribilak botatzea.

2.1.5. Parentesi arteko testua
Puntu baten ondoren dagoen parentesi arteko testuko lehen hitza
letra larriz hasita idatzi behar da. Adibidez:

22

Alegia, arin-arinka gauzen gainetik pasatzeagatik, arazoen astuna astunagotzen
dutela. (Honaino sermoia).
Baina esaldi baten barnean parentesia zabaltzen bada (tarteki gisa,
alegia), parentesi arteko testuaren hasieran ez da letra larririk erabiltzen,
esaldi osoa ez bada. Adibidez:
Baina, hartarako (liburuak argitaratu ahal izateko, alegia), hiru gauzaren
beharra dugu.
Gramatika batzordea egiten ari den gramatikan aurkituko du behar duen infor-
mazioa, literatura-tradizioan oinarritua (ikus EGLU II, 387.-392. or.).
Nolanahi ere, esaldi baten barnean zabaldu den parentesian esaldi
oso bat komatxo artean dagoenean parentesi artean (norbaitek esana edo
idatzia hitzez hitz jasotzeko, esate baterako) letra larriz hasita idatzi
behar da hasierako hitza. Adibidez:
Eritasunak adoregabe utzi zuen («Ez naiz ezertarako gauza»), eta hitz egiteko
gogorik ere ez zuen.

2.1.6. Komatxo arteko aipuak
Zuzeneko aipuak edo adierazpenak komatxo artean idazten badira
(ikus estilo-liburuaren lehen liburukia, Ortotipografia, 23. or.), lehen
hitza letra larriz hasita idatzi behar da; hala ere, aipua eteten bada,
aipuaren jarraipenean ez da letra larririk idazten. Adibideak:
Lehendakariak esan zuen: «Ezin dugu hori horrela onartu».
«Ezin dugu hori horrela onartu» —esan zuen lehendakariak— «baina prest
gaude eztabaidatzen jarraitzeko».
Komatxo artean dagoen aipua edo adierazpena esaldi handiago
baten barnean gertatzen bada eta komatxo arteko zatia sintaktikoki
beregaina ez bada, komatxo arteko zatiaren hasieran ez da letra larririk
idazten. Adibidez:
Alde horretatik, negoziazioetan «orain dagoen arazo nagusia konponduko den
itxaropena» agertu du alkateak.
Goiko adibidean «orain dagoen arazo nagusia konponduko den
itxaropena» zatia ez da esaldi osoa, ez da beregaina, eta ezin da ulertu
ondokoa gabe, nahiz eta norbaitek egindako adierazpen baten zatia izan.

23

2.1.7. Bi puntuen ondorengo testua
Estilo-liburuaren Ortotipografia liburukian zehaztuta dago bi puntuen
ondorengo idazkera. Hona hemen, hitzez hitz:
Bi puntuen ondoren lerro berean segitzen denean, honako irizpide
hauen arabera ebazten da letra xehez ala letra larriz idatzi behar den:
• Esaldi osoko aipamenetan, letra larriz idatzi behar da lehen hitzeko
lehen letra.
Gogoratu haren hitzak: «Herri oso bat itzultzaile bihurtzeak baditu bere
arriskuak; ongi agerikoak, gainera».
• Esaldi oso baten zati baizik ez diren aipamenak, letra xehez.
Gogoratu zer esan zigun: «bildu eta hitz egitea» dela premiazkoena.
• Aurreko zatiaren osagarriak letra xehez hasi behar dira.
Hizkuntza hori ez da bere buruaren jabe: besteren legeak dauzka gogoan.
Oharra:
Bi puntuen ondorengo osagarriak esaldi bat baino gehiago baditu,
orduan, paragrafo berria hasi nahi ez bada, bi puntuen ordez puntu
bakarra idaztea da irtenbidea:
1.Honela gertatu zen istripua. Autoa bere bidetik zetorren, baina azkarregi.
Errepidea bustita zegoen. Oinezkoa errepidea zeharkatzen hasi zen, eta...
2.Honela gertatu zen istripua:
Autoa bere bidetik zetorren, baina azkarregi; eta errepidea bustita zegoen.
Oinezkoa errepidea zeharkatzen hasi zen, eta...
Okerreko antolaera
3. Honela gertatu zen istripua: autoa bere bidetik zetorren, baina azkarregi; eta
errepidea bustita zegoen. Oinezkoa errepidea zeharkatzen hasi zen, eta...
Bi puntuen ondoren paragrafo berria hasten denean, honako irizpide
hauen arabera ebazten da letra xehez ala letra larriz idatzi behar den:
• Gutun hasierako diosal eta deikien ondoren, larriz idatzi behar da
lehen hitzeko lehen letra.
Agur, irakurle maitea:
Zuri eskerrak eman beharrean gara, berriro ere, gure liburuak erosten segi-
tzeagatik.

24

• Zerrendetan, lehen hitzeko lehen letra maiuskulaz idatzi behar da
esaldi osoak dituztenean.
Datorren astearteko bileran egitekoak:
—Aurreko bileraren agiria irakurri eta, ongi irudituz gero, onartzea.
—Hurrengo jardunaldiko programaren xehetasunak aztertzea.
—Norberak dakartzan proposamenak aurkeztea.
• Zerrendak letra xehez hasi behar dira esaldi osokoak ez direnean.
Hauek dira alorrez alorreko euskalgintzako profesionalak:
—irakasleak (hezkuntza orokorrekoak nahiz euskaltegietakoak)
—kazetariak
—itzultzaileak, idazleak eta argitaratzaileak
—...

2.1.8. Zerrendak5
Gehienetan, zerrendaren hasiera datorrela adierazteko, bi
puntuak erabiltzen dira, eta, ondoren, enumerazio-markak jarri ohi
dira, hau da, gidoia edo puntu lodia (- / – / •), zerrenda alfabetikoa (A,
B, C... / a, b, c...) edo zenbaki bidezkoa (1., 1.1., 1.2., 2. ... / I., II., III.,
IV. ...). Ez dirudi arau orokorrik eman daitekeenik, eraguztietako iriz-
pideak erabiltzen baitira, baina idazki berean edo idazki sail batean
irizpide bakarra erabili behar da beti. Oro har, liburu eta
agirien atal eta kapituluen —eta haien aurkibideen— izenburuetan,
larriz idazten da lehen hitzeko lehen letra, eta bukaeran ez da
punturik jartzen. Adibidez:
1. Perpausa
1.1. Perpaus motak
1.2. Perpausen sailkapena
1.2.1. Atribuzio-perpausak
(...)
1.3. Perpausaren egitura
(...)
2. Izena

5 Estilo-liburuaren Ortotipografia liburukiaren «Bi puntuen ondorengo idazkera» atalaren
osagarria.

25

Testu barnean, berriz, bi puntuen ondorengo idazkeran zehaztu den
bezala (ikus 2.1.7 atala) jokatzen da, hau da, letra larriz esaldi osoak
direnean eta letra xehez esaldi osoak ez direnean.

2.2. Nabarmentze-funtzioa
Letra larriz hasten dira pertsona-izenak eta toki-izenak6. Adibidez:
Ainhoa, Iñaki, Usurbil, Gorbeia, Zuberoa, Jupiter...
Baina irizpide orokor hori lausotzen hasten da izen berezirik ez
duten edo izen bereziz bakarrik osatuak ez diren «izendapenetan».
Adibidez:
Euskaldunon Egunkaria, Bigarren Mundu Gerra, Itsaso Beltza, Ekialde Hurbila,
Hezkuntza Saila, Urriko Iraultza, Nekazaritza Politika Bateratua, Zigor Kodea,
Justizia Auzitegi Nagusia, Nazioarteko Terminologia Biltzarra...
«Izendapena» hitz multzo bat da, bere horretan errealitate edo izate geogra-
fiko, administratibo, kultural, politiko, historiko edo bestelakoa izendatzen duena.
Izendapenetan, ia beti, osagai generikoa eta osagai espezifikoa
bereiz daitezke. Osagai generikoak mota, multzo, klase edo genero bat
adierazten du, eta, kategoriaz, izen arrunta izan ohi da. Adibidez
(nabarmentzeko, osagai generikoa azpimarraturik ageri da adibideetan):
Victoria aintzira, Sezesio Gerra, Helsinkiko Agiria, Frantziako Iraultza,
Hezkuntza Saila...
Osagai espezifikoak, berriz, izendapenaren izen berezia adierazten
du. Adibidez (nabarmentzeko, osagai espezifikoa azpimarraturik ageri
da adibideetan):
Victoria aintzira, Urbieta kalea, Euskal Herriko Unibertsitatea...
Baina izen arrunta ere izan daiteke:
Sezesio Gerra, Konstituzio plaza, Lehen Mundu Gerra...
Edo izenondoa izan daiteke:
Itsaso Hila, Ibai Gorria, Espainiako Gerra Zibila, Depresio Handia...

6 Erabilera estilistiko eta markatu berezi batzuetan, hala ere, hautsi daiteke araua, baina
erabilera horiek literaturaren munduan gertatu ohi dira, ez ikasmaterialetan

26

Izendapenek izen bereziaren estatusa bereganatu dute, izen berezi
bihurtu dira —izendapena osatzen duten hitzetan ez da nahitaez izen
berezirik behar—, eta, hortaz, gutxienez letra larri bat behar dute.
Izendapena nolakoa den, izendapena osatzen duten hitzetariko lehe-
nengoan bakarrik agertuko da letra larria (Urbieta kalea, Nobel saria) edo
guztietan (Maiatzaren Lehena, Ekialde Urruna, Udako Euskal Unibertsitatea).
Letra xehez idatzita ez luketen esanahia lortzeko hartzen dute izen-
dapen horiek letra larria, hau da, nabarmentzeko edo bereizteko. Izan
ere, izen arrunta izen berezi bihurtzen du letra larriak. Hortaz, balia-
bide tipografiko huts baten bidez –hitz baten lehen letra ondoko letrak
baino handiagoa izatea–, balio sinbolikoa ematen zaio hitzari. Honako
adibide hauetan, argi ikusten da letra larrien erabilerak eragiten duen
oposizio semantikoa:

Balio arrunta Balio berezia

aintzira handiak Aintzira Handiak (leku-izena)

mendi harritsuak mendi harritsuak (leku-izena)

kongresu garrantzitsu bat Estatu Batuetako Kongresua (erakundea)

automobil beltza Itsaso Beltza (leku-izena)

erdialdeko mendigunea Erdialdeko Mendigunea (leku-izena)

berdeak Berdeak (alderdi politikoa)

Izendapenetan, zalantza nagusi bat izaten da: ea larriz lehen hitzaren
lehen letra bakarrik ala hitz guztien lehen letra idatzi behar den.
Inguruko hizkuntzetara begiraturik, berehala ikusten da irizpideak ez

27

datozela bat hizkuntza batean eta bestean. Adibidez, hona hemen Europar
Batasunaren erakunde baten izena hainbat hizkuntzatan:

ingelesa Court of Justice and Court of First Instance

gaztelania Tribunal de Justicia y Tribunal de Primera Instancia

frantsesa Cour de justice et Tribunal de première instance

alemana Gerichtshof und Gericht erster Instanz

italiera Corte di giustizia e Tribunale di primo grado

nederlandera Hof van Justitie en Gerecht van eerste aanleg

suediera Domstolen och förstainstansrätten

finlandiera Yhteisöjen tuomioistuin ja ensimmäisen oikeusasteen tuomioistuin

Badira arau edo joera orokorrak, baina errealitatea konplexua da,
ustekabez eta zirrikituz betea. Horregatik, erabiltzaileari letra larrien
erabilerari buruzko gomendioak emateko orduan, errealitate konplexua
ahalik eta xeheen islatzeko, komeni da erabilera-esparruak ahalik eta
zehatzen zedarritzea.

2.2.1. Pertsona- eta jainko-izen bereziak
2.2.1.1. Pertsonen izen-deiturak
Pertsona-izen eta -deiturak letra larriz hasita idazten dira. Adibidez:
Marie Sklodowska edo Marie Curie; Albert Einstein; Ainhoa Arteta; Karlos
Santamaria...
Baita hipokoristikoak ere:
Joxepa, Montxo, Patxi, Txetxu, Tony, Vicky, Paco...

28

Deituretako artikuluak, preposizioak eta bestelako partikulak, oro
har, letra xehez idaztekoak dira. Adibideak:
Louis de Broglie, Charles de Gaulle, Juan de Mena, Jean Le Rond d' Alembert,
Vincent van Gogh; José Maria de Eça de Queirós, Emil Adolf von Behring,
Otto von Bismarck, Wernher von Braun...
Hala ere, ponte-izenik gabe erabiltzen direnean, letra larriz idazten
dira. Adibidez:
Van Gogh, De Gaulle, Von Behring...
Bestalde, frantsesezko deituretako artikulua (ez preposizioak) letra
larriz idazten da. Adibidez:
Jean de La Fontaine, Jean-Bernard Le Blanc...
Eta italierazko zenbait deituratako preposizioak ere larriz hasita
idazten dira:
Gabriele D'Annunzio, Manuela Di Centa...
Azkenik, kontuan izan behar da gerta daitekeela jatorrizko
hizkuntzan ez bezala erabiltzea letra larriak zenbait deituratan, beste
herrialde batekoak direnean. Adibidez:
Mona Jane Van Duyn, de Valera (Éamon de Valera adierazteko, baina
ponte-izenik gabe erabilia)...
Oharra:
Kontuan izan izen bereziek, zenbaitetan, esanahi generikoa hartzen
dutela, alegia izen arrunt bihurtzen direla. Hori gertatzen da artelan bat
adierazten duten pertsona-izenekin; hau da, egilearen izenaren bidez
adierazten dira, generikoki, haren artelanak. Dena dela, horrelakoetan
ere letra larriz idatzi ohi dira. Adibideak:
Museoan lapurreta egin dute: 10 Txillida, 6 Picasso eta Monet guztiak eraman
dituzte, baina Kandinskyak utzi egin dituzte.
Lehendakariak Renoir bat du bulegoan.
Beste batzuetan, izen arrunt bihurtzen da pertsona-izena, baina
jatorrizko esanahia aldatuta. Halakoak, izen arrunt diren aldetik, hizte-
gietan agertzen dira eta letra xehez idazten. Adibideak:
Gure aitona alzheimerrak jota dago.
Estatu Batuetan, parkinsona sendatzeko botikak sortu nahi dituzte.

29

2.2.1.2. Izengoiti eta ezizenak
Letra larriz hasita idazten dira izengoiti eta ezizenak. Adibideak:
Alexandro Handia, Antso Azkarra, Joana Eroa, Pello Errota, Bizargorri kortsa-
rio ospetsua, Altzoko Erraldoia, Indalezio Bizkarrondo Bilintx...
Benetako izena idatzi beharrean izen antonomasikoak erabiltzen
direnean (izengoitiak benetako izenaren ondoan erabili beharrean bene-
tako izenaren ordez izengoitia jartzea da antonomasia), haien osagai
guztiak letra larriz hasita idatzi behar dira7. Adibideak:
Apostolua (Done Petri adierazteko); Lehoi Zaharra (Churchill adierazteko);
Orléanseko Dontzeila (Joana Arc-ekoa adierazteko); Hizlari Erromatarra
(Zizeron adierazteko)...
2.2.1.3. Jainkoak eta pertsonaia mitologikoak
Jainko-jainkosen eta pertsonaia mitologikoen izenak letra larriz
hasita idazten dira jainko-izenak jainkoa bera edo haren irudia izendatzen
duenean. Adibideak:
Venus, Zeus, Jainkoa, Ala, Jahve, Luzifer, Mari, Olentzero, Amon, Espiritu
Santua...
Oharra:
Jainkoen izen antonomasikoak letra larriz idatzi ohi dira. Erlijio
monoteistetan —eta erlijio monoteistak nagusi diren herrialde eta
hizkuntzetan, hala nola kristautasuna Euskal Herrian— jainko hitza
larriz hasita idatzi ohi da, erlijio horietako jainko jakin hori adierazten
baitu. Eta dena delako jainkoa izendatzeko erabili ohi diren bestelako
izen eta izenlagunak ere larriz idazten dira, dena delako jainko horren
izenaren ordez erabiltzen direnean. Adibideak:
Denok Ahalguztidunak sortuak gara.
Zergatik zu zaren ene Kreatzaile goikoa.
Bai, hura da Mesias egiazkoa.
Eta Ama Birjina da Salbatzailearen ama.
Izaki mitologikoen kopuru mugatua ordezkatzen duten izenak,
hau da, zenbatu daitezkeenak, letra larriz hasita idatzi behar dira
7 Ikus, dena den, 3.14 puntua

30

(horretan bat datoz gaztelania, frantsesa eta ingelesa). Adibidez,
grekoen mitologian, mendekuen jainkosak Eriniak edo Eumenideak
ziren, erromatarren Furiak zirenak (hiru ezagutzen dira); Gorgoiak ere
hiru ahizpa dira, Medusa da famatuena; Nereidak, Nereoren 50 alabak;
Pleiadeak, Atlasen zazpi alabak.
Graziak, Musak, Furiak, Eriniak edo Eumenideak, Nereidak, Pleiadeak,
Gorgoiak...
Izaki mitologikoen kopurua mugagabea denean, letra xehez idazte-
koak dira. Adibideak:
itsaslaminak, amazonak, ziklopeak, walkiriak, huriak, titanak, aingeruak, sera-
finak, kerubinak, sirenak, zentauroak...
Badira, gainera, pluralez baino erabiltzen ez diren izaki mitologi-
koak ere: galtzagorriak.
Jakiteko irizpide horien arabera izen horietatik zein den letra larriz
idaztekoa eta zein letra xehez, aski da entziklopedietan begiratzea.
2.2.1.4. Fikzio-pertsonaiak eta animalia antropomorfoen izenak
Literaturan, herri-tradizioan edo fikzio-sorkuntzan (ikus-entzunez-
koetan) asmatutako pertsonen izen bereziak nahiz pertsona gisa jokatzen
duten animalien izenak izen berezitzat hartzen dira, eta letra larriz hasita
idazten dira8. Adibideak:
Peru Abarka, Petiri Santz, Ziripot, Miel Otxin, On Kixote Mantxakoa,
Superman, Charlot, Asterix, Txanogorritxo, Errauskine, Mateo Txistu, Katu
Botaduna, Itzalik Gabeko Gizona, Loti Ederra, Peter Pan, Donald ahatea,
Pluto, Bambi...
2.2.1.5. Dinastiak, leinuak eta familiak9
Dinastia eta familia edo leinuak adierazteko, izen/izenondo erato-
rriak lortzen dira deitura + (t-/d-)ar eginez. Dinastia- eta familia-izenak
izen arruntzat hartzen dira, eta letra xehez idazten dira. Adibideak:
8 Hala ere, kontuan hartu osagai generikoak ez direla izen bereziak (Pintto txakurra, Donald
ahatea).
9Herritarren izenak (gasteiztarrak, bizkaitarrak...) ez dira letra larriz idazten. Ikus 3.3
puntua.

31

Bizkaiko oñaztarrak, ganboarrak, beaumontarrak, agaramontarrak, habsburgo-
tarrak, akemenestarrak, antoninotarrak, klaudiotarrak...
Oso pilotari handiak dira retegitarrak.
Florentzian medicitarrak jaun eta jabe izan ziren.
Borgia familiako kideak: borgiatarrak.
Filipe V.arekin iritsi ziren borboitarrak Gaztelako koroara.
Mailegatutako dinastia-izenak ere letra xehez idazten dira.
Adibideak:
abbadiak, mamelukoak, haxemiak, lagidak, fatimiak, merovingioak...
2.2.1.6. Izen bereziekin batera erabiltzen diren izendapen
generikoak
Pertsonak izendatzeko, batzuetan, pertsonaren izen bereziarekin
batera, beste izen generiko batzuk erabiltzen dira aposizioan. Izen
horiek definitu egiten dituzte pertsonak; pertsonen titulua edo duin-
tasuna (erregina, kondea, lehendakaria, dohatsua, aita santua...), lanbidea edo
kargua (irakaslea, pilotaria, ministroa, zuzendaria, idazlea, marinela...), ahai-
detza (izeba, osaba, arreba, ahizpa, anaia, amona, emazte...) edo nortasunaren
alderdiren bat zehazten dute, edo, besterik gabe, adeitasunezko
deiturak (andre, jaun, maisu...) izaten dira. Aposizioan ematekoak diren
izen generiko horietariko batzuk izen bereziaren aurrean idaztekoak
dira, eta beste batzuk ondoan.
Izendapen generiko horiek letra xehez idazten dira dagokien izenaren
ondoren jartzen direnean, baita laburdura direnean ere. Adibideak:
Lazkao Txiki bertsolaria, Trajano enperadorea, Joane Somarriba txirrindularia,
Antso Azkarra erregea, Agirre lehendakaria, Joan XXIII.a aita santua, Etxenike
irakaslea, Elkano nabigatzailea, Virginia Woolf idazlea, González jauna /
González jn., Idoia Zenarrutzabeitia andrea / Idoia Zenarrutzabeitia and.,
Inozentzio V.a dohatsua...
Ahaidetza denean, alderantzizko hurrenkera erabili ohi da: dago-
kion izenaren aurretik, alegia. Horrelakoetan ere, letra xehez idazten
dira. Adibideak:
Gure izeba Mari Karmen, aitona Juan Mari, emazte Itziar...

32

Halaber idazten dira letra xehez lanbidea, titulua edo kargua adie-
razten duten hitzak, dagokien izenaren aurrean zein atzean idatz
daitezkeenean. Adibideak:
George Bush lehendakaria; Margarita erregina
AEBko lehendakari George Bush; Danimarkako erregina Margarita
Dagokien izenaren aurretik baino ezin jar daitezkeen euskarazko titu-
lu- edo duintasun-hitzak, berriz, letra larriz hasita idazten dira. Adibideak:
On Joxe Migel Barandiaran, Musde Irigarai, Aita Donostia, Aita Patxi Altuna,
Ama Margarita Maria Lopez de Maturana, Ama Maria Josefa, Ama Teresa
Calcuttakoa, Anaia Balentin, Anaia Garate...
Erdaretako titulu- eta duintasun-hitzetan, jatorrizko erabilera atxi-
kiko da. Adibideak:
Sir Winston Churchill, Lord Kelvin, frai Bartolomé de las Casas, don Alberto,
doña Marta, Sir William Wallace, Sir Isaac Newton, Lord Byron, sor Luisa...
2.2.1.7. Izen berezirik gabe erabiltzen diren izendapen
generikoak
2.2.1.7.1. Azalpena
Aurreko puntuan adierazi den moduan, askotan erabiltzen dira
izendapen generikoak pertsonen izen berezien ondoren, pertsona horien
lanbidea, kargua edo beste zerbaiten berri emateko. Izendapen lagun-
garri horiek letra xehez idatzi behar direla zehaztu da aurreko puntuan.
Testuinguru askotan, baina, izendapen generiko horiek gailendu
egiten zaizkio laguntzen duten izen bereziari; izendapen generikoak
—edo izendapen generikoaren zati batek— ordezkatu egiten du lehe-
nago izen bereziak eta izendapenak osatzen zuten unitatea. Izen berezia
desagertu egiten da orduan.
Ohiko prozedura da, oso, ordezkapen hori, eta badira zenbait
arrazoi horrela jokatzeko. Zenbaitetan, kargua bera garrantzitsua-
gotzat edo adierazgarriagotzat hartzen da kargu horretan une horretan
dagoen pertsona baino:
Gaur goizean, Miren Azkarate Kulturako sailburuak esan du...
Gaur goizean, Kulturako sailburuak esan du...

33

Askotan, berriz, testua arintzeko prozedura hutsa da batzuetan izen
berezia bakarrik erabiltzea eta beste batzuetan izendapena bakarrik era-
biltzea, edo biak txandakatzea testuan:
Eusko Jaurlaritzako Kulturako sailburu Miren Azkaratek jakinarazi du... (...)
gaineratu zuen sailburuak. (...) adierazi zuen Miren Azkaratek. (...) esan zuen
sailburuak.
Azken batean, hizkuntza-ekonomiaren legeak, ahaleginik txiki-
enaren legeak, agintzen du hor ere (testua ulertzeko behar den ahalik
eta informazio gutxiena ematea): ez dago errepikatu beharrik lehe-
nago emandako informazioa edo ezaguna dena.
Eta badira, azkenik, antonomasiaz erabiltzen direnak edo, karguan
bakarrak direlako, izen berezia erabat ordezkatzen duten izendapenak ere:
Gaur, Benedikto XVI.a aita santuak esan du... [¡] Gaur, Aita Santuak esan du...
Ordezkatze horren emaitza den izen arrunta letra larriz hasita idatzi
behar da?
Batetik, izendapenak izen berezi bat ordezkatzen duenez (Miren
Azkarate Kulturako sailburua [¡] Sailburua), hori adierazteko funtzioa betetzen
du letra larriak, hau da, ezin da ukatu lagungarri gertatzen dela. Alde
horretatik, erabilgarria da letra larria; zilegi, beraz.
Bestetik, irizpide horren aplikazioa muturrera eramanez gero, letra
larriz josiko lirateke testu asko, beharrik gabe josi ere, irakurleak, gehie-
netan, ez baitu inolako zalantzarik ordezkapena ulertzeko, eta garbi dago
Kulturako sailburua delako osagaiak aukera garbia ematen duela Miren
Azkarate edota Miren Azkarate Kulturako sailburua berreskuratzeko. Beraz,
esan liteke anafora moduko zerbait dela, erreferentziakide bat dela.
Oro har, badirudi esapide generikoetan eta testuinguru gabekoetan
behar handiagoa suma daitekeela letra larria erabiltzeko; testu ongi egi-
turatuen eta logikoen barnean, ordea, esan daiteke erreferentziakidea
dela eta, hortaz, ez dela beharrezkoa letra larria.
Bestalde, badirudi senak —tradizioak edo ohiturak ondutako
senak— mugatu egiten duela prozedura bereziaren erabilera —proze-
dura berezia baita, ez dezagun ahantz, letra larriaren erabilera—. Izan

34

ere, badirudi ez dela prozedura orokorra eta nekez aplikatuko litzateke-
ela lanbide edo kargu askorekin. Adibidez:
Naroa Agirre atletak aldatu egin du entrenamendu-plana (...) Atzo, kazetarien
aurrean, atletak aitortu zuen...
Bitxia litzateke bigarren perpausean «atletak» dioen tokian
«Atletak» idaztea.
Badirudi, beraz, badirela mugak prozedura horretara jotzeko. Esan
liteke dena delako erakunde edo giza talde baten barneko hierarkian oso
gora —edo goren— ageri direnekin baino ez dela erabilgarri, hain zuzen
ere, hierarkiaren goiko erpinean direnak oso bakanak —edo bakarra—
direlako. Egia da, halaber, letra larria holakoetara mugatzea letra larriaren
erabilera «erreberentziazkora» hurbiltzea edo lerratzea dela.
Bestalde, erreberentziazko erabilera gehiegizkoa ikusten da batzuetan
—aurreko paragrafoan aipatutako dena delako hierarkiatik kanpo ere—
oso dokumentu formaletan (hitzarmen pribatuetan, administrazio-idazki
batzuetan edo zenbait enpresa eta erakunderen idazkietan, adibidez):
(...) Hitzarmena sinatzeko, bildu dira: batetik, Errentaria, ordezkariaren bidez.
Bestetik, Errentatzailea, bere izenean eta bere eskubideak baliatuz aritu dena.
Erreberentziazko erabilera hori gehiegikeria da, eta halakoetan letra
larria ez erabiltzea gomendatzen da. Beraz, aurreko adibidea honela
idaztekoa da:
(...) Hitzarmena sinatzeko, bildu dira: batetik, errentaria, ordezkariaren bidez.
Bestetik, errentatzailea, bere izenean eta bere eskubideak baliatuz aritu dena.
2.2.1.7.2. Irizpidea
Horiek horrela, hona hemen irizpidea testu arruntetarako eta esko-
la-materialetarako:
• Izendapenak pertsonaren izen berezia ordezkatzen duenean, errefe-
rentziakidetzat hartzekoa da; ez da, beraz, letra larririk erabili behar.
• Irizpide orokor horretatik kanpo, letra larriz hasita idatz daitezke,
baina ez da nahitaezkoa, izendapen hauek: aita santua, dalai lama,
errege-erreginak (eta kidekoak: enperadoreak) eta estatuetako
presidenteak edota estatuburuak. Adibideak:

35

Gaur bilduko dira Euskaltzaindiko idazkaria eta EHUko errektorea.
Irratian entzun dugu Eusko Jaurlaritzako Justiziako sailburua eta Espainiako
Justiziako ministroa atzo bildu zirela.
Gure eskolako zuzendariak onartu egingo du irakasleen proposamena.
Iaz, euskaltzainburua Ameriketan izan zen.
Gaur argitaratu da prentsan alkatearen dekretua.
Lan-erreformari laster ekingo diotela adierazi du ministroak.
EAEko lehendakaria Txilen eta Argentinan izan da duela gutxi.
Atzo, Frantziako presidentea Erresuma Batuko lehen ministroarekin bildu zen.
Bihar, Leioako campusean, errektorearekin batera, Bizkaiko ahaldun nagusia eta
lehendakaria [EAEko lehendakaria adierazteko] ere izango dira ekitaldian.
Europako Parlamentuko idazkari nagusiak irakurri du adierazpena.
Horretarako, administrazio-zuzendariaren sinadura behar da.
Irango atzerri-ministroa Bruselan da gaur.
Eusko Jaurlaritzako Kulturako sailburuak prentsaurrekoa eman du gaur.
Hauetan, berriz, letra xehea nahiz larria erabil daiteke:
Joan den astean, aita santuak bidaia luzea egin zuen.
Aspalditik bizi da erregina (= Ingalaterrako erregina = Elisabet II.a erregina)
Buckingham Palacen.
Udan Mallorcan bizi ohi da erregea (= Espainiako erregea = Joan Karlos erre-
gea), eta neguan Madrilen.
Potalan dago dalai lamaren jauregia.
Edo:
Joan den astean, Aita Santuak bidaia luzea egin zuen.
Aspalditik bizi da Erregina (= Ingalaterrako erregina = Elisabet II.a erregina)
Buckingham Palacen.
Udan Mallorcan bizi ohi da Erregea (= Espainiako erregea = Joan Karlos erre-
gea), eta neguan Madrilen.
Potalan dago Dalai Lamaren jauregia.
Ez dira nahastu behar izen berezirik gabe erabiltzen den izendapen
generikoa eta izendapenaren erabilera erabat arrunta, izen berezi jakin bati
atxikirik ez doana alegia, orduan letra xehez idazten baita beti. Adibideak:
Zer aita santu izango dugu 2050. urtean?
Ingalaterran ez da erreginarik izango XXII. mendean.
Frantzian, hurrengo lehendakaria emakumezkoa izango da.

36

Oharrak:
• Arartekoa letra larriz hasita erabiltzen da instituzioaren izena
delako, baina, izen bereziarekin batera doanean edo erreferentzia
soil denean, letra xehez idaztekoa da. Adibidez:
Gipuzkoako Foru Aldundiaren eta Arartekoaren arteko lankidetza-hitzarmena.
Iñigo Lamarka EAEko arartekoak prentsaurrekoa emango du bihar.
Arratsaldean, arartekoa elkarrizketatuko dute Euskadi Irratian.
• Kargu edo duintasunaren ohorezko trataeretan edo protokolo-
trataeretan ere (eskutitzen goiburuan, adibidez) letra larriz
hasita idatzi ohi da, trataeraren barruan kargudunaren izen
berezia agertu zein ez.
Adibideak:
Mercedes Guerrero Lehendakari Andre Txit Argia
edo
Lehendakari Andre Txit Argia
Jose Luis Bilbao Eguren Jaun Txit Gorena
edo
Jaun Txit Gorena
Virginia Aleman Alkate Andre Txit Gorena
edo
Alkate Andre Txit Gorena
Hala ere, salbuespen hori egiteko benetako arrazoirik ez dago.
Hobe da, beraz, horrelakoak ere irizpide nagusira biltzea, eta letra
xehez idaztea. Adibideak:
Mercedes Guerrero lehendakari andre txit argia
edo
lehendakari andre txit argia
José Luis Bilbao Eguren jaun txit gorena
edo
jaun txit gorena
Virginia Aleman alkate andre txit gorena

37

edo
alkate andre txit gorena
• Antonomasiaz erabiltzen direnean, letra larriz hasita idatzi behar
dira. Alegia, pertsona bakar bati baino ez dagokion titulua izen
berezira asimilatzen da, eta, orduan, letra larriz idazten da.
Adibideak:
Denok dakigu Caudilloa ohean hil zela.
Italian, dagoeneko inor ez da gogoratzen Duceaz.
• Hitz-elkarteetan, letra larriaren erabilerari dagokionez, ezinbestekoa
da aposizioa (Uztapide bertsolaria, Ebro ibaia, izeba Maria) eta mendeko-
tasunezko izen-elkartea (behi-esne, leku-izen, eguzki-lore) bereiztea.
Aposizioak, «dena delako izena duen zerbait» izendatzeko era-
biltzen dira (Uztapide bertsolaria = Uztapide izena duen bertsolaria;
Ebro ibaia = Ebro izena duen ibaia; izeba Maria = Maria izena duen
izeba), eta ohikoa da dena delako hori izen berezia izatea eta,
beraz, letra larriz hasita idaztea.
Mendekotasunezko elkarteetan, lehen osagaia mugatzailea da eta
bigarrena mugakizuna. Bigarren osagaia da sintagmaren burua,
eta, lehenengo osagaia letra larriz hasita idatziz gero, ulertu behar
litzateke letra larria elkarteari dagokiola, hots, sintagma osoari.
Adibidez, eklipseei buruz ari garela, Ilargiaren eklipsea idatziko da,
baina, hitz-elkartera joz gero, ilargi-eklipsea idazten da, ez *Ilargi-
eklipsea; izan ere, *Ilargi-eklipsea idatziz gero, adieraziko genuke
letra larriz idaztekoa dela hitz-elkartearen emaitza, eta hori ez da
hala, ilargi-eklipsea eklipse mota bat baita, eta eklipse hitza, elkar-
ketaz zehaztua zein ez, ez da izen berezia).
Beraz, Kulturako sailburua idaztea zuzena da (Miren Azkarate Eusko
Jaurlaritzako Kulturako sailburua da), kultura-sailburua idaztea ere zuzena
da10 (Miren Azkarate kultura-sailburuak adierazi du...). Ez da idazkera ego-

10 kultura-sailburua formaren ordez, kultura sailburua aldaera ere —marratxorik gabe,
alegia— zuzena da, marratxoa aukerakoa baita. Dena dela, Euskaltzaindiak marratxoz nahiz

38

kia, ordea *Kultura-sailburua forma, ezta *Kultura sailburua ere (ez baita
aposizioa; alegia, ez da hau: Kultura izena duen sailburua).
Horiek horrela, idazkera hauek dira hobestekoak:
Justiziako ministroa edo justizia-ministroa (eta ez *Justizia(-)ministroa)
Atzerriko ministroa edo atzerri-ministroa (eta ez *Atzerri(-)ministroa)
Estatuko idazkaria edo estatu-idazkaria (eta ez *Estatu(-)idazkaria)
2.2.1.8. Hagionimia: santuei eta Ama Birjinari deitzeko izenak
Santuen izenen aurretik erabiltzen diren San, Santa, Santi, Dona,
Done edo Jaun Done (baita Jondoni eta Jondane ere) izendapenen hasierako
letra maiuskulaz idazten da. Eta Kristoren ama aipatzeko
erabiltzen diren Andre, Andra, Andredena eta Andre Dona izendapenak ere
bai. Adibideak:
Done Petri, Santa Barbara, Done Salbatore, San Agustin, Santa Katalina, San
Tomas, Dona Julia, Andre Maria (Andra Maria /Andredena Maria / Andre Dona
Maria), San Sebastian, Jondoni Paulo...
Oharra:
Izen bereziaren aurretik ez doazenean, santu, santa eta done izen
arruntak dira (santu eta done, bestalde, badira izenondo ere), eta, beraz,
letra xehez idazten dira. Adibideak:
Zeruan diren santu eta santa guztiak.
Frantzisko Xabierkoa santu handia izan zen.
Liburuak santa horren mirariak kontatzen ditu.
Katalina santua.
Adalbaldo, gizon argia, ederra, ona eta donea.
Oharra: santuen izenetatik eratorritako herri eta hirietako jaien
izenak letra xehez eta pluralez idazten dira. Ikus 3.4 puntua.

bereiz idazteko aukera emana duen hitz elkartuak marratxoz idaztea hobesten da ikasmate-
rialetan. Bestalde, Kultura Sailburua idaztea ere zuzena litzateke ohorezko trataeretan edo
protokolo-trataeretan kultura-sailburua formaren ordez; hala ere, 2.2.1.7 puntu honetako
bigarren oharrean adierazi den moduan, hobe da horrelakoetan ere letra xeheak erabiltzea.

39

2.2.2. Animalia-izen bereziak
Letra larriz idazten da animalia-izen berezien hasierako letra.
Adibideak:
Pintto, Laika, Lassie (txakurrak); Rocinante (zaldia); Dolly (ardia); Txita
(txinpantzea); Flipper (izurdea); Islero (zezena); Moby Dick (balea)...
Oharra:
Animalia-arrazak eta aldaerak letra xehez idazten dira. Adibideak:
dobermana, betroia, pertxeroia...

2.2.3. Gauzakien izen bereziak eta abstrakzioak
2.2.3.1. Abstrakzioak eta pertsonifikazioak
Letra larriz hasita idazten dira izaki bizidun gisa aurkezten diren
izen arruntak. Adibideak:
Gure artean Bakea biziko den garai bat izango dela amestu nuen.
Gauaren erdian Herio etorri zen, eta haur jaioberria berekin eraman zuen.
Orduan, Justizia agertu zitzaidan, balantza eskuan zuela.
Agur eta ohore, andre Askatasuna!
Ikurritz, goiburu eta leloetan ageri diren hitz nagusiak11 ere letra
larriz hasita idatz daitezke. Adibideak:
«Ekin eta Jarrai» da Euskaltzaindiaren ikurritza; «Asmoz ta Jakitez», Eusko
Ikaskuntzarena.
Frantziako Errepublikaren ikurritza: «Askatasuna, Berdintasuna, Elkartasuna».
Luzeagoak edo esaldi osoak direnean, berriz, ohikoa da letra xehez
idaztea eta letra larria lehen hitzaren hasieran bakarrik jartzea.
Adibideak:
Muxika arerioagaz haginka (muxikatarren leinuaren goiburua).
Fidelissima Vardulia nunquam superata (Gipuzkoaren armarriko goiburua).

11 Hitz nagusiak dira: izenak, izenordainak, izenondoak, erakusleak, zenbatzaileak, izenla-
gunak, aditzak eta adizkiak, aditzondoak eta adberbioak. Ez dira hitz nagusitzat hartzen junta-
gailuak, lokailuak, postposizioak —eta postposizioetatik eratorritakoak— eta bestelako parti-
kulak (ote, al, ez, bezala...); hala ere, berez nagusi ez izan arren, eduki semantikoagatik edo enfasia-
gatik, letra larria har dezakete.

40

2.2.3.2. Gauzakien izen bereziak
Izen berezia dutenean, gauzakiak letra larriz hasita (eta letra etzanez)
idazten dira. Adibideak:
Excalibur (ezpata), Tizona (ezpata), Max Luzea (kanoia)...
2.2.3.3. Ibilgailuen izen bereziak
Era guztietako ibilgailuen izen bereziak letra larriz hasita (eta letra
etzanez) idazten dira. Adibideak:
Enola Gay, Spirit of Saint Louis (hegazkinak)
Apollo 11, Mir, Mariner 5 (espazio-ontziak)
Mayflower, Titanic, Santa Maria, Nautilus, Prestige (itsasontziak)
Libia, Ama Guadalupekoa, Kanpa, Erreka (traineruak)
Oharra:
Ez dira nahasi behar izen bereziak modelo edo marken izenekin.
Modelo- eta marka-izenak ez dira letra etzanez idazten (ikus 2.2.3.5).
Spirit of Saint Louis hegazkin jakin baten izena da, hau da, bakarra.
Concorde hegazkin-modelo baten izena da, eta Tomahawk misil mota
batena, hau da, bada Concorde eta Tomahawk bat baino gehiago.
2.2.3.4. Produktuak
Janari-edarien eta bestelako produktuen sor-marka ofizialen hitz
guztiak letra larriz hasita idazten dira. Adibideak:
Getariako Txakolina, Errioxako Ardoa, Idiazabalgo Gazta...
Oharra:
Erabilera metonimikoan (produktua adierazteko, produktua ekoizten
den lekua idaztea produktuaren izenaren ordez), leku-izena produktu-
izena izatera pasatzen da, eta, ondorioz, letra xehez idazten da. Adibideak:
Atera bi errioxa eta rueda bat.
Oharra:
Sor-marka ofizialetik aparte, produktuen izen generikoak letra
xehez idazten dira. Adibideak:
Zer nahi duzu: Bakioko txakolina ala Getariakoa?
Errioxako ardoa gero eta garestiagoa da.

41

Zerbitzu-enpresen produktu eta zerbitzuen izenak ere letra larriz
idazten dira (non eta enpresa horien estiloak, diseinuak edo maketak
kontrakoa agintzen ez duten). Adibideak:
Euskaltel Leihoa zerbitzua, Kredikutxa Pertsonala kreditua, Visa Classic txartela...
2.2.3.5. Markak eta modeloak
Letra larriz hasita idazten dira produktuen marken eta modeloen
izenak. Adibideak:
Bi Kas, Cinzano bat eta hiru Campari.
Mégane berria baxuagoa da Focus berria baino.
Seat Leon beltzaren eta Opel Astra zuriaren artean utzi dut neure Golfa.
Aurten Airbus gehiago saldu dira Boeing baino.
Minak dago eta Nolotil bat hartzeko esan diot.
Orain, Viagra hartzen hasi da.
Microsoften Word, Excel eta PowerPoint dira erabilienak.
Hala ere, batzuetan, markak edo modeloak izen arrunt bihurtu dira
(izendapen generiko, alegia); orduan, letra xehez idatzi behar dira. Izen
arrunt bihurtu direnak hiztegietan agertzen dira, eta, batzuetan, grafia
ere egokitu egiten da. Adibideak:
aspirina, zelofana, uralita...
Oharra:
Erabilerak izen arrunt bihur ditzake edozein marka edo modelo.
Gainera, batez ere teknologia-izenekin eta aplikazio informatikoen
izenekin, bi erreferente aipa daitezke: batetik, aplikazioa bera (PowerPoint
aplikazioa, adibidez); bestetik, aplikazio horren bidez lortutako emaitza
(adibidez: bihar PowerPoint/powerpoint bat bidaliko dizut posta elektronikoz).
Emaitza izen arrunta da, eta, alde horretatik, errazago onartzen du letra
xehea. Alde horretatik, fikzioan (eleberrietan, adibidez), edo hain formalak
ez diren idazkeretan (blogetan, adibidez), izen arrunt gisa eta letra xehez
idatzita erabili ohi dira maiz (eta grafia egokitua ere bai, batzuetan).
Adibidez:
Baina nire powerpointaren zain bahago, badaukak puska baterako.
Ardo-botila bat eta kokakola-botila handi bat zituzten mahai gainean.
Nolanahi ere, idazkera berezi horietatik kanpo, jatorrizko grafiaz
eta letra larriz hasita idatzi behar dira.

42

2.2.3.6. Internet hitza
Mundu osoko ordenagailuen artean datuak trukatzeko balio duen
sare informatiko globala da Internet.
Gainerako komunikazio-sistemekin aldera daiteke; telefonoa-
rekin edo telegrafoarekin, esate baterako. Beraz, telefono hitza letra
xehez hasita idazten bada, beste hainbeste egin liteke, eta hitz arrunt
gisa deklinatu, teorian: interneta, internetaren... (telefonoa, telefonoaren...
egiten den bezala).
Hala ere, Internet sareen sarea da, munduan bat bakarra, eta
hitzaren jatorrizko hizkuntzan, ingelesean, Internet eta internet (internet-
work hitzaren aldaera laburra, TCP-IP protokoloa erabiltzen ez duten
bestelako sare taldeak izendatzen duen terminoa) bereizten dira, eta
hortik zabaldu da beste hizkuntzetara Internet letra larriz hasita. Letra
larriz idazten da inguruko hizkuntza gehienetan (ingelesa, nederlan-
dera, gaztelania —RAEren erabakia—, katalana, frantsesa, italiera,
portugesa...; frantsesez ere bai, eztabaida eta guzti, eta letra xehez
idaztearen aldeko joera bizia bada ere). Euskaraz ere letra larriz hasita
idazten da, eta izen berezi gisa deklinatzen: Internet, Interneten... Haren
bertsio aurreratua den Internet-2 / Internet II / abiadura handiko Internet ere
era berean idatzi behar da.
Baina letra xehez idatzi behar dira —eta hitz arrunt gisa dekli-
natu— Internet ez diren gainerakoak: infraneta, intraneta, estraneta.
2.2.3.7. Erakunde, instituzio, enpresa eta orotariko taldeen izenak
Gaur egungo nahiz antzinako era guztietako erakunde publiko nahiz
pribatu, instituzio, enpresa, sozietate, elkargo, alderdi politiko, sindikatu,
elkarte eta antzeko taldeen izena osatzen duten hitz nagusiak11 letra larriz
hasita idazten dira. Askotan, erakundeen izen generikoak (fundazioa, erki-
degoa, unibertsitatea, elkartea, erakundea...) erakundeen izenaren parte
dira eta, ondorioz, larriz idazten dira haiek ere. Adibideak:
Bizkaiko Lan Ordezkaritza; Elgoibarko Institutua; Elhuyar Fundazioa;
Nafarroako Foru Erkidegoa; Euskal Herriko Unibertsitatea; Euskal Telebista;
Euskaldunon Egunkaria; Probintzia Auzitegiko Zigor Arloko Sala; Nazio
Batuen Erakundea; Gizarte Segurantza; Europako Kontseilua; Ministerio

43

Fiskala; Euskal Herriko Bertsozaleen Elkartea; Eusko Ikaskuntza; Usurbilgo
Udala; Euskal Autonomia Erkidegoko Izatezko Bikoteen Erregistroa;
Nafarroako Gobernua; Frantziako Gobernua; British Petroleum; Athletic Club;
Eusko Alderdi Jeltzalea; Euskadiko Alderdi Sozialista; Al Kaeda; Jerusalemgo
San Joan, Rodas eta Maltako Ordena Subirano Militar eta Ostalaria; Ekialdeko
Indietako Konpainia Ingelesa; Eusko Langileen Alkartasuna; Opus Dei; Euskal
Itzultzaile, Zuzentzaile eta Interpreteen Elkartea; Harvard Unibertsitatea;
EAEko Justizia Auzitegi Nagusia; Auzitegi Gorena; Nazioarteko Zigor
Auzitegia; Filologia, Geografia eta Historia Fakultatea; Alkorta Anaiak SA;
Miren Arrandegia SM...
Oharra:
Ez dira nahasi behar enpresaren izen ofiziala eta izendapen arrunta.
Adibidez, enpresa baten izen ofiziala Miren Arrandegia, SM baldin bada,
horrek ez du esan nahi arrandegi horren errotuluan edo publizitatean
Miren Arrandegia, SM jarri beharra dagoenik. Enpresaren izena osorik
jartzen ez bada, Miren arrandegia idazkera dagokio, Gaztelupe taberna,
Fototxukun argazki-denda, Osasuna belar-denda eta abar egiten den moduan.
Testuetan erakundeak aipatzean, erakundearen izendapen ofizialaz
gainera, badira beste bi aipamolde: (A) erakundearen izendapenaren parte
bat bakarrik erabiltzea, eta (B) erakundearen izendapenaren ordezko beste
izen bat erabiltzea.
A. Erakundearen izendapenaren parte bat bakarrik erabiltzea
Askotan, erakundearen izen osoa idatzi beharrean, eta labur-
tzearren, haren zati bat baino ez da idazten (Udala, Diputazioa,
Gobernua, Polizia, Parlamentua, Armada, Fundazioa...), eta
testuinguruak argitzen du zer erakunde den. Halakoetan ere,
idazten den zatia letra larriz hasita idatz daiteke. Adibideak:
Kasu horretan, Udalak ezin du ezer egin, Diputazioak erabaki behar du
(baldin eta generikoak ez badira eta —lehenago aipatu direla
eta— zer udal eta zer diputazio diren badakigu).
Elgoibartik iritsi da berria: kanpainan parte hartzea erabaki du Ikastolak
(Elgoibarko Ikastola adierazteko).
Orain ere, Usurbilen dago Fundazioaren egoitza (Elhuyar Fundazioa adie-
razteko).

44

Juan Ignacio Pérez Iglesias errektoreak Unibertsitatearen ikasketa-plan
berriak aurkeztu ditu (Euskal Herriko Unibertsitatea adierazteko).
Gaur, Fiskaltzak kereila jarri du Atutxaren aurka (Estatuko Fiskaltza
Nagusia laburturik esateko).
Laster onartzekoa da aurrekontua Parlamentuan (baldin eta nongo par-
lamentua den badakigu).
Hildako gehienak Gobernuaren aldeko milizianoak dira (baldin eta
nongo gobernua den badakigu).
Edo, bestela, testuan lehenago aipatua ordezkatzeko, erreferen-
tziakide modura:
Kasu horretan, udalak ezin du ezer egin, diputazioak erabaki behar du
(lehenago aipatu den dena delako diputazioa ordezkatzeko).
Elgoibartik iritsi da berria: kanpainan parte hartzea erabaki du ikastolak
(Elgoibarko Ikastola adierazteko).
Orain ere, Usurbilen dago fundazioaren egoitza (Elhuyar Fundazioa adie-
razteko).
Juan Ignacio Pérez Iglesias errektoreak unibertsitatearen ikasketa-plan
berriak aurkeztu ditu (Euskal Herriko Unibertsitatea adierazteko).
Gaur, fiskaltzak kereila jarri du Atutxaren aurka (Estatuko Fiskaltza
Nagusia adierazteko, baina haren ordez erabilita).
Laster onartzekoa da aurrekontua parlamentuan (badakigu nongo parla-
mentua den).
Hildako gehienak gobernuaren aldeko milizianoak dira (badakigu nongo
gobernua den).
Kasu honetan, berriz, aukera bakarra da, Jaurlaritza ez baita izen
arrunta:
Eskumen gehiago eskatu ditu Jaurlaritzak (Jaurlaritza bakarra baita:
Eusko Jaurlaritza).
Pluralean erabiltzen direnean edo esanahi generikoa dutenean,
aldiz, letra xehez idazten dira. Adibideak:
Euskal Autonomia Erkidegoko diputazioak.
Probintzia bakoitzak bere diputazioa du.
Euskal Herrian ditugun unibertsitateak.
Hiru urte barru unibertsitatera joango da.

45

Europako estatuak ez dira ados jartzen kanpo-politikan.
Zein da Europako estaturik boteretsuena?
Mediterraneoko estatuen interesak defendatzeko prest agertu dira estatu-
buruak.
Baltikoko errepublikak.
Esan zuen Afrikan gobernu demokratiko gutxi dagoela.
Ezkerreko alderdiek parlamentu federal bat sortu nahi dute.
B.erakundearen izendapenaren ordezko beste izen bat erabiltzea
Erakunde edo talde bat izendatzeko izen ofiziala –osorik edo
partez– erabiltzen ez bada, eta hari erreferentzia egiten dion
beste izendapen sinonimoren bat erabiltzen bada haren ordez,
hau da, erreferentziakide bat erabiltzen bada (askotan, izena +
erakuslea erabiltzen da), erreferentziakidean ez da letra larririk
erabiltzen. Adibideak:
Garbi dago erakunde horretan aldaketa sakonak egin behar direla (badaki-
gu zein erakundez ari garen, lehenago aipatu delako edo jakina
delako).
Zer moduz dabil talde txuri-urdina? (Real Sociedad adierazteko).
Ez, gure erakundea ez da berria, baina fundazio gisa bai (irakurleak badaki
zer erakunde den).
2.2.3.7.1. Estatua
Berariazko azterketa behar du «estatu» hitzak, adiera bat baino
gehiago baitu12.
1. Lurraldea
Adiera geografiko hutsa duenean, letra xehez idazten da,
«probintzia», «kontinentea» eta lurralde-eremu bat adierazten
duten gainerako hitzetan bezala. Adibidez:
Mitinak ematen ibili zen estatuaren bazter batetik bestera, eta kontinente
osoan ere hara-hona aritu zen elkartasun-taldeak sortzen.

12 Gaztelaniaz eta frantsesez aski sistematikoa da letra larriz hasita idaztea «estado/état»
hitza. Tradizioak eta erreberentziazko erabilerak izan dezakeen pisuaz gainera, kontuan izan
behar da halako balio «diakritikoa» duela, nolabait esatearren, hots, guztiz bestelako esana-
hia duen «estado/état» (egoera) hitzetik bereizteko balio duela.

46

Surinamgo iparraldean lurra landuta dago, baina estatuaren hegoaldean
oihan tropikala da nagusi.
Batzuek diote estatuko hiri garrantzitsuena Bartzelona dela, eta ez Madril.
2. Antolamendu politikoa
Herrialde subirano jakin baten gobernu-organoen multzoa edo
herrialde jakin hori osatzen duen batasun politikoa adierazten
duenean, bi erabilera bereizi behar dira.
—Generikoa, estatuaren izen bereziarekin batera erabiltzen
denean13:
Euskal lurraldeen eta Espainiako estatuaren arteko elkarbizitza politikoa
Nork irabaziko ditu Frantziako estatuko presidentea hautatzeko hautes-
kundeak?
—Izendapena, estatuaren izen bereziaren laguntzarik gabe:
Letra larriz hasita idatz daiteke, baina ez da nahitaezkoa: erre-
ferentziakidetzat har daiteke. Letra larriz hasita idazten bada,
ulertu behar da erreferentea antolamendu politikoa dela, ez
lurraldea. Adibideak:
Joan Karlos erregea izango da, hil arte edo abdikatu arte, Estatuaren
burua (Espainiako estatuaren burua).
edo
Joan Karlos erregea izango da, hil arte edo abdikatu arte, estatuaren
burua (testuinguruak argitzen duen estatu jakinaren burua;
kasu honetan, Espainiarena).
Urrian aurkeztu zuen Gobernuak Madrilgo Kongresuan Estatuaren
aurrekontu orokorren proiektua (Espainiako estatua adierazteko).
edo
Urrian aurkeztu zuen Gobernuak Madrilgo Kongresuan estatuaren
aurrekontu orokorren proiektua (testuinguruak argitzen duen
estatu jakinaren burua; kasu honetan, Espainiarena).

13 Aposizioa da, Garaziko herria, Iratiko basoa, Gipuzkoako probintzia edo Bilboko hiria diren bezala.
Eta letra xehez idaztekoa da

47

Chirac-ek dio gazteek eta langileek ulertu behar dutela baliabideak
mugatuak direla, Frantzia ez dela munduko lurralderik aberatsena; ale-
gia, Estatua ez dela ahalguztiduna (Frantziako estatua adierazteko).
edo
Chirac-ek dio gazteek eta langileek ulertu behar dutela baliabideak
mugatuak direla, Frantzia ez dela munduko lurralderik aberatsena; ale-
gia, estatua ez dela ahalguztiduna (testuinguruak argitzen duen
estatu jakinaren burua; kasu honetan, Frantziarena).
Beraz, honela laburbil daiteke irizpidea:

lurraldea letra xehez

ESTATUA

antolamendu
politikoa

estatuaren izen
berezirik gabe letra xehez

letra xehez
(aipaturiko estatua)
estatuaren izen
bereziarekin batera
letra larriz
(izendapen laburtua)

Oharrak:
• Estatu bakoitzak hartzen duen izena hartu behar da kontuan.
Estatuek bi izen izan ohi dituzte: bata ofiziala da (estatu guztiek
ez, baina gehienek badute izen ofiziala), estatuak berak bere
buruari eman diona (izen ofiziala osatzen duten izen guztiak
letra larriz hasita idazten dira; adibidez, Frantziako Errepublika,
Espainiako Erresuma, Britainia Handiko eta Ipar Irlandako Erresuma

48

Batua, Alemaniako Errepublika Federala, Tanzaniako Errepublika Batua);
bestea, berriz, izen ofizialaren izendapen laburtua da, gehien
erabiltzen dena (aurreko adibideen kasuan, hauek dira, hurrenez
hurren, izendapen arruntak: Frantzia, Espainia, Erresuma Batua,
Alemania, Tanzania).
• Zenbaitetan, estatuen izen arruntak erabili beharrean, haien
ordezko izendapenak erabiltzen dituzte gurean idazle eta hiztun
batzuek, batez ere —edo bakar-bakarrik— Espainiari eta
Frantziari buruz aritzean. Halakoetan, espainol estatua / estatu
espainola / Espainol estatua / Estatu espainola / espainol Estatua / espainol
estatua eta frantses estatua / estatu frantsesa / Frantses estatua / Estatu
frantsesa / frantses Estatua / estatu Frantsesa esan edo idazten dute Espainia
/ Espainiako estatua edo Frantzia / Frantziako estatua esan edo idatzi
beharrean. Ez du ematen izendapen berezi eta berri horren era-
bilera aldeztekoa denik, oso zabalduta badago ere (izan ere,
Araba edo Arabako probintzia esan edo idatzi beharrean, arabar
probintzia esatea bezain bitxia da). Haien ordez, gorago azaldu
den moduan, hobe da Espainiako estatua / Frantziako estatua edo,
bestela, Estatua/estatua besterik gabe erabiltzea.
• Batzuetan, Iberiar penintsula izendapena ere ikusten da Espainiako
estatua behar lukeen tokian. Kontuan izan behar da Iberiar penin-
tsula izendapen geografiko hutsa dela eta ezin dela erabili adiera
horretatik at, are gutxiago Espainiako estatuaren sinonimo gisa
(gaur egungo Andorra, Espainia eta Portugal estatuek parte-
katzen duten lurraldea da Iberiar penintsula).
• Estatu Idazkaritza eta Estatuko idazkaria idatzi behar da (baina estatu-
idazkaria; ikus 2.2.1.7 puntua), «Estatu» hitza letra larriz hasita
alegia, erakundea adierazten baitu hor «estatu» hitzak.
Adibideak:
Condoleezza Rice Ameriketako Estatu Batuetako estatu-idazkaria da.
Ekialde Hurbilean izan berri da AEBko Estatuko idazkaria.
Industria, Turismo eta Merkataritzako Ministerioko estatu-idazkaria.
Vatikanoko Estatu Idazkaritzan lan egin zuen.

49

• Erreferente jakina ez duenean, hau da, esanahi generikoa duenean,
letra xehez idazten da «estatu» hitza. Adibideak:
Pasaporteaz gainera, bisa ere behar da estatu batzuetan sartzeko.
Hori ez da zuzenbide-estatua, eta bai, ordea, salbuespen-estatua.
1799an, Napoleonek estatu-kolpe bat eman zuen.
Europako estaturik gabeko nazioak
estatu zentralista; estatu federala; estatu-eredua; estatu-ituna; estatuaren
botereak
• Erreferente bat baino gehiago adieraztean, erreferenteak jakinak
direnean ere, letra xehez hasita idazten da «estatu» hitza.
Adibideak:
Espainiako eta Frantziako estatuak
Europako estatuen arteko mugak irekiak dira, baina mugiezinak.
Aurrez aurre ageri dira estatuen Europa eta herrien Europa.
Europar Batasuneko estatu kideak behartuta daude defizita kontrolatzera.
• Estatu baten barneko banaketa administratiboaren barneko
lurralde-entitatea adierazten duenean, hau da, probintzia, auto-
nomia-erkidegoa, departamendua, eskualdea edo maila horretako
entitatea denean, letra xehez hasita idazten da. Adibidez:
Chiapasko estatua; São Pauloko estatua; Texasko estatua
2.2.3.7.2. Administrazioa
Botere-antolamendu (estatua, autonomia-erkidegoa, probintzia...)
baten edo haren mendeko zerbitzu publikoak adierazteko termino gene-
rikoa da. Bakarrik doala, letra larriz hasita idazten da. Adibideak:
Hori Administrazioaren erabakia da.
Ez dakigu zein den Administrazioaren ikuspegia.
Bai, Administrazioan lan egiten du, baina ez da funtzionarioa.
Haren barneko atalak ere letra larriz hasita idazten dira. Adibideak:
Eusko Jaurlaritzaren Osasun Administrazioaren ordezkariek ere parte hartu
dute.
Ogasunaren eta Justizia Administrazioaren organoen arteko harremanak
Modu generikoan erabiltzen denean, berriz, letra xehez idazten da.
Adibideak:

50

Tokiko administrazioen modernizazioa
Afrikako estatu gehienetan, osasun-administrazioa penagarria da.
2.2.3.8. Era guztietako erakunde eta taldeen mendeko kudeake-
ta-organo, sail, talde eta batzordeen izenak
2.2.3.7 puntuan esandakoak balio du era guztietako erakunde,
elkarte, enpresa, talde publiko nahiz pribatuen kudeaketa-organo, egi-
tura, antolakunde eta sailen izendapenetarako ere, baita, erakundeen
kasuan bezala, osorik idazten ez direnean ere. Alegia, letra larriz hasita
idatzi ohi dira. Adibideak:
Industria, Merkataritza eta Turismo Saila; Euskaltzaindiaren Jagon Saila;
Atzerri Ministerioa eta Defentsa Ministerioa; Ministroen Kontseilua; Eusko
Jaurlaritzaren Kontseilua; Diputatuen Kontseilua; NBEko Segurtasun
Kontseilua; EHUko Klaustroa; Elhuyar Fundazioaren Patronatua; Nafarroako
Gobernuko Landa Garapeneko eta Ingurumeneko Departamentua; Gipuzkoako
Foru Aldundiaren Kultura, Euskara, Gazteria eta Kirol Departamentua; Eleka
Sozietate Mugatuaren Administrazio Kontseilua; Elgoibarko Euskara
Mintegia; CIDETECeko Material Berrien Saileko Polimero Eroaleen Arloa;
Hizkuntza Politikako Sailburuordetza; Eusko Jaurlaritzaren Argitalpen
Zerbitzu Nagusia; Urtxintxa Saila; Elgoibarko Institutuko Ingeles Mintegia...
Alabaina, hori ez da beti betetzen. Dena delako erakundearen
mendeko atalaren izen generikoa (lantaldea, taldea, batzordea, komi-
sioa, saila...) letra xehez idazten da askotan. Adibideak:
Euskaltzaindiaren Onomastika batzordea, Usurbilgo Udalaren Hirigintza batzor-
dea, Hizkuntza Kalitateko lantaldea, EHUko Administrazio Zuzenbidea arloa...
Bigarren bide hori, hala ere, ez dago beti aukeran. Izan ere,
batzuetan, izen generiko horiek erakundearen izenaren parte nahitaez-
koa dira, eta, orduan, letra larriz hasita idazten dira. Adibideak:
Euskal Kultur Taldea (EKT), Euskal Kostalde Ez-nuklearraren Aldeko
Batzordea, Euskararen Aholku Batzordea, Europako Batzordea...
Nazioarteko Elektroteknia Batzordea (IEC, International Electrotechnical
Commission; CEI Commission électrotechnique internationale)
Nazioarteko Argiztapen Batzordea (CIE, Commission Internationale de
l'éclairage)
Balore Merkatuen Batzorde Nazionala (CNMV, Comisión Nacional del
Mercado de Valores)

51

Aldaera horiek guztiak ikusita, hiru puntu hauetan laburbil daiteke
irizpidea:
1. Erabilera generikoan, ez da letra larririk erabiltzen (hirigintza-
batzordea / hirigintzako batzordea; kultura-saila / kulturako saila).
Adibideak:
Zein dira hirigintza-batzordeen funtzioak?
Auzo-elkartearen barnean, kultura-sail txiki bat antolatu zuten.
2. Erakunde publiko nahiz pribatu baten mendeko atala denean,
hau da, berezko izaera duenean edo erakundetuta dagoenean,
izen berezi bihurtzen da, eta, erabilera generikotik bereizteko,
letra larriz hasita idazten da (Hirigintza Batzordea / Hirigintzako
Batzordea; Kultura Saila / Kulturako Saila; Giza Baliabideen Batzordea).
Adibideak:
Gure herrian, alkateak murriztu egin ditu Hirigintza Batzordearen esku-
menak.
Bizkaiko Foru Aldundiaren Kultura Saila
Etxebizitza eta Gizarte Gaiak Saila / Etxebizitza eta Gizarte Gaietako Saila
Ikasmaterialen Aholku Batzordea
3. Izen berezia denean, hala ere, bada beste aukera bat: aposizio-
bidea hartzea. Orduan, atal espezifikoa letra larriz hasita idazten
da, eta izen generikoa, berriz, letra xehez idaztea gomendatzen
da (Hirigintza batzordea). Halakoetan, letra etzana erabil daiteke
izen espezifikoa nabarmentzeko (Hirigintza batzordea). Adibideak:
EHUko Adierazpen Grafikoa eta Ingeniaritzako Proiektuak saila
Euskaltzaindiaren Gramatika batzordea
Irizpidea, beraz, irekia da. Erabilera generikoa alde batera utzita,
noiz bigarren aukera erabili (Hirigintza Batzordea) eta noiz hirugarrena
(Hirigintza batzordea) ez da zehazten erraza, eta ez du ematen irizpidea
estuagotzea, gaur egun, zuhurra denik. Euskaltzaindiaren kasuan, berak
hobetsiak dira “Gramatika batzordea” moldekoak.
Hala ere, bada muga garbi bat aposizio-bide horren aplikazioari
dagokionez: osagai espezifikoak (letra larrizkoak) nola edo hala bene-
tako izen berezitzat hartzeko modukoa izan behar du, bere horretan:

52

Onomastika/Literatura/Gramatika [izeneko] batzordea
Hirigintza [izeneko] batzordea
*Aholku [izeneko] batzordea.
Azken horren modukoetan, generikoa izendapenaren osagai berezko
eta nahitaezkoa da, eta ezin liteke zatitu aposizioaren mekanismoaz: edo
dena generikoa da (letra xehez: aholku-batzordea), edo dena izen berezi
(letra larriz: Aholku Batzordea).

2.2.4. Entitate abstraktuak
2.2.4.1. Zientzia eta teknologiako terminoak
Lege, teorema, printzipio, gaixotasun, sindrome eta zientzia-
kontzeptuen osaeran izen bereziek parte hartzen dutenean, letra larriz
hasita idazten da izen berezia, eta letra xehez izen arrunta. Adibideak:
Plancken konstantea, Pitagorasen teorema, Rorschach testa, Joule efektua,
Ohmen legea, Down sindromea, Parkinson gaixotasuna (baina parkinsona ere
idatz daiteke, letra xehez, guztiz lexikalizatuta alegia), Arkimedesen
printzipioa, Otto zikloa, Magdeburgeko hemisferioak, Hilberten espazioa...
Izen berezirik ez dagoenean, letra xehez idaztekoak dira.
Adibideak:
grabitazio unibertsala, erlatibitatearen teoria, energiaren kontserbazioaren
printzipioa, eskaintza-eskarien legea...
Unitateen izenek, askotan, pertsona-izen batean dute jatorria.
Hala ere, unitateak izen arruntak dira, eta letra xehez idazten dira.
Unitateen ikurrak nazioarteko estandarretan ezarritakoaren arabera
idaztekoak dira, dela larriz dela xehez (adibidez, jatorrian pertsona-
izena duten unitateen ikurra letra larriz idatzi ohi da). Adibideak
(ikurra parentesi artean ageri da):
newtona (N), amperea (A), joulea (J), coulomba (C), pascala (Pa), watta (W),
ohma (Ω)...
Oharra:
Unitateen ikurrak eta unitateen aurrizkien ikurrak aldaezinak
dira (batzuk letra larriz idazten dira, eta beste batzuk letra xehez), eta
irizpide estetikoen eta diseinuaren gustuen gainetik daude. Hortaz,

53

dena delakoagatik testu zatiren bateko letra guztiak larriz edo xehez
idaztea erabakitzen bada, kontuan izan behar da unitateen eta unita-
te-aurrizkien ikurrak ezin direla aldatu. Bestela, adibidez, mili- (m) eta
mega- (M) edo piko- (p) eta peta- (P) aurrizkiak nahasi egingo lirateke, edo
tesla (T) eta tona (t) edo segundo (s) eta siemens (S) unitateak. Adibideak:
600 kW-eko motorra, 20 h-ko tartea, 45 s-tik gorako atzerapena...
600 kW-EKO MOTORRA, 20 h-KO TARTEA, 45 s-TIK GORAKO
ATZERAPENA...
2.2.4.2. Biologia: bizidunen sailkapen sistematikoa
Biologian, bizidunen espezieak izendatzeko —animaliak, landa-
reak, onddoak, bakterioak—, nomenklatura binomiala erabiltzen da,
latinezko bi osagaiz osatua: lehenengoak generoa adierazten du, eta
letra larriz hasita idazten da; bigarrena, berriz, espeziearen bereizga-
rria da, eta letra xehez idazten da. Beraz, generoa bakarrik idazten da
letra larriz hasita; bai generoaren, bai espeziearen bereizgarria, berriz,
letra etzanez idazten dira. Subespezieak eta aldaerak hiru izenez osa-
tuta daude (espeziearen biak eta hirugarren bat). Hirugarren izen
hori letra xehez idazten da. Espezie-izen arruntak letra xehez idazten
dira. Adibideak:
panda gorria edo Ailurus fulgens; Weddel itsas txakurra edo Leptonychotes
weddelli; izurde arrunta edo Delphinus delphis; ametza edo Quercus pyrenaica;
Hyla versicolor chrysoscelis; Otis asio naevius...
Generotik gorako kategoriak ere latinez idazten dira, eta letra larriz
hasita beti (familia, ordena, klasea...), baina ez dira letra etzanez idazten.
Eta haietatik mailegatu zein eratorritako izenak eta izenondoak letra
xehez idazten dira. Adibideak:
Gizakia Homo sapiens espezieko animalia da, Homo generokoa, Hominidae fami-
liakoa, Anthropoidea subordenakoa, Primates ordenakoa, Eutheria subklase-
koa, Mammalia klasekoa, Vertebrata subfilumekoa, Chordata filumekoa eta
Animalia erreinukoa.
Bovidae familiako animaliak bobidoak dira.
Gepardoa felido bat da, Felidae familiakoa.
Guanakoa eta alpaka artiodaktiloak dira (Artiodactyla ordenakoak).

54

2.2.4.3. Ospakizun erlijiosoak, zibilak, politikoak edo bestelakoak
Letra larriz hasita idazten dira izendapenaren hitz guztiak.
Adibideak:
Eguberri, Eguberriak, Gabonak, Aste Santua, Aberri Eguna,14 Aste Nagusia,
Ostiral Santua, Maiatzaren Lehena, Eskerrak Emateko Eguna, Ostegun Gizena,
Ingurumenaren Nazioarteko Eguna, Gay Harrotasunaren Eguna, Emakume
Langilearen Nazioarteko Eguna, Giza Eskubideen Nazioarteko Urtea
Oharra:
Auzo, herri eta hirietako jaien izena letra xehez idazten da, eta
pluralean deklinatzen. Ikus 3.4 puntua.
2.2.4.4. Historiako gertakariak
Oro har, hasierako letra maiuskulaz idazten da gertakari historikoen
izendapenetan. Oso sail zabala osatzen dute historiako gertakariek
(gerrak, guduak, iraultzak, itunak, bakeak, ligak, aliantzak, batasunak,
hitzarmenak, planak...). Estilo-liburuaren hirugarren liburukian,
Onomastikan, berariaz aztertu, eta irizpideak zehaztu ziren. Hona hemen:
Gertaera historikoen izendapena bi izenez —gutxienez— osatu ohi
da (hitz bakarreko Karlistaldia modukoak salbuespenak dira): izen
berezi bat eta izen berezi hori sailkatzen duen izen arrunt bat. Bi izen
horiek, bestalde, hainbat modutan elkartu daitezke gertaera histori-
koaren izendapena osatzeko:
• Hitz-elkarketa, aposizioa zein bestelakoa (edo izen bakarra).
Adibideak:
Maginot Lerroa, Marshall Plana, Ondorengotza Gerra, San Bartolome Gaua,
Nabigazio Agiria, Bigarren Mundu Gerra, Ezarpen Agiria, Kultura Iraultza,
Karlistaldia...

14 Aberri Eguna / Aberri-eguna izendapen berezia da, Eusko Alderdi Jeltzaleak lehen aldiz 1932an
antolatu zuena eta haren ondorengoak izendatzeko balio duena. Beste nonahikoa bada,
Aberriaren Eguna izendapena erabiltzea komeni da, hori baita joskera normala (Maiatzaren 25ean,
Aberriaren Eguna ospatzen dute argentinarrek). Izan ere, ez dira gauza bera patata-urtea (2008. urtea, patata-
urtea) eta patataren urtea (2008. urtea, Patataren Urtea). Ildo beretik, eta ohiturak ohitura, hauek dira
gomendatzekoak: Sagardoaren Eguna, Arrantzalearen Eguna, Txakolinaren Eguna, Berdelaren Eguna (eta ez:
*Berdel Eguna; *Berdel-eguna)...

55

• Izen + izenondo egitura. Adibideak:
Depresio Handia, Izurrite Beltza, Gerra Punikoak, Lehen Gerra Punikoa,
Trek Handia, Martxa Luzea, Aliantza Hirukoitza, Konbentzio Nazionala...
• -ko edo -en atzizkia + izena egitura. Adibideak:
Pragako Udaberria, Cádizko Konstituzioa, 68ko Maiatza, Labana Luzeen
Gaua, Gernikako Estatutua, Bergarako Hitzarmena, Vienako Konbentzioa,
Helsinkiko Agiria, Maastrichteko Ituna, Basileako Itunak, Maiatzaren
Hiruko Fusilatzeak, Gatzaren Matxinada, Giza Eskubideen Adierazpen
Unibertsala, Maiatzaren Lehena, Aliantza Hirukoitzaren Gerra, Inbestiduren
Eztabaida, Borodinoko Gudua, Lepantoko Gudua, Golkoko Gerra, Sei
Egunetako Gerra, Bi Arrosen Gerra, Nantesko Ediktua, Ekialdeko Zisma,
Postdamgo Konferentzia, Berlingo Kongresua...
Horietan guztietan, bai izen berezia (espezifikoa), bai arrunta (gene-
rikoa) letra larriz hasita idaztekoak dira. Beste hizkuntzetatik maile-
gatzen diren eta egokitzen ez diren izendapenak ere letra larriz hasita
idaztekoak dira. Adibideak:
Entente Cordiale, Devotio Moderna, Home Rule, Risorgimento...
Oharra:
Badira, salbuespen gisa, gertaera historikoak izanagatik, erreferente
anizkoitza izan eta aski zehaztugabeak eta hainbat tokitakoak izanik, letra
xehez idaztekoak diren zenbait gertaera historiko ere. Adibideak:
leinu-gerrak, erlijio-gerrak, familia-itunak, karlistaldiak...
2.2.4.5. Aldi geologikoak, historiaurrekoak, historikoak
eta historia banatzeko denbora-tarte nagusiak
Letra larriz hasita idazten dira aldi historiko berezien izendapenak.
Adibideak:
Errenazimentua, Ilustrazioa, Argien Mendea, Errestaurazioa, Hirurteko
Konstituzionala, Antzinako Erregimena...
Letra larriz hasita idazten dira historiako eta historiaurreko aroen
izendapenak. Adibideak:
Antzinaroa, Erdi Aroa, Aro Modernoa...
Neolitoa, Brontze Aroa, Burdin Aroa, Azilaldia, Aurignacaldia,
Madeleinealdia...

56

Geologian erabiltzen diren unitate estratigrafikoen (eontema, era-
tema, sistema, serie, estaia) eta geokronologikoen (eon, era, periodo,
epoka, aro) izenen hasierako letra maiuskulaz idazten da. Adibideak:
Era Primarioa, Era Sekundarioa, Paleogenoa, Fanerozoikoa, Mesozoikoa,
Jurasikoa, Siluriarra, Goi Triasikoa, Arkearra, Permiarra, Kuaternarioa,
Kanbriarra, Kretazeoa...
Oharra:
Izen ez eta izenondo direnean —hau da, izen bat kalifikatzen dute-
nean— letra xehez idazten dira. Adibideak:
Oro har, Jurasikoan klima beroa eta hezea izan zen (izena).
Antiklinala, erliebe jurasikoan (izenondoa), bi sinklinalen artean eratzen da.
Arte- eta literatura-estiloak edo filosofia-mugimenduak letra
xehez idazten dira. Ikus 3.12 puntua. Nolanahi ere, dena delako arte-
edo literatura-estiloa nagusitu zen aldi historikoa izendatzeko estilo
horren izena erabiltzen bada, letra larriz hasita idazten da (hiztegiek
argitu behar dute zein arte- edo literatura-estilok eman dion izena aldi
historikoari eta zeinek ez. Adibidez, barroko hitzak badu adiera hori,
baina gotiko hitzak ez. Eta, alderantziz, entziklopedia batean aldi
historikoak sarrera izateak eta letra larriz agertzeak ez du esan nahi
letra xehez ezin erabil daitekeenik hitzak estiloa —eta ez aldia—
adierazi nahi duenean). Adibideak:
XVI. mendearen amaieratik XVIII. mendearen hasierara bitartera iraun zuen
Barrokoak.
Mendebaldeko kulturan erromantizismo izeneko literatura-estiloa nagusitu zen
aldiari Erromantizismo deritzo.
2.2.4.6. Hezkuntza-sistemaren barneko ikasketak,
irakasgaiak eta jakintza-alorrak
Letra larriz hasita idazten dira hezkuntza-mailen izendapenen osagai
nagusi guztiak, eta berdin ikasketen, irakasgaien, zehar-lerroen, heziketa-
zikloen, lanbide-arloen, materien eta, oro har, jakintza-alor guztien izen-
dapenen osagai nagusi guztiak. Moduluak eta lantegiak dira salbues-
penak, oso izenburu luzeak izaten baitituzte maiz; horregatik, haien lehe-
nengo hitzaren lehen letra baino ez da larriz idazten. Adibideak:

57

Aurten, Derrigorrezko Bigarren Hezkuntzako lehen zikloan hasi da.
Hezkuntza Saila aztertzen ari da Lanbide Heziketako irakasleen eskakizunak.
Duela bi urte Biologian lizentziatu zen. Bihar, Biologiako azterketa dugu.
Datorren ikasturtean Soziologia ikasten hasiko da.
Gaur ez da etorri Zuzenbide Zibileko irakaslea.
Mirenek Zirkuituen Teoria [irakasgaia] ematen du.
EHUko Elektrizitate eta Elektronika Saila.
EHUko doktorego-programak bost sailetan banatuta daude: Zientzia
Esperimentalak, Osasun Zientziak, Gizarte eta Lege Zientziak, Giza Zientziak
eta Irakaskuntza Teknikoak.
Niri gehien gustatzen zaidan doktorego-programak oso izen luzea du:
Aurrerapen Berriak Elikaduran eta Elikagaien Zientzia eta Teknologian.
Sexu Berdintasunerako Hezkuntza eta Kontsumo Hezkuntza zehar-lerroak.
Idoia dugu Sexu Berdintasuneko irakaslea.
Atzerriko Hizkuntza eta Hezkuntza Plastikoa irakasgaiak.
Lanbide Heziketan, Itsasoko eta Arrantzako Jardueren lanbide-arloan, Itsasontziko
Makinen eta Instalazioen Operazioa, Kontrola eta Mantentzea erdi-mailako hezi-
keta-zikloan, Hozteko sistemen eta produkzio-sistemen erabilera eta manteni-
mendua izeneko modulu bat dago.
Derrigorrezko Bigarren Hezkuntzan, Gizarte Zientzietan, Herri-ondare eta
-kultura zaindu eta lehengoratzeko lantegia eratu da.
Osasungintza lanbide-arloko Erizaintzako Zainketa Osagarriak heziketa-
zikloko Osasunaren sustapena eta pazientearentzako laguntza psikologikoa
lanbide-modulua.
Letra larrien erabileraz gainera, aukerakoa da halako izendapen
luzeak letra etzanez nabarmentzea. Adibidez:
Osasunaren sustapena eta pazientearentzako laguntza psikologikoa lanbide-modulua
Oharra:
Hortik kanpo, letra xehez idazten dira arteen, zientzien eta lanbi-
deen izenak. Adibideak:
Asko gustatzen zaio herrietako/herrien historia ezagutzea.
Teknikari egokiak lortuko badira, ezinbestekoa da lanbide-heziketa edozein
herrialdetan.
Zuk duzun filosofia horrekin ez zara oso urruti iritsiko.
Ez zaio batere gustatzen arkitektura modernoa.

58

Diotenez, aurrerantzean zientzia-aurrerapenik handienak genetikatik eto-
rriko dira.
Euskaldunon psikologia ulertzerik ez dagoela esaten digu beti.
Niri, zeramika, musika eta, oro har, arte ederrak gustatzen zaizkit, baita giza
geografia ere; nire ahizpari, berriz, kimika organikoa, fisika kuantikoa eta
mekanika analitikoa.
Gauza jakina da traumatologia asko aurreratu dela azken urteotan.
2.2.4.7. Jarduerak, ekimenak, ekitaldiak, ospakizunak
Letra larriz hasita idazten dira erakunde ofizialek edo gizarteko
edozein elkartek edo taldek antolatutako izaera formaleko jardueren
izendapen ofizialen hitz nagusiak.11 Hala, letra larriz hasita idazten dira
biltzar, jardunaldi, topaketa, txapelketa, lehiaketa, kongresu, azoka,
ekitaldi, konferentzia, programa, politika eta abarren izen ofizialak.
Adibideak:
Nafarroa Oinez, Nazioarteko Terminologia Biltzarra, Euskal Giza Taldeen III.
Mundu Biltzarra, Literatura Jardunaldiak, Berlingo Olinpiar Jokoak,
Espainiako Lehen Mailako Liga, Bigarren Mailako Buruz Buruko Txapelketako
finala, Txapeldunen Liga, Europako Gizarte Fondoa, Nekazaritza Politika
Bateratua, Ikerketa eta Garapeneko IV. Esparru Programa, Euskal Herriko
Itzulia, Euskal Bizikleta, Italiako Giroa, Frantziako Tourra, Bilboko
Nazioarteko 37. Argazki Lehiaketa, Munduko Igeriketa Txapelketa...
Stockholmen, 1972an, Nazio Batuen Giza Inguruneari buruzko Konferentzia
antolatu zen.
Aurten, Bigarren Mailako Buruz Buruko Txapelketako finala Zarautzen joka-
tuko da.
Alaves Bigarren Mailara jaitsi zen 2003an.
Izaera generikoa dutenean, berriz, letra xehez. Adibideak:
Lau urtez behin antolatzen dira olinpiar jokoak.
Gaur egun, nonahi antolatzen dira argazki-lehiaketak.
Enpresak jardunaldi tekniko bat antolatuko du laster produktu berria aurkezteko.
2.2.4.8. Sariak
Letra larriz hasita idazten dira era guztietako erakunde eta taldeek
emaniko sarien izendapenaren osagai nagusi guztiak egitura <izen espe-
zifikoa + saria> denean; aposizioak direnean, alegia. Adibideak:

59

CAF-Elhuyar sariak, 1993ko Kimikako Nobel saria, Oscar sariak, Irun Hiria
saria, Asturiasko Printzea saria, Max Planck saria, Iberdrola Zientzia eta
Teknologia saria...
Letra larriz hasita idazten da sari hitza sariaren izena deskriptiboa
denean, hau da, sari hitza sariaren izendapenaren parte denean.
Halakoetan, izendapena ez da osoa sari hitza falta bada. Hori gertatzen da
aposizioak ez direnean, hau da, egitura <(izenlaguna) + sari + (izenondoa)>
denean. Adibideak:
Espainiako Gastronomia Akademiaren Gastronomiako Sari Nazionala Andoni
Luisek irabazi zuen 2002an; urte berean, Espainiako Narratibako Sari
Nazionala irabazi zuen Unai Elorriagak.
Fantasiazko eta Beldurrezko Zinemaren XVII. Asteko Publikoaren Saria
Euskal Herritar Unibertsalaren Saria
Musika Akademiaren Ohorezko Saria
2.2.4.9. Hitzaldiak, txostenak, komunikazioak, artikuluak
Lehen hitza letra larriz hasita idazten dira hitzaldi, mahai-inguru,
txosten, erakusketa eta komunikazioen eta aldizkarietan argitaratzen
diren artikuluen izenburuen osagai nagusiak. Aldizkari eta komikien
barneko artikuluen eta atal finkoen izenburuen lehen hitzaren lehen
letra ere larriz idazten da. Adibideak:
Joxe Anton Artzek «Ibarrean zeharka-meharka; mendian gora eta behera»
hitzaldia eman zuen; Mikel Zalbidek «Maileguzko hitzen zenbait muga-arazo»
txostena irakurri zuen Euskaltzaindiaren XIII. Biltzarrean; «Munduko
hizkuntzen izenak euskaraz» artikulua argitaratu zen Uztaro aldizkariaren 54.
zenbakian; Elhuyar aldizkariaren atalik irakurriena «Berriak labur» izaten da;
Berria egunkariko «Agenda» saila...
2.2.4.10. Liburuak eta bestelako argitalpenak
Liburuen, aldizkarien, tesien eta euskarri informatikoan (CD-ROM,
DVD...) argitaratzen diren produktuen izenburuetan, lehen hitzaren
lehen letra bakarrik idazten da larriz (izenburuaren parte diren izen bere-
ziak edo berez letra larria dagokienak larriz idazten dira, jakina, nahiz eta
izenburuaren lehen hitza ez izan). Gainera, letra etzanez idaztekoak dira
testu baten barnean daudenean. Adibideak:
Arantxa Urretabizkaiaren Zergatik, panpox 1983an argitaratu zen.

60

Ibon Sarasolaren Joan eta Ane zigarro bat erretzen Erein argitaletxeak berrargita-
ratu zuen.
Unai Elorriagaren SPrako tranbia izan zen hilabete hartan euskarazko libururik
salduena.
Ramon Saizarbitoriak Gorde nazazu lurpean argitaratu zuen 2000. urtean.
Koldo Mitxelenaren Historia de la literatura vasca 1988an argitaratu zen.
1997an kaleratu zen Bertsoen mundua CD-ROMa.
Oharrak:
Hemen ematen diren jarraibideek obraren izenburua testu baten
barnean idaztekoak direnerako balio dute. Kontuan izan liburu,
CD-ROM eta abarren azaletan agertzen direnean, edo iragarkietan
agertzen direnean, izenburuek ez dutela zertan jarraibide horri atxiki,
azaletan eta iragarkietan diseinuak, estiloak eta maketak agintzen
baitute izenburua nola idatzi (letra guzti-guztiak larriz, edo guzti-
guztiak xehez, edo hitz bakoitza letra larriz hasita...).
Jatorrizko hizkuntzan ematen direnean, jatorrizko hizkuntzan
bezala idatzi ohi dira. Adibidez, ingelesez larriz idazten dira izenburue-
tako hitz nagusiak:11
Noiz idatzi zuen William Shakespearek As You Like It obra?
Salbuespenak:
1. Hainbat liburukiz osatutako liburu-bildumen izenburuetako
hitz nagusi guztiak11 letra larriz hasita idaztekoak dira testu
barruan ere, eta liburuki bakarrekoak izan arren argitaraldiz
argitaraldi osatuz doazen obren izenburuetako hitz nagusiak ere
bai. Adibideak:
Euskaltzaindiaren Orotariko Euskal Hiztegiaren azken liburukia 2005ean
argitaratu zen, eta Euskal Gramatika. Lehen Urratsak-VI liburukia ere urte
berean kaleratu zen.
Haur eta Gazteentzako Literatura Bilduma.
2. Literaturaren eremutik kanpo, izenburu batzuek izaera izenda-
tzaile nabarmena dute, oso deskriptiboak dira. Halakoetan,
salbuespena egin eta hitz nagusi guztiak letra larriz idatz
daitezke. Horretarako, izen-sintagma absolutiboko izenburua
izan behar du obrak. Adibideak:

61

2000. urtean Energiaren Hiztegi Entziklopedikoa argitaratu zuen EVE era-
kundeak.
Ibon Sarasolaren Euskal Hiztegia noiz argitaratu zen?
Elhuyarren Euskal Hiztegi Modernoaren bi edizioak ditugu bulegoan.
Kontrol Sekuentzialeko Sistemak liburua oso garestia da.
Lehenbailehen erosi Salerosketen Kudeaketa, agortu egingo da eta.
Edo:
2000. urtean Energiaren hiztegi entziklopedikoa argitaratu zuen EVE erakundeak.
Ibon Sarasolaren Euskal hiztegia noiz argitaratu zen?
Elhuyarren Euskal hiztegi modernoaren bi edizioak ditugu bulegoan.
Kontrol sekuentzialeko sistemak liburua oso garestia da.
Lehenbailehen erosi Salerosketen kudeaketa, agortu egingo da eta.
3. Ikasliburuen izenburuek, maiz, irakasgaiaren izen bera izaten
dute, jakintza-alorraren izen bera. Irakasgaia eta jakintza-alorra
letra larriz hasita idazten direla adierazi da 2.2.4.6 puntuan
(hartu kontuan salbuespenak ere). Halakoetan, izenburua ira-
kasgai edo jakintza-alor baten izena denean, letra larriz hasita
idatz daitezke izenburua osatzen duten hitz nagusiak.11
Adibideak:
Giza eta Gizarte Zientziei Aplikatutako Matematika II; Fisika eta Kimika DBH 3;
Euskara eta Literatura DBH 2; Erlijio Katolikoa; Naturaren Zientziak DBH 1 /
Izadiaren Jakintza DBH 1; Marrazketa Teknikoa...
Edo:
Giza eta gizarte-zientziei aplikatutako matematika II; Fisika eta kimika DBH 3;
Euskara eta literatura DBH 2; Erlijio katolikoa; Naturaren zientziak DBH 1 /
Izadiaren jakintza DBH 1; Marrazketa teknikoa...
2.2.4.11. Aldizkariak
Letra larriz hasita idazten dira aldizkariaren izenaren parte diren
hitz nagusi guztiak (juntagailuak eta postposizioak izan ezik). Liburuen
izenburuak bezala, letra etzanez idatzi ohi dira testu baten barnean
gertatzen direnean. Adibideak:
Berria, The New York Times, El Diario Vasco eta Le Monde egunkariak erosten
ditu beti.
Elhuyar Zientzia eta Teknika hilabetekaria da; Argia, berriz, astekaria.

62

2.2.4.12. Ikus-entzunezko komunikabideetako saioak
Lehen hitza letra larriz hasita idazten dira irrati eta telebistetako
emanaldien izenburuen eta emanaldien barneko atal finkoen izenak.
Adibideak:
Faktoria, goizeko magazina Euskadi Irratian
Teknopolis programaren barnean «Informazioaren gizartea» atala dago.
ETB1eko Gaur egun programako «Kirolak» atalaren aurkezlea aldatu dute.
ETB2 kateak El topo izeneko lehiaketa eman zuen udazkenean.
2.2.4.13. Antzezlanak, filmak, kantak, musika-obrak eta arte
plastikoetako obrak
Liburuen izenburuetan bezala, lehen hitza letra larriz hasita idazten
da antzezlanen, filmen, kanten, musika-konposizioen, pinturen, eskul-
turen eta kidekoen izenburuetan. Eta, liburuekin egiten den bezala,
letra etzanez idazten dira testu baten barnean gertatzen direnean.
Adibideak:
Mozarten Figaroren ezteiak opera; Txillidaren Haizearen orrazia eskultura taldea;
Charles Chaplinen Garai modernoak eta Diktadore handia filmak; Mikel
Laboaren Gure bazterrak eta Oroitzen zaitudanean, ama kantak; S. Botticelliren
Venusen jaiotza ezaguna; Velázquezen Mozkorrak edo Bakoren garaipena izeneko
margolana...
Oharra:
Jatorrizko hizkuntzan ematen direnean, jatorrizko hizkuntzan
bezala idatzi ohi dira. Adibidez, ingelesez larriz idazten dira izenburue-
tako hitz nagusiak:
Van Morrisonen You Know What They’re Writing About kanta
2.2.4.14. Arau eta agiri ofizialak
Arauen eta agirien izen ofiziala osatzen duten hitz nagusi11 guztiak
letra larriz hasita idazten dira, baita programa, hitzarmen, politika, plan
eta bestelako agiri ofizial ororen izenen osagaiak ere, bai ofizialak dire-
nean bai ofizial bihurtu baino lehenagoko izapidetzean. Adibideak:
Atzerritarren Legea, Prozedura Zibilaren Legea, Uraren Liburu Zuria,
Ingurumen eta Garapenari buruzko Rioko Deklarazioa, Kode Zibila, Zigor
Kodea, Zergekiko Foru Arau Orokorra, Bizkaiko Forua, Lizarrako Estatutua,

63

Enplegu Plan Nazionala, Kyotoko Protokoloa, Arma Nuklearrak Ez Ugaltzeko
Hitzarmena, Errepide Mapa izeneko bake-plana...
Oharra:
Ohiturak ohitura eta erabilera guztiak bat ez badatoz ere, arau eta
agiri ofizialen izenak luzeak direnean, gomendio gisa, sei hitz nagusi
arte letra larriz hasita idaztea proposatzen da. Hortik gora (zazpi hitz
edo gehiago), arauaren edo agiriaren lehenbiziko hitza letra larriz
hasita idaztea proposatzen da, baita arau motaren beraren izena ere —
Legea, Dekretua...—; gainerakoetan, letra larririk ez idaztea propo-
satzen da. Irizpide horrek berdin balio du lege eta gainerakoen aipamen
zehatzetarako eta «laburtu» edo «egokituetarako» ere. Adibideak:
Hobetzeari buruzko Legea [Hobetzeari = 1]
Gaueko Argiteriari buruzko Foru Legea [Gaueko, Argiteriari = 2]
Kontsumitzaile eta Erabiltzaileen Defentsari buruzko Foru Legea
[Kontsumitzaile, Erabiltzaileen, Defentsa = 3]
Nafarroako Foru Eraentza Berrezarri eta Hobetzeari buruzko abuztuaren 10eko
13/1982 Lege Organikoa [Nafarroako, Foru, Eraentza, Berrezarri, Hobetzeari = 5]
Nafarroako turismoko aterpetxeak antolatzeko Erregelamendua onesten duen
Foru Dekretua [Nafarroako, turismoko, aterpetxeak, antolatzeko,
Erregelamendua, onesten, duen = 7]
Autonomia Erkidego osorako erakundeen eta bertako lurralde historikoetako
foruzko jardute-erakundeen arteko harremanei buruzko Legea.
Euskadiko Gas Baltzuaren kapital-gehitzeari erantzuteko berariazko diru-izen-
dapen bat egiteari buruzko Legea.
Foru Legea, Hezkuntzari buruzko maiatzaren 3ko 2/2006 Lege Organikoaren
babesean aldez aurreko erretiroa eskatzen duten unibertsitatetik kanpoko
langile irakasleek borondatezko erretiroaren sari osagarria jasotzeko baldintzak
ezarri eta borondatezko erretiroaren sari osagarri horren zenbatekoa finkatzen
dituena.
4/2007 Foru Agindua, urtarrilaren 24koa, Hezkuntzako kontseilariak emana,
Hezkuntzako kontseilariak apirilaren 26an eman 83/2005 Foru Agindua
aldatzen duena. Haren bidez irailaren 13ko 368/1999 Foru Dekretua garatu
zen, Hezkuntza Departamentuko Hezkuntza Ikuskatzailetzaren antolamendua
eta funtzionamendua arautu zituena.
3600/2006 Ebazpena, abenduaren 11koa, Nafarroako Enplegu Zerbitzuko
zuzendari kudeatzaileak emana, Lanaren eta Gizarte Gaien Ministerioaren
1997ko abenduaren 19ko Aginduan eta uztailaren 20ko TAS/2435/2004

64

Aginduan ezarritako diru-laguntzak emateko deialdia onesten duena, Estatuko
Administrazio Orokorreko organoekiko eta irabazi asmorik gabeko erakundee-
kiko lankidetzaren esparruan.
Lege eta gainerako arau eta agiri ofizialen osagai formal handi-txi-
kiak (kapitulua, atala, artikulua, eranskina, zatia, titulua, atalburua,
xedapena, idazpurua...) letra xehez idazten dira. Gauza bera aipamen
orokorrak egiten direnean. Adibideak:
Legearen II. atalburuan, 27. artikuluko b atalean eta III. eranskinean
2. xedapen gehigarrian zehaztu denez (...)
Eta foru-lege honetan (...)
Hala ere, erregelamendu honen 2. artikuluan (...)
Enpresen eta era guztietako erakundeen agiri, gutun, arau, jarrai-
bide, barne- nahiz kanpo-dokumentu eta kidekoen izenburuen hitz
nagusi11 guztien lehen letra ere larriz idazten da (Dena dela, letra
etzanez idazten badira, ez da letra larririk behar hitz guztietan eta aski
da lehenengoan jartzea). Hala ere, luzeak direnean, zazpi hitz nagusi
edo gehiago badituzte, lehenbiziko hitza letra larriz hasita idatziko da,
baina gainerakoak ez. Nolanahi ere, eremu pribatuari dagozkionez, era-
kunde bakoitzaren estiloak edo ohiturek finkatu ohi dute erabili beha-
rreko irizpidea. Adibideak:
Lan Segurtasuna Bermatzeko Jarraibideak izeneko dokumentuan zehazten dira (...)
Eta Enpresako Langileentzako Barne Arautegiak zehazten duenez (...)
Oharra:
Arau eta agiri ofizialen grafiari dagokionez, kontuan hartu beharra
dago bi grafia dabiltzala batera: grafia ofiziala eta grafia arrunta.
Espezializazio-idazkerari dagozkio gorago emandako irizpideak. Testu
tekniko espezializatu eta ofizialetan askoz gehiago erabiltzen da letra
larria; haietan derrigorra da arauen izenetan hasierako letra larria (Legea,
Dekretua, Ebazpena...). Espezializazio-eremutik kanpo, aldiz, ohikoa da
arauen izenak letra xehez idaztea; gainera, lege eta gainerako arauen
izendapena laburtuta erabili ohi da. Adibidez, grafia ofiziala Haurrak eta
Nerabeak Zaintzeko eta Babesteko Legea izan daiteke, baina, hortik kanpo,
laburtuta erabiltzen denean, Haurrak Babesteko legea idatz daiteke, ez
baita legearen izen ofiziala.

65

Betiere, modu generikoan erabiltzen direnean, letra xehez idatzi
behar dira. Adibideak:
Datorren urtean, lurzorua babesteko lege bat egingo dutela esan dute.
Batzar Nagusiek foru-arauak onartzeko ahalmena dute.

2.2.5. Leku-izenak
2.2.5.1. Leku-izenak
Estilo-liburuaren hirugarren liburukian, Onomastikan, berariaz landu
ziren letra larrien eta xeheen inguruko alderdiak, eta han zehaztu ziren
irizpide orokorrak. Hona hemen irizpide horiek, hainbat oharrez osatuak:
Leku-izenak bi osagai izaten ditu: espezifikoa (lekuaren berezko
izena; izen berezia izan ohi da) eta generikoa (zer leku mota den zehazten
duena; izen arrunta izan ohi da). Adibidez, Ebro ibaia toponimoan, Ebro da
osagai espezifikoa eta ibaia generikoa.
Baina leku-izenaren berezko egituraren ondorioei heldu baino
lehen, oinarrizko beste sailkapen bat egin behar da, eta bi sail bereizi:
toponimo politiko-administratiboak eta toponimo fisikoak. Toponimo
politiko-administratiboak dira: estatuak eta estatuen barneko banaketa
administratiboaren emaitza direnak: autonomia-erkidegoak, probin-
tziak, departamenduak, eskualdeak, udalerriak... egungoak nahiz izan-
dakoak. Horiek, leku-izenaz gainera, erakunde ere badira edo izan dira,
eta letra larriz idaztekoa da izendapen ofizialaren parte diren hitz
guztien lehen letra. Adibidez:
Alpe Garaiak (departamendua); Frantziako Errepublika (estatuaren izen
ofiziala); Espainiako Erresuma (estatuaren izen ofiziala) edo Espainia;
Libiako Arabiar Herri Errepublika Sozialista (estatuaren izen ofiziala) edo
Libia; Nafarroa Beherea (herrialdea); Kanariar Uharteak edo Kanariak (auto-
nomia-erkidegoa); La Paz (hiria); Río de la Platako Probintzia Batuak
(toponimo administratibo historikoa); Asiako Probintzia (toponimo
administratibo historikoa); Adengo Protektoratua (toponimo adminis-
tratibo historikoa); Erromatar Inperioa (antzinako estatua)...
Oharra:
Erakunde diren aldetik, grafia ofizialak dira Arabako Lurralde
Historikoa, Bizkaiko Jaurerria, eta abar, baina, hortik kanpo, grafia arrunta

66

erabiltzen denean, letra xehez hasita idazten da generikoa: Arabako
probintzia, Bizkaiko probintzia...
Halaber sar daitezke sailkapen horretan esanahi ideologiko edo
geopolitikoa dutenak. Adibidez:
Hirugarren Mundua, Ekialde Hurbila, Ekialde Urruna, Mendebaldeko
Europa...
Toponimo fisikoak dira gainerakoak: mendiak, ibaiak, itsasoak,
lurmuturrak, kaleak, bideak... Askotan, elkarren ondoan agertu ohi
dira izen berezia (Ebro) eta izen generikoa (ibaia), baina toponimoen
egitura, osagaiei dagokienez, ez da beti bat, eta errealitateak
erakusten du kamutsa dela toponimoetan letra larriak nola erabili
behar diren adierazteko arau nagusitzat har daitekeena —osagai espe-
zifikoa letra larriz eta osagai generikoa letra xehez—.
Leku-izena osatzen duten elementuen —bereziaren eta generiko-
aren— arteko harremana ez da beti bera. Askotan, elementu generi-
koa ez da nahitaez izen bereziari atxikia agertu beharrekoa (Amazonas
ibaian edo Amazonasen esan daiteke; Usurbilgo herrian edo Usurbilen;
Mediterraneo itsasoaren ertzean edo Mediterraneoaren ertzean; Pirinio mendiak
edo Pirinioak); beste batzuetan, ordea, elementu generikoa ezin
kenduzkoa da, ez da hautazkoa (Itsaso Gorria esaten da beti, ez da
*Gorria bakarrik esaten; Mexikoko golkoa, Esklaboen aintzira eta Ur-jauzien
mendikatea toponimoetan, adibidez, ezin da generikoa kendu eta
*Mexikoko, *Esklaboen eta *Ur-jauzien bakarrik utzi).
Dena dela, irizpide nagusia hau da: toponimoaren elementu
generikoa letra xehez idaztekoa da. Irizpide nagusi hori hartu eta era-
bili du Euskaltzaindiak Euskal Herriko toponimia txikia finkatzeko,
eta, beraz, irizpide hori zabalduta, gainerako toponimoei ere ezartze-
koa da.
Beraz, generikoaren eta bereziaren arteko harreman horretan oina-
rritzen da irizpidea. Generikoa hautazkoa denean, letra xehez idaztekoa
da. Adibidez:
Amazonas (Amazonas ibaia), Anboto (Anboto mendia), Bahamak (Bahama
uharteak)...

67

Elementu generikoa hautazkoa ez denean ere, generikoa letra xehez
idaztekoa da gehienetan. Adibidez:
a) Elementu espezifikoa (izen berezitik -(t)ar atzizkiaren bidez era-
torritako adjektiboa) eta elementu generikoa (izen arrunta).
Adibideak:
Kaspiar itsasoa, Tirreniar itsasoa, Italiar penintsula, Kantabriar mendika-
tea, Iberiar goi-ordokia, Kanbriar mendiak, Aleutiar uharteak, Britainiar
uharteak...
Oharra:
Dinariar Alpeak toponimoan, berriz, letra larriz idaztekoa da Alpe
hitza, elementu generiko berezia baita (ez da mendikate, mendigu-
ne, mendilerro edo mendi ohiko generikoak bezalakoa).
b)izen espezifikoa, -ko edo -en atzizkia eta izen generikoa. Adibideak:
Omango itsasoa, Eskandinaviako mendikatea, Bizkaiko golkoa, Atacamako
goi-ordokia, Suaren lurraldea, Esperantza Onaren lurmuturra, Maud
Erreginaren lurraldea, Elur-oreinaren aintzira, Faisaien uhartea, Hartzen
uhartea, Eduardo Printzearen uhartea, Esklaboen kostaldea, Konstantzako
aintzira, Suezko kanala, Tarifako lurmuturra, Floridako penintsula,
Gibraltarko itsasartea, Panamako kanala, Paueko uhaitza, Oloroeko uhaitza,
Niloren delta, Dardaneloen itsasartea, Girondako estuarioa, Arcachongo
badia, Landerbasoko erreka, Saratzeko lepoa, Errotazarko iturria...
c) Izen-elkarteak. Adibideak:
Koral itsasoa, Sargazo itsasoa, Metal mendiak, Ipar lurmuturra, Hego uhar-
tea, Ipar itsasoa, Ipar poloa (edo Iparburua), Hego hemisferioa...
Elementu generikoa letra larriz idaztekoa da, berriz, hiru kasu
hauetan:
1. Izena + izenondoa egitura denean, hau da, generikoak izenondo
baten laguntza duenean. Adibideak:
Ibai Horia, Hartzaren Aintzira Handia, Aragoiko Kanal Inperiala,
Ozeano Atlantikoa, Mendikate Banatzaile Handia...
Oharrak:
• Toponimoek, batzuetan, egitura konplexua dute, hala nola
izenlaguna + izena + izenondoa. Horrelakoetan, hau da, ize-
nondoren bat eskuinean ageri denean, beti idatzi behar da

68

elementu generikoa letra larriz. Adibidez, Elur-oreinaren
aintzira toponimoan, aintzira letra xehez idaztekoa da.
Hartzaren Aintzira Handia toponimoan, berriz, larriz idatzi
behar da aintzira, ondoren izenondoa duelako. Beste
hainbeste gertatzen da, adibidez, Sondako Uharte Handiak eta
Sondako Uharte Txikiak toponimoetan ere.
• Batzuetan, izen generikoa lexikalizatuta dago, eta ez da
itzultzen, Adibidez, Mont Blanc (mendia). Antzeko kasua da
Monte Perdido (mendia) ere, nahiz eta, maiz, ahozkoan batez
ere, Perdido (edo Perdido mendia) bakarrik esaten den. Mont Blanc
toponimoan, berriz, ez da Blanc (edo Blanc mendia) esaten.
• Kontuan izan behar da toponimoari laguntzen dion izenon-
doa batzuetan ez dela toponimoaren berezko osagaia, baizik
eta izenondo arrunta. Horrelakoetan, jakina, izenondoa
letra xehez idatzi behar da. Adibideak:
Bi Amerika daude: Amerika aberatsa eta Amerika pobrea.
Iparraldean, Nafarroa menditsua dugu, eta hegoaldean, berriz,
Nafarroa laua.
Batzuek Iparraldeari Euskal Herri kontinentala esaten diote, eta
Hegoaldeari, berriz, Euskal Herri penintsularra.
Alemania komunista deitzen zioten Alemaniako Errepublika
Demokratikoari.
Italia faxistaren gorenaldian gertatu zen.
2. Generikoa metafora baten bidez lortu denean, hau da, toponi-
moaren benetako izaera izen generikoarekin bat ez datorre-
nean. Adibideak:
Aiako Harria («harri» hori mendia da); Hiru Erregeen Mahaia
(«mahai» hori mendia da); Adamen Zubia (istmo bat da); Afrikako
Adarra («adar» deritzo, punta-formakoa delako, mapan ikusita);
Gazako Zerrenda («zerrenda» deritzo, lurralde estua eta luzea
delako); Erraldoien Galtzada («galtzada» hori itsaslabarra da)...
3. Generikoa kokatzaile huts eta orokor batez lagunduta dagoe-
nean (izen berezia puntu kardinalak direnean, adibidez).
Adibideak:
Ekialdeko Mendikatea, Erdialdeko Mendigunea, Ekialdeko Itsasoa...

69

2.2.5.2. Astronimia
Planeten, sateliteen, izarren, konstelazioen, galaxien eta, oro har,
astro guztien izenetan hasierako letra maiuskulaz idaztekoa da.
Adibideak:
Merkurio da Eguzkitik gertuen dagoen planeta.
Satelite bakarra du Lurrak: Ilargia.
Oso ikusgarriak dira Saturnoren eraztunak.
Ipar hemisferioko konstelazio ezagunak Hartz Nagusia eta Hartz Txikia dira.
Astronomoek Halley kometa hurbiltzen ikusi zuten.
Gure galaxia, Esne Bidea alegia
Hilaren 19an, Eguzkia, itxuraz, Capricornus konstelazioan sartuko da.
Zeruko izarrik distiratsuena Sirius da.
Ez nekien Aldebaran zenik Taurus konstelazioko alfa izarra.
Oharra:
Eguzkia, Lurra eta Ilargia izenen hasierako letra maiuskulaz idatzi
behar da astronomia eta astrofisikako testuetan. Adibideak:
Ilbetea edo Ilargi Betea, Ilargiaren faseak (baina ilargi-faseak), Ilberria edo
Ilargi Berria, Ilgora, Ilbehera, Eguzkiaren eklipsea (baina eguzki-eklipsea)...
Testuinguru horietatik kanpo eta astroaren adiera hertsitik kanpo,
letra xehez idatzi ohi dira, baita haiei lotutako fenomenoak adierazteko
ere: Adibideak:
Ez zaitez jarri eguzkitan, erre egingo zara eta!
Atzo eguzkia hartu genuen, baina gaur eguzki zuria dago.
Gogotik jotzen du eguzkiak.
Laino itxia dago, eta ezin ikusiko dugu ilargia.
Ematen du ilargian dagoela, ez da ezertaz konturatzen.
Gaur ilberri(a) da.
Arrantza-denboraldia urriko ilberria baino astebete lehenago hasiko da.
eguzki-panelak, eguzki-urtea, eguzki-energia, ilargi-adarra, ilargi-izpiak, ilar-
gi-urtea, eguzki-sistema...
2.2.5.3. Zodiakoa
Letra larriz hasita idazten dira zodiakoa osatzen duten hamabi
zeinuen izenak, konstelazio-izenak baitira. Adibideak:

70

Egia da, Taurus zeinukoa da Ane.
Hamabi konstelaziok osatzen dute Zodiakoa, eta Aries da lehena.
Zodiako hitza letra larriz hasita idazten da hamabi konstelazioak
dituen zeruko eremua izendatzeko. Aldiz, zodiako hitzaren bidez adie-
razten bada zeruko eremu hura irudikatzen duen zirkulu sektoretan
zatitua, xehez idazten da. Adibideak:
Zein dira Zodiakoko konstelazioak?
Indiako astrologoen zodiakoa eta Txinakoena ez dira berdinak.
2.2.5.4. Puntu kardinalak
Letra xehez hasita idazten dira puntu kardinalak (iparra, hegoa, ekial-
dea/sortaldea, mendebaldea/sartaldea) eta haien elkarketaz sortzen diren
puntu interkardinalak eta gainerako tarteko puntuak ere (ipar-ekialdea,
ipar-mendebaldea, hego-ekialdea, hego-mendebaldea; ipar ipar-ekialdea, ipar ipar-
mendebaldea, mendebalde hego-mendebaldea...), bai irudizko puntua bai
norabidea edo orientazioa adierazten dutenean. Adibideak:
Iparrorratzak ipar magnetikoa adierazten du.
Bardea Nafarroako hegoaldean dago.
Eguzkia mendebaldetik sartzen da.
Gaur hego-haizea dabil.
Hotz handia ekarriko du ipar-haizeak.
Orduan, ekialderantz abiatu ziren.
Hiriaren mendebaldean gertatu zen ezbeharra.
Ebrotik hegoaldera, hotz handia izango da.
Otsoak mendebaldetik etorri ziren.
Nafarroako hegoaldean barrena ibili ziren.
Zarauzko hego-ekialdea etxez betetzen ari da.
Uhartea iparraldetik hegoaldera zeharkatzen du.
Europako ekialdea; AEBko mendebaldeko kostaldea; hiriaren hego-ekialdean
Puntu kardinala leku-izen baten parte denean —kontinente,
herrialde, eskualde, mendi, itsaso, bide edo dena delako errealitate geo-
grafiko, geopolitiko edo historiko jakin bat adierazten duenean—, letra
larriz hasita idazten da. Adibideak:
Ipar Irlanda; Iparraldea edo Ipar Euskal Herria; Hegoaldea edo Hego Euskal
Herria; Mendebaldeko Samoa; Hego Amerika; Ipar Amerika; Hego Korea;

71

Iparraldeko geltokia Donostian; Hego Uribe; Ekialdeko Mendikatea;
Erdialdeko Mendigunea; Ipar lurmuturra; Hego uhartea; Ipar itsasoa; Ipar
poloa (edo Iparburua); Hego hemisferioa...
Ekialde Hurbila; Ekialde Urruna; Mendebaldeko zibilizazioa; Iparralde abera-
tsaren eta Hegoalde pobrearen arteko harremanak; Ekialdeko herrialdeak;
Ekialde-Mendebalde gatazka Gerra Hotzaren garaian...
Estatu Batuetako Gerra Zibilean, Iparraldea Hegoaldeari nagusitu zitzaion.
Nolabaiteko batasuna —geografian, historian, kulturan edo poli-
tikan— duten eskualde eta makroeskualdeen izendapenen parte izaten
dira, maiz, puntu kardinalak. Halakoetan ere, letra larriz hasita idazten
dira (kontuan izan desberdintasuna: Europako ekialdea, Euskal Herriaren ipa-
rraldea —orientazioa—, baina Ekialdeko Europa, Ipar Euskal Herria edo
Iparraldea —leku-izena—). Adibideak:
Ekialdeko Europa, Mendebaldeko Europa, Erdialdeko Europa, Hego Europa,
Ipar Europa, Hego-ekialdeko Asia, Ipar Afrika...
Oharra:
Puntu kardinalen nazioarteko ikurrak beti letra larriz erabiltzen
dira. Adibideak:
NW (ipar-mendebaldea), SSE (hego hego-ekialdea), W (mendebaldea)...
Nazioarteko ikurren ordez puntu kardinalen euskal izenetatik ate-
ratako ikurrak erabiltzen badira, letra larriz idatzi behar dira horiek ere.
Adibideak:
iparra = I; hegoa = H; ekialdea = E; mendebaldea = M
2.2.5.5. Zeru-lurretako irudizko lerroen eta poloen izenak
Lur- nahiz zeru-esferako tropikoen izenen osagai espezifikoa letra
larriz hasita idazten da, baina tropiko letra xehez idazten da, baita gaine-
rako lerroen izenak ere, hala nola «paralelo» eta «meridiano». Adibideak:
Kantzer tropikoa eta Kaprikornio tropikoa; zeru-ekuatorea; Greenwich-eko
meridianoa; ekinozioen lerroak eta ekliptikaren planoa; zirkulu polar artikoa
eta zirkulu polar antartikoa...
Toponimoaren parte denean, berriz, larriz idazten da. Adibidez:
Ekuatore Ginea
Poloen izenen osagai espezifikoa larriz idazten da. Adibideak:

72

Naomi Uemura japoniarra izan da Iparburura (Ipar polora) bakarrik iritsi den
lehen pertsona.
Non dago Ipar polo magnetikoa?
Roald Amundsen Hego polora (Hegoburura) iritsi zen 1911n.
2.2.5.6. Herri eta hirietako kale, plaza, pasealeku, errepide eta
gainerako odonimoen izenak
Odonimoetan, osagai generikoa (kalea, zubia, etorbidea, pasealekua,
bulebar, plaza...) letra xehez idazten da, eta osagai espezifikoa, berriz,
larriz. Adibideak:
Askatasunaren hiribidea, Tolosa hiribidea, Konstituzio plaza, Leandro
Agirretxe plaza, Gudarien plaza, San Martin kalea, Santa Katalina zubia, Pio
Baroja pasealekua, Santiago Urtizberea saihesbidea, Donapea kalea, Berriz
landa, Begoñako Andra Mariaren zeharbidea...
Zenbaitetan, izen espezifikoa konplexua izan daiteke, baina izen
espezifikoaren barneko izen guztien hasierako letra larriz idaztekoa da.
Adibidez, Deba ibaia toponimoa kale baten izena bada, toponimoaren bi
osagaiak letra larriz idaztekoak dira: Deba Ibaia kalea (nahiz eta toponimoa
Deba ibaia izan, hau da, ibai hitza letra xehez idatzia). Beste adibide bat:
Santa Klara Uhartearen pasealekua (nahiz eta toponimoa Santa Klara
uhartea izan)
Beste hainbeste gertatzen da kale eta hiribideen izenen barnean
agertzen diren pertsonen kargu eta tituluekin ere, hau da, letra larriz
hasita idazten dira. Adibideak:
Agirre Lehendakariaren kalea (nahiz eta, hortik kanpo, Agirre lehendaka-
ria izan), Barnard Doktorearen plaza, Zumalakarregi Jeneralaren pasealekua...
Batzuetan, osagai generikoa espezifikoarekin bat eginik dago, hau
da, bi osagaiak bereizezinak dira (osagai espezifikoa izenondoa da
—Kale Nagusia—). Halakoetan, bietan hasierako letra maiuskulaz idatzi
behar da. Adibideak:
Bilboko Plaza Barria, Ategorrietako Galtzada Zaharra, Kale Berria...
Kasu horietan, gainera, gerta daiteke osagai generikoa fosilizatua
izatea (espezifiko bilakatua, alegia). Fosiltze horren ondorioz, loturik
idatzi ohi dira osagai espezifikoa eta generikoa. Adibideak:
Goenkale, Artekale, Barrenkale, Kaletxiki, Kalezar...

73

Oharra:
Atzerriko kaleak-eta aipatzen direnean, osagai generikoa larriz
uzten da erdara horietan hala idazten bada. Adibideak:
Downing Street, Via Veneto, Puerta del Sol, Trafalgar Square, Hyde Park, Wall
Street...
2.2.5.7. Etxe eta bestelako eraikinen izenak
Izendapenaren osagai espezifikoaren elementu nagusien hasierako
letra maiuskulaz idazten da. Adibideak:
Antzoki Zaharra (antzokia), Loiolako santutegia, Karlos V.aren gaztelua,
Antiguako Andre Mariaren baseliza, Amarako geltokia...
Oharra:
Atzerrikoak itzuli gabe aipatzen direnean, osagai generikoa letra
larriz uzten da, erdara horretan hala idazten bada. Adibideak:
Buckingham Palace (baina Buckingham jauregia), Palazzo Chigi, Fontana di
Trevi, Villa Farnesina...
Eraikin batzuen izenak itzuli egiten dira, batez ere izen arruntez
osatuak direnean eta oso ezagunak direnean. Adibideak:
Etxe Zuria, Etxe Arrosa, Pentagonoa, Kapera Sixtinoa...
2.2.5.8. Leku-izenetatik eratorritako aditzak
Letra larriz idazten den leku-izen batez eta -ratu atzizkiaz osatutako
aditzak letra larriz idazten dira, joskera-baliabide hutsa baita. Adibideak:
Bilbo eta Bilboratu; Durango eta Durangoratu.
Espainia eta Espainiaratu.; Frantzia eta Frantziaratu.
Amerika eta Ameriketaratu.; Asia eta Asiaratu.

74

3. Letra larriak noiz ez diren erabili behar
Orain arteko puntuetan, batez ere, letra larria noiz erabili behar den
zehaztu da, nahiz eta, askotan, letra xeheen erabilera ere zedarritu den.
Letra larria erabili behar ez den guztietan erabili behar da letra xehea, eta,
beraz, ez da beharrezkoa letra xeheen erabilera zehatz-mehatz adieraztea.
Bestela esanda, letra larria da salbuespena, eta letra xehea da araua.
Nolanahi ere, han-hemen ikusten da badirela zalantzak letra xeheen
erabileran, edo, zehatzago adieraztearren, batzuetan letra larria ikusten
dela xehea behar lukeen tokian. Fenomeno hori nabarmenagoa da euska-
rara zuzenean ingelesetik itzulitako edo moldatutako testuetan. Hori dela
eta, komeni da letra xeheen erabilerari buruzko ohar batzuk egitea; ale-
gia, letra xeheen erabilera modu labur eta arinean esplizitatzea:
1. Ez dira letra larriz idatzi behar sigla edo ikur bat osatzeko era-
biltzen diren izen arruntak berez hala dagokien kasuan baino,
sigla letra larriz idazten bada ere (ikus 1.5.2 puntua).
Adibideak:
balio erantsiaren gaineko zerga15 (BEZ)
barne-produktu gordina (BPG)
kontsumoko prezioen indizea (KPI)
2. Ez dira letra larriz idazten lanbideak, arteak eta zientziak (ikus
2.2.4.6 puntua). Adibideak:
arotzeria, iturgintza, ehungintza, musika, pintura, arkitektura, historia,
literatura, histologia, traumatologia, arkeologia, medikuntza, marketina,
elektronika, aljebra...
3. Ez dira letra larriz idazten jentilizioen izenak eta pertsona-ize-
netatik eratorritako izen eta izenondoak (ikus letra larrien erabi-
lera: 2.2.1.5 puntua). Adibideak:
fordista, italiarra, txinatarra, donostiarra, durangarra, turkiarra,
frantses/frantziar, espainol/espainiar...
aristotelismoa, darwinismoa, leninismoa, taylorismoa...
karlista, marxista, orangista, kalbinista...

15 Ikus 1.5.2 puntuan zerga-izenei buruz egindako oharra (3. oin-oharra).

75

4. Ez da letra larriz idazten santu-santen izenetik edo bestelako
edozein izenetatik eratorri diren auzo, herri eta hirietako jaien
izendapena. Dagokion izenari loturik idazten da san edo santa
titulua, eta horrela sortutako hitza pluralean deklinatzen da.
Adibideak:
sanferminak, santakatalinak, sanprudentzioak, santomasak...
porrontxoak, kofraixak...
5. Ez dira letra larriz idazten farmakoen izen generikoak (botiken
izen komertzialak bai, ordea). Adibideak:
Orfidal eta Idalprem botikek lorazepama daukate.
Medikuak azetazolamida hartzeko esan dit.
Hemen, betaxolola erabiltzen da hipertentsioaren aurka, eta Oxodal izena-
rekin saltzen da.
6. Ez dira letra larriz idazten urteko hilen izenak, diren egutegi-
koak direla, ezta urtaroak eta asteko egunak ere. Adibideak:
urtarrila, abendua, ramadana, brumarioa, safara, chaitra, vaisakha, sivana,
tammuza...
udaberria, negua, astelehena, igandea...
7. Ez dira letra larriz idazten moneten izenak. Adibideak:
Italiako dirua lira zen; orain, berriz, euroa da.
Estatu Batuetako dolarra eta Erresuma Batuko libera esterlina beherantz
doaz.
8. Ez dira letra larriz idazten herrien, etnien eta hizkuntzen izenak.
Adibideak:
hunoak, aztekak, apatxeak, khemerrak, tutsiak, uigurrak, turkoak...
kazakhera, aimara, afrikaansa, etruskoa, gaelikoa, punjabera, italiera, latina...
9. Ez dira letra larriz idazten konposatu kimikoak, aleazioak eta
mineralak. Adibideak:
karbono dioxidoa, hidrokarburo aromatiko poliziklikoa, polibinil kloru-
roa; konstantana, brontzea; migmatita, kristobalita, gibsita...
10. Ez dira letra larriz idazten Lurrean eta atmosferan bereizten
diren geruzak. Adibidez:
ozonosfera, litosfera, ionosfera, exosfera...

76

11. Ez dira letra larriz idazten haizeen izenak. Adibideak:
mendebala, ipar-haizea, hego-haizea, sirokoa, tramontana, alisioak,
ziertzoa, garizuma-haizea...
12. Ez dira letra larriz idazten arteetako, filosofiako eta literaturako
genero, estilo, joera eta konposizio moten izenak. Adibideak:
kopla, bertsoa, fandangoa, zortzikoa, adagioa, rock-and-rolla, jazza, bluesa,
rapa, kantata, oratorioa, suitea, mazurka, westerna, zarzuela, eleberri histo-
rikoa, poesia epikoa, flamenkoa, tangoa, erromantizismoa, gotikoa, inpre-
sionismoa, kubismoa, klasizismoa, sinbolismoa, surrealismoa, existentzia-
lismoa, postmodernitatea, barrokoa...
Oharra:
Kontuan izan estiloak aldi historiko bati izena ematen dionean
letra larriz idazten dela aldi historikoa, baina ez estiloa (ikus
2.2.4.5 puntua).
13. Ez dira letra larriz idazten musika-notak. Adibideak:
do; re; mi; fa maiorrean; la bemolean; sol minorrean...
Oharra:
Hezkuntzaren beheko mailetan maior hitzaren ordez erabiltzen
bada nagusi eta minor hitzaren ordez txiki, letra xehez idatzi
behar dira horiek ere (la nagusian, sol txikian).
14. Ez dira letra larriz idazten leku- edo pertsona-izenen ondoan,
atributu gisa, edo haien ordez erabiltzen diren ezizenak16.
Adibideak:
Parisek izan nahi du Ipar Amerikatik kontinente zaharrera sartzeko ate
nagusia (kontinente zaharra: Europa).
Zoritxarrez, kontinente beltzak etorkizun beltza du (kontinente beltza:
Afrika).
Gizakia planeta gorrira bidaltzeko planak prestatzen ari da NASA (planeta
gorria: Marte).

16 Nolanahi ere, ez da erraza mugak zehaztea. Adibidez, adibidean ageri den Urepeleko
artzaina izen antonomasikoa dela uler liteke; hala ulertuz gero, 2.2.1.2 puntuan ezarritako-
aren arabera, Urepeleko Artzaina idatzi behar litzateke.

77

Urepeleko artzainaren bertsoak euskaldun askoren gogoan iltzaturik gelditu
dira (Xalbador: Urepeleko artzaina).
Kaxiano, Lizartzako itsua.
15. Ez dira letra larriz idazten ideologiaren, etikaren edo erlijioaren
ikuspegitik goresgarritzat hartzen diren ideia eta terminoak,
edo, idazlearen ikuspegitik, itzal edo garrantzi handikoak
direnak17. Adibideak:
aberria, nazioa, herria, iraultza, euskara, natura, gizadia, zibilizazioa, fami-
lia, bakea, zoriontasuna...
16. Ez dira letra larriz idazten ekonomian edota politikan bereizten
diren sektoreak eta klaseak. Adibideak:
lehen sektorea, zerbitzuen sektorea, sektore pribatua, burgesia, langileria...
17. Ez dira letra larriz idazten erlijioen izenak eta erlijio bakoi-
tzaren jarraitzaileen izenak. Adibideak:
kristautasuna, budismoa, islamismoa, katolizismoa, xamanismoa...
katolikoa, protestantea, adbentista...
18. Ez dira letra larriz idazten kargu ofizial eta akademikoen eta
tituluen izenak. Adibideak:
ministroa, zuzendaria, kontseilaria, alkatea, presidentea, euskaltzaina,
errektorea, katedraduna, doktorea, bizkondesa, kondea, markesa,
Ezpeletako baroisa, printzea, erregina...
19. Letra larriz idazten diren hitzetatik eratorritako hitzak.
Letra larriz idazten den izen batez edo sigla batez eta -kide edo
-zale atzizki gisa funtzionatzen duten izenekin osatutako hitz
eratorriak letra xehez idazten dira (-ar atzizkiarekin gertatzen
den bezala: Perurena baina perurenatarrak eta Usurbil baina usurbil-
darra). Adibidez:
JEL, baina jeltzale, jelkide, jeltzaletasun, jelkidetasun, jeltzaletu.
ETA, baina etazalea, etakidea.
UEU, baina ueukidea.

17 Ez dago kontraesanik irizpide horren eta 2.2.3.1 puntuan ematen den irizpidearen
artean, desberdinak baitira erabilerak.

78

UZEI, baina uzeikidea.
GRAPO, baina grapokidea.
Elhuyar, baina elhuyarkidea.
Aralar, baina aralarkideak.
Real Sociedad, baina realzaleak.
Athletic, baina athleticzaleak.
Baskonia, baina baskoniazaleak.
Osasuna, baina osasunazaleak.
Orio, baina oriozaleak [Orioko arraunlarien jarraitzaileak adie-
razteko].
Ibarretxe politikaria, baina ibarretxezaleak [bestela, Ibarretxeren zaleak].
Irujo pilotaria, baina irujozalea [bestela, Irujoren zalea].
Oharrak:
• Leku-izenekin erabiltzen denean, bereiz idaztea proposatzen
da. Adibideak:
Gure lagunak oso Getaria zaleak dira.
Gaztetan, Lekeitio zalea izan zen.
• Ikus 2.2.5.8 puntuan leku-izenetatik eratorritako aditzak
idazteko irizpidea.

79

Letra larriak

More Related Content

Similar to Letra larriak (20)

Letra larriak